«Հալալ կաթնակեր». Հայաստանում մասնագետները փորձում են օրենքով խրախուսել կրծքով սնուցումը
ՄԱԿ-ի Մանկական հիմնադրամի հայաստանյան գրասենյակի ղեկավար Լեյլա Մոշիրին զարմացած է. ինչպե՞ս է, որ Հայաստանում խրախուսում են կրծքով սնուցումը, բայց համապատասխան օրենսդրական դաշտ ստեղծված չէ: Այսօր Ազգային ժողովում «Երեխաներին կրծքով սնուցման խրախուսման օրենսդրական կարգավորումը» թեմայով խորհրդարանական լսումներում նա հայտարարեց, որ ժամանակն է օրենսդրական դաշտ ստեղծել, որը կկարգավորի մանկական արհեստական կերի օգտագործումը, դրա գովազդը հեռուստաընկերությամբ ու կնպաստի Հայաստանում կրծքով սնուցման տարածմանը:
Առողջապահության նախարարության մոր և մանկան առողջության պահպանման վարչության պետ Կարինե Սարիբեկյանի ներկայացրած տվյալներով, ներկայումս Հայաստանում կրծքով կերակրման ցուցանիշը կազմում է 60 տոկոս: Հայաստանում կրծքով կերակրվող երեխաների ամենացածր ցուցանիշը գրանցվել է 1994-ին, պատճառը, ըստ Սարիբեկյանի, 1988-ի դաժան երկրաշարժն էր ու դրա հետևանքով մարդկանց սոցիալական ծանր վիճակը:
Նախարարության մասնագետն ասաց, որ իրենք հետազոտություն են անցկացրել ու պարզել են, որ այժմ մինչև 6 ամսեկան երեխաների 20 տոկոսը ստանում է հավելյալ կոշտ սնունդ: 6-ից 23 ամսեկան երեխաների ընդամենը 27 տոկոսն է ստացել անհրաժեշտ հավելյալ սնուցում, իսկ մյուս մասի մոտ վատ սնվելու հետևանքով առաջացել է թերսնուցում:
Կրծքի կաթով սնուցումը, մասնագետի վստահեցմամբ, շատ առավելություններ ունի` կատարյալ սնունդ է, մոր և մանկան բնական կապն է ապահովում, ընդլայնում երեխայի ճանաչողությունը: Բայց այսքանից բացի, Կարինե Սարիբեկյանն առանձնացնում է կրծքի կաթի մեկ այլ առավելություն, որը հատուկ է հայաստանյան միջավայրին` «հալալ կաթնակեր»: «Մոր կաթի հետ երեխան ստանում է մարդկային, որակական հատկանիշներ. Դա ապացուցված է ու հաստատուն է դարձնում մեր պապերի կողմից տարիներ առաջ ասված այդ արտահայտությունը», -հավելեց Սարիբեկյանը:
Երեխայի մոր մոտ կաթի սակավության վերաբերյալ մասնագետը հստակ դիրքորոշում ունի. «Կաթը գալիս է գլխից, եթե կինը վստահ է, եթե կա աջակից միջավայր, ապա կաթը կլինի»:
Առողջապահության նախարարության աշխատակազմի ղեկավարի ժամանակավոր պաշտոնակատար Սուրեն Քրմոյանն իր հերթին կարևորելով ոլորտը կարգավորող օրինագծի ընդունումը, ասաց, որ այն կկարգավորի պետական քաղաքականությունը ու կորոշի հիմնական ուղղությունները: Նա տեղեկացրեց, որ Աշխատանքային օրենսգրքով առաջին քայլերն արված են` գործատուները պարտավորված են կերակրող մայրերի համար բոլոր պայմանները ստեղծել, որպեսզի նրանք լրացուցիչ 1 ժամ հանգստյան ժամանակ ունենան: Բացի այդ, Աշխատանքային օրենսգրքով, կերակրող մայրերին աշխատանքի ժամանակ ընդմիջման հնարավորություն է տրվում երեխային կերակրելու համար:
«Նոր օրենքով արգելվելու է բժշկական բոլոր հիմնարկություններում և բոլոր բժիշկների կողմից մանկական արհեստական կերերը գովազդելու համար», -հայտարարեց Քրմոյանը` հավելելով, որ արգելքը վերաբերելու է ոչ միայն փոշուց մանկական արհեստական կերերին, այլ նաև պյուրեներին ու ծծակներով շշերին:
ՄԱԿ-ի մանկական հիմնադրամի հայաստանյան գրասենյակի ղեկավար Մոշիրին նկատեց, որ ոլորտը կարգավորելու համար Հայաստանի կառավարությունը պետք է քաղաքական կամք ցուցաբերի:
Ինչևէ, մասնագետ Սարիբեկյանը պնդում է, որ մինչև 6 ամսեկան երեխան պետք է մայրական կաթով կերակրվի, իսկ եթե 6 ամիս հետո երեխան չի հրաժարվում կրծքից, ցանկալի է որ մինչև 2 տարին լրանալը փոքրիկը շարունակի կրծքի կաթ ուտել, քանի որ այն լավ է մարսվում:
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
