Ձեր վստահելի աղբյուրը

«Ես շնորհակալ եմ իմ ճակատագրից, որ բախտ է վիճակվել համերգայն ծրագրով ներկայանալ հայ հանդիսատեսին»,- այսօր լրագրողների հետ հանդիպման ժամանակ ասաց աշխարհահռչակ դիրիժոր և ջութակահար Մաքսիմ Վենգերովը:

«Ես աշխարհի տարբեր երկրներում ունեմ շատ լավ երաժիշտ հայ ընկերներ, որոնց հետ միշտ կապեր եմ պահպանում և հանդես եմ գալիս համերգային ծրագրերով: Դրա համար ինչ-որ մասով երբեմն ինձ հայ եմ զգում»,- ասաց նա:

Ջութակահարը նշեց, որ հայկական երաժշտություն շատ է սիրում: «Շատ եմ սիրում հայ կոմպոզիտոր Արամ Խաչատրյանի երաժշտությունը, և ապագայում ցանկություն ունեմ սովորել ջութակի համար գրված նրա գործերից»,- հավելեց նա:

«Ես Հայաստան եմ բերել իր ջութակը, առանց որի երբեք չեմ ճանապարհորդում համերգային ծրագրերով: Ջութակն ինձ համար հոգու շարունակություն է»,- ասաց Վենգերովը:

Արդյո՞ք երաժշտությունն ազգություն ճանաչում է, հարցին, Վենգերովը պատասխանեց, որ տարբեր ազգեր երաժշտությունը տարբեր կերպ են ընկալում, կարևորը երաժշտի համար այն է, որ իր երաժշտությունը հասնի հանդիսատեսի հոգուն`անկախ ազգությունից:

Նա հույս հայտնեց, որ ապագայում Հայաստանում գուցե մենհամաերգով հանդես կգա ավելի մեծ համերգային ծրագրով:

Մաքսիմ Վենգերովը հայտնեց, որ Երևանում գտնվում է մեկ շաբաթ, սակայն համերգի նախապատրաստական աշխատանքներով զբաղված լինելու պատճառով, հասցրել է այցելել միայն Ս. Փարաջանովի տուն-թանգարան և գեղագիտական հաճույք է ստացել, իսկ տեսարժան վայրեր և եկեղեցիներ նախատեսել է այցելել համերգից հետո:

Հայաստանի պետական երիտասարդական նվագախմբի ղեավար Սերգեյ Սմբատյանը նշեց, որ նվագախմբի անդամների համար մեծ պատիվ է աշխատել աշխարհահռչակ դիրիժոր և ջութակահար Մաքսիմ Վենգերովի հետ:

Նշենք, որ Մ. Վենգերովը 1997 թվականից հանդիսանում է ՅՈՒՆԻՍԵՖ-ի կոմիսար: Փետրվարի 21-ին տեղի կունենա հանդիպում Երևանի Կոմիտասի անվան պետական կոնսերվատորիայի ուսանողների հետ, իսկ ՅՈՒՆԻՍԵՖ-ի մանկական նվագախմբի հետ կանցկացնի վարպետության դասեր:

Հիշեցնենք, որ ՀՀ մշակույթի նախարարության աջակցությամբ և Հայաստանի պետական երիտասարդական նվագախմբի հրավերով` փետրվարի 22-ին ժամը 19:00-ին Ա. Խաչատրյան համերգասրահում առաջին անգամ Հայաստանում համերգային ծրագրով հանդես կգա աշխարհահռչակ դիրիժոր և ջութակահար Մաքսիմ Վենգերովը: