Ձեր վստահելի աղբյուրը

Այսօր «Արմենիա-Մարիոթ» հյուրանոցում ԱՄՆ Միջազգային զարգացման գործակալությունը նշեց «Մրցունակ մասնավոր հատված Հայաստանում» (CAPS) ծրագրի հաջող ավարտը:
Հիշեցնենք, որ ԱՄՆ ՄԶԳ կողմից ֆինանսավորվող և Նաթան Ասոշիէյթս ինկ.-ի (www.nathaninc.com ) կողմից իրականացվող հնգամյա CAPS ծրագիրը (www.caps.am ) կիրառել է կլաստերային մոտեցում` խթանելով համագործակցությունը ընկերությունների, գործարար ծառայություններ մատուցողների, կանոնակարգիչ մարմինների և ուսումնական հաստատությունների միջև ՏՏ, զբոսաշրջության և դեղագործական ոլորտներում` հայկական ընկերությունների մրցունակության մեծացման և մասնավոր հատվածի զարգացման միջավայրի ամրապնդման նպատակով:
ԱՄՆ ՄԶԳ/CAPS ծրագրի տնօրեն Արտակ Ղազարյանն ամփոփելով հնգամյա գործունեության արդյունքները նշեց, որ 2005 թվականի սեպտեմբերից ի վեր CAPS ծրագիրն աջակցել է ավելի քան 500 տեղական ընկերության, մշակել է ՏՏ և զբոսաշրջության ոլորտների ազգային ռազմավարությունները, էլ. կառավարման ռազմավարությունը և Ջերմուկ քաղաքի զբոսաշրջային զարգացման ռազմավարությունը, ՏՏ ձեռնարկությունների միության հետ իրականացրել է արդեն ավանդույթի վերածված «Առանց փողկապների հանդիպումներ, ինչպես նաև ներմուծել է ժամանակակից ուսումնական պլաններ և ուսուցման մեթոդներ բարձրագույն ուսումնական հաստատություններում և մասնագիտական կրթության հաստատություններում:
«2006-2011 թվականներին CAPS –ի ընդհանուր ֆինանսավորման չափը եղել է ավելի քան 14 մլն դոլար: Այսօր արդեն միանշանակ կարող եմ ասել, որ մեր աշխատանքի արդյունքները բավական շոշափելի են»,- նշեց Արտակ Ղազարյանը:
Անդրադառնալով հետագա ծրագրերին ԱՄՆ ՄԶԳ/CAPS ծրագրի տնօրեն Արտակ Ղազարյանն ասաց, որ դեռևս ոչինչ հայտնի չէ:
«Միջազգային զարգացման գործակալությունը հայտարարել է նոր մրցույթ , որը կհաջորդի CAPS ծրագրին : Մրցույթի արդյունքները հայտնի կդառնան մայիս -հունիս ամիսներին: Նոր ծրագիրը լինելու է կրկին 5 տարով, իսկ ֆինանսավորումը` 20-22 մլն դոլար»,-տեղեկացրեց Արտակ Ղազարյանը: