Ձեր վստահելի աղբյուրը

Այսօր լրագրողների հետ հանդիպման ժամանակ Բարձրագույն որակավորման հանձնաժողովի նախագահի պաշտոնակատար Արտյուշա Ղուկասյանը հայտնեց, որ գիտական աստիճանաշնորհման համակարգի բարեփոխման նպատակով գիտական աստիճանաշնորհման կանոնակարգում իրականացվել են մի շարք փոփոխություններ:
Նա նշեց, որ փոփոխությունների նպատակն է էլ ավելի թափանցիկ դարձնել ԲՈՀ-ի գործունեությունը, բացի այդ օպտիմալացնել մասնագիտական խորհուրդների ցանկը:

Ա. Ղուկասյանի խոսքով, ՀՀ Կրթության և գիտության նախարարության բարձրագույն որակավորման հանձնաժողովը վերանայել և հաստատել է ատենախոսությունների թեմաներ հաստատող կազմակերպությունների ու ատենախոսությունների հիմնական դրույթների տպագրման համար ընդունելի պարբերականների ցուցակները:

«Թեկնածուական ատենախոսությունների պաշտպանության համար ներկայացվող նոր պահանջների համաձայն` հայցորդը պետք է ունենա 3 գիտական հոդված, այդ թվում` մեկն առանց համահեղինակի»,- հավելեց նա:
Բանախոսը հայտնեց, որ դոկտորական ատենախոսությունների պահանջներն խստացվել են. պահանջվում է 20 գիտական հոդված, որոնցից 5-ը պետք է տպագրված լինի օտարերկրյա պետություններում հրատարակվող գիտական հանդեսներում:
Նրա խոսքով, գիտական աստիճանաշնորհման կանոնակարգում միջազգային հանդեսների հետ կապված ձևակերպումը փոփոխվել է:

Ա. Ղուկասյանը հայտնեց, որ սկսվել է մասնագիտական նոր խորհուրդների ձևավորման գործընթացը:
Նա նշեց, որ հիմնականում ժամկետները լրանալու պատճառով դադարեցվել է մի շարք մասնագիտական խորհուրդների գործունեությունը: Ա. Ղուկասյանի խոսքով, 61 խորհուրդներից 55-ի ժամկետները լրացել էին 2010թվականի դեկտեմբերի 31-ին:
Նրա խոսքով, ՀՀ ԿԳՆ բարձրագույն որակավորման հանձնաժողովը, սկսել է մասնագիտական խորհուրդների նոր ցանցի ձևավորման գործընթացը:

«ԲՈՀ-ը հաստատված նոր չափանիշներին համապատասխան, քննարկում է ստացված նոր հայտերը: Արդեն հրամանագրվել է 32 խորհուրդ: Գործընթացն այժմ շարունակվում է»,- ասաց նա և հավելեց, որ մասնագիտական խորհրդի անդամ լինելու հարցը բավական խիստ է դրված:

Ա. Ղուկասյանի խոսքով, վերջին շրջանում տարեկան միջինում 500 գիտական գործ է պաշտպանվում, սակայն նրանց հեղինակներից ոչ բոլորն են վերադառնում գիտական ուսումնական հաստատություններ աշխատելու համար: