Ձեր վստահելի աղբյուրը

Ավարտվել են լիցենզավորման հայտերի ընդունման էլեկտրոնային համակարգի ստեղծման աշխատանքները: Ինչպես այսօր կայացած ասուլիսում նշեց ՀՀ կառավարության աշխատակազմի ղեկավար Դավիթ Սարգսյանը, այսուհետ ցանկացողները e-gov.am կայքի միջոցով կարող են դիմել Հայաստանում գործող տարբեր գերատեսչությունների լիցենզիայի այս կամ այն տարատեսակը ստանալու համար: Ցանկացողները հայտերը կարող են ներկայացնել ինտերնետի միջոցով, հետևել դրա ընթացքին և վերջում ստանալ այդ լիցենզիան:

Ըստ Դ.Սարգսյանի, արդեն կան առաջին դիմումատուները` քաղաքաշինության ոլորտում:
«Կարծում եմ` այս նորամուծությունը լավ գործիք կլինի մեր քաղաքացիների համար, և դրական ազդեցություն կունենա բիզնես միջավայրի բարելավման համար»,- նշեց Դ. Սարգսյանը: Ըստ նրա, էլեկտրոնային կառավարման համակարգի ներդրումը թույլ է տալիս թափանցիկ դարձնել կառավարության գործունեությունը հասարակության համար, ինչպես նաև քաղաքացիներին և բիզնես շրջանակներին էլեկտրոնային եղանակով ծառայությունների մատուցումն ապահովում է շփումների նվազեցում չինովնիկի և քաղաքացու, չինովնիկի և գործարար շրջանակների միջև:

Դ.Սարգսյանը տեղեկացրեց, որ էլեկտրոնային լիցենզավորման վճարները ներկայումս կատարվում են բանկերի միջոցով, բայց մոտ մեկ ամսվա ընթացքում հնարավոր կլինի բանկային քարտերի միջոցով կատարել վճարումները:

Դ.Սարգսյանի խոսքերով, էլեկտրոնային կառավարման համակարգի ներդրումը կառավարության գերակայություններից մեկն է: Նա նշեց նաև, որ երկու շաբաթվա ընթացքում հանրությանը կներկայացվի էլեկտրոնային ռեգիստրի համակարգը, որը հնարավորություն կտա էլեկտրոնային եղանակով մեկ միասնական պատուհանի միջոցով 15-20 րոպեի ընթացքում ձեռնարկություններ գրանցել:
Անդրադառնալով 2010թ.-ից գործող e-gov.am կայքին, աշխատակազմի ղեկավարը հայտնեց, որ կայքն ամսական ունի մոտ 18 հազար այցելու, բայց այս ցուցանիշը յուրաքանչյուր ամիս աճում է 15 %-ով:

Ինչ վերաբերում է էլեկտրոնային ստորագրություններին, ապա Դ. Սարգսյանը նշեց, որ ներկայումս թողարկվել է 5700 ստորագրություն: «Որքան ավելի մեծ թվաքանակով պրոդուկտներ և ծառայություններ առաջարկենք մեր քաղաքացիներին, այնքան ավելի մեծ կլինի պահանջարկը էլեկտրոնային ստորագրությունների, և այդքան ավելի ակնհայտ կդառնա էլեկտրոնային ծառայություններից օգտվելու հարմարավետությունը»,- ընդգծեց Դ. Սարգսյանը:

Նա նաև նշեց, որ էլեկտրոնային ծառայություններից օգտվելու քաղաքացիների ակտիվությունը ցույց կտա ժամանակը: Ըստ Դ.Սարգսյանի, այսօր Հայաստանում, ըստ պաշտոնական վիճակագրության, կա շուրջ 200 հազար լայնաշերտ կամ արագագործ ինտերնետ սպառող, այն դեպքում, երբ 1 տարի առաջ 70 հազար էր, իսկ դրանից 1 տարի առաջ` 30 հազար: Այսինքն` տարեկան 2-3 անգամ աճ է գրանցվում, եթե այս տեմպերը շարունակվեն, ապա տարեվերջին 400 հազար սպառող ունենալն իրական սպասելիք է: