Ձեր վստահելի աղբյուրը

«Եթե ուզում եք խաղաղություն, չեք կարող իրար հրացանի փողեր ուղղել»,-այսօր արտգործնախարարությունում տեղի ունեցած ասուլիսում հայտարարեց ԵԱՀԿ գործող նախագահ, Լիտվայի արտգործնախարար Աուդրինյուս Աժուբալիսը` անդրադառնալով շփման գծից դիպուկահարների հեռացման խնդրին: Նրա խոսքով, դիպուկահարներին հեռացնելը կօգնի լարվածության նվազմանը և ասաց, որ ուրախ է, որ հայկական կողմը նույնպես աջակցում է այդ մտքին:

«ԼՂ հակամարտությունը պետք է լուծվի խաղաղ ճանապարհով, դրան այլընտրանք չկա: Եկեք դիպուկահարներին հանենք շփման գծից, նվազեցնենք լարվածությունը, ինչը խաղաղ բանակցությունների հիմք կլինի: ԵԱՀԿ ՄԽ-ն պետք է պնդի, որ կողմերն իրենց պարտավորությունները կատարեն: Հրադադարի ռեժիմի խախտումների արդյունքում զոհերի համար ցավում եմ, պետք է հաշվի առնել Սոչիի հանդիպման պայմանավորվածությունները: Ողջունում են նաև գերիների փոխանակման գործընթացը», -հավելեց Լիտվայի արտգործնախարարը:

Նա ասաց, որ և Ադրբեջանի, և Հայաստանի ղեկավարության հետ քննարկում է դիպուկահարների հետքաշման անհրաժեշտության մասին հարցը: Այդ հարցում, նրա խոսքով, ԵԱՀԿ-ն չունի կողմերին պարտադրող մեխանիզմ: Վերահաստատեց իր դիրքորոշումը, թե պետք է փրկել կյանքեր, ասաց, որ չի հոգնի կողմերին առաջարկել հետ քաշել դիպուկահարներին և ավելացրեց. «Այստեղ, Հայաստանում, իմ գործընկերոջը առաջարկեցի` միգուցե Հայաստանն առաջինը հետ քաշի դիպուկահարներին, իմ առաջարկն ավելի շուտ ինպրովիզացիոն բնույթ ուներ, բայց այնուամենայնիվ ես նրան առաջարկեցի դա անել: Դայց դա ավելի շուտ զգացական հարթության վրա է ու կարծում եմ, որ դա Հայաստանի բարի կամքի լավագույն օրինակը կլիներ»:

Արտգործնախարար Էդվարդ Նալբանդյանը, բնականաբար, Աժուբալիսի այս հայտարարությունը անպատասխան չթողեց: Նախ ասաց, որ վերջին երկու տարիներին միջազգային տարբեր ամբիոններից բազմաթիվ անգամ կոչեր են հնչել դուրս բերել դիպուկահարներին շփման գծից և թե Հայաստանը, թե Ղարաբաղը ընդունել են դիպուկահարների դուրս բերման առաջարկը:

«Հայաստանն ընդունել է նաև հրադադարի ռեժիմի ամրապնդման, ինչպես նաև հետաքննության անցկացման առաջարկները: Մենք նաև կողմ ենք համաձայնության գալ ուժի չկիրառման վերաբերյալ: Վերջին շրջանում կցանկանայի հիշեցնել, որ թե Սոչիից առաջ, թե Սոչիից հետո և անգամ երեկ, երբ տարածաշրջանում են գտնվում եռանախագահող երկրների ներկայացուցիչները, գործող նախագահը, ադրբեջանական դիպուկահարները ևս մեկ զինվորական են սպանել Ղարաբաղում: Մեծ աղմուկ են բարձրացնում առանց հիմնավոր պատճառների երեխայի մահվան համար, որն անգամ տեխնիկապես անհնար էր, որ լիներ Ղարաբաղի կողմից: Այս բոլոր քայլերն ուղղված են, որ լարվածությունը մեծացնեն տարածաշրջանում: Մենք կողմ ենք, որ Սոչիում ստեղծված դրական մթնոլորտի հիման վրա բանակցությունները շարունակվեն դեպի հիմնախնդրի կարգավորում», -հայտարարեց Նալբանդյանը: