Ձեր վստահելի աղբյուրը

Ռուսաստանի ֆուտբոլի ազգային հավաքականի գլխավոր մարզիչ Դիկ Ադվոկատը Մոսկվայում հրավիրած մամուլի ասուլիսում հիշեցրել է, որ առանց 100 տոկոս նվիրվածության ժամանակակից ֆուտբոլում հնարավոր չէ հաղթել ոչ մի մրցակցի: Հիշեցնենք, որ Ռուսաստանի ազգային թիմը նախապատրաստվում է մարտի 26-ին Եվրոպայի 2012 թ. առաջնության ընտրական փուլի շրջանակներում Հայաստանի ընտրանու հետ կայանալիք հանդիպմանը:

«Առջևում դեռ 6 խաղ ունենք: Ինչպես միշտ, ասում եմ, որ պարգևը հաղթողին սպասում է միայն վերջում: Առայժմ ընդամենը 4 հանդիպում ենք անցկացրել: Սակայն հասկանում եմ, որ եթե հաղթենք Հայաստանում, մրցակիցը մեզանից հետ կմնա 5 միավորով: Իսկ եթե այլ արդյունք արձանագրվի, հայերը կմնան այն թիմերի շարքում, որոնք պայքար են մղում եզրափակչի ուղեգրերի համար: Պայմանները, ի դեպ, նույնն են լինելու բոլորիս համար: Բացառությամբ այն բանի, որ մեր մրցակիցն անցկացնելու է տնային 4-րդ հանդիպումը: Ի դեպ, մեզ համար այնքան էլ կարևոր չէ, թե Հայաստանի ընտրանին ինչպես կխաղա: Գլխավորն այն է, թե ինչպես կխաղանք մենք: Բնականաբար, չի կարելի խաղալ այնպես, ինչպես Բելգիայի ու Իրանի թիմերի հետ հանդիպումներում: Անհրաժեշտ է գործել այնպես, ինչպես Իռլանդիայում և Մակեդոնիայում: Այլ կերպ ասած` շատ ագրեսիվ` ցուցադրելով լավ ֆուտբոլ: Կարծում եմ` բոլորն էլ պատրաստ են դրան: Եթե շաբաթ օրը չխաղանք 100 տոկոս նվիրվածությամբ, ապա արդյունք էլ չի լինի»: