Ձեր վստահելի աղբյուրը

«ԱրմենՏել» ՓԲԸ (ապրանքանիշը Beeline) վարչական գրասենյակում տեղի է ունեցել «Հեքիաթների աշխարհում» մանկական նկարի համահայկական մրցույթ-փառատոնի հաղթողների պարգևատրման արարողությունը: Այս մասին տեղեկացանք «ԱրմենՏել» ընկերությունից:

10 հայ երեխաներ` Հայաստանից և Սփյուռքից ստացել են Հայաստանի Հանրապետության կրթության և գիտության նախարարության և «ԱրմենՏել» ընկերության կողմից նվերներ:

Հայկական հեքիաթներին նվիրված մրցույթ-փառատոնին մասնակցել են շուրջ 1000 աշակերտ աշխարհի տարբեր երկրներից: Մրցույթ-փառատոնի առաջին փուլի ավարտից հետո 160 լավագույն նկարները ցուցադրվել են Երևանի գեղագիտության ազգային կենտրոնում կազմակերպված ցուցահանդեսում:

«Աճող սերնդի դաստիարակության գործընթացն անհնար է կազմակերպել միայն կրթական համակարգի միջոցով: Այստեղ կարևոր է բոլոր կառույցների մասնակցությունը` բիզնեսի, հասարակական կազմակերպությունների և մշակույթի կենտրոնների: Այս մրցույթ-փառատոնը` վառ օրինակ է, երբ արժանի սերունդ կրթելու ընդհանուր նպատակի շուրջ համախմբվել են տարբեր կառույցներ», - նշել է Հայաստանի Հանրապետության կրթության և գիտության նախարարի տեղակալ Մանուկ Մկրտչյանը

«Այցելելով մանկական նկարների ցուցահանդես, ես հաճելիորեն զարմացած և զմայլված էի ոչ միայն երեխաների տաղանդով, այլ նաև մանկության և պատանեկության այն հրաշալի ուժով, որն երեխաներից յուրաքանչյուրն արտացոլել էր իր ստեղծագործություններում: Այսօր, մենք ներկա եղանք այն իրողությանը թե ինչպես այստեղ Հայաստանում հայկական հեքիաթը խթան հանդիսացավ Սփյուռքի երիտասարդների միավորմանը` հայ մշակույթի, ժառանգության և արժեքների շուրջ», - նշել է «ԱրմենՏել» ՓԲԸ Գլխավոր տնօրեն Իգոր Կլիմկոն:

Մրցույթ-փառատոնի նպատակն է հայտնաբերել առավել շնորհալի մանուկներին Հայաստանում և Սփյուռքում, ինչպես նաև խրախուսել հայկական մանկական գրականության իմացությունը և հետաքրքրությունը գեղանկարչության հանդեպ: Մրցույթ-փառատոնը կազմակերպել է Հայաստանի Հանրապետության կրթության և գիտության նախարարության կողմից, իսկ կազմակեպմանն աջակցել է «ԱրմենՏել» ընկերությունը: