Ձեր վստահելի աղբյուրը

Այսօր` աուտիզմի իրազեկման միջազգային օրվան ընդառաջ ՎիվաՍել-ՄՏՍ-ի գլխավոր տնօրեն Ռալֆ Յիրիկյանն այցելել է աուտիզմով հիվանդ երեխաների համար նախատեսված «Երեխաների զարգացման միջազգային կենտրոն»: Կենտրոնի 20 սաները 3-12 տարեկան են:

2008 թվականից սկսած ՎիվաՍել-ՄՏՍ-ն աջակցություն է ցուցաբերում կենտրոնին: Աուտիզմով երեխաների կրթաշտկողական աշխատանքը շատ դժվարին և թանկարժեք գործընթաց է, քանի որ յուրաքանչյուր երեխայի հետ տարվում է ինտենսիվ անհատականացված` մեկ թերապևտ-մեկ երեխա հարաբերությամբ ուսուցում: Այս նպատակով ՎիվաՍել-ՄՏՍ-ն ընդհանուր առմամբ կատարել է զգալի ներդրում, ինչի արդյունքում երեխաները կենտրոն են հաճախում` առանց որևէ վճարի:

Ռալֆ Յիրիկյանը յուրաքանչյուր երեխայի նվիրեց Հանրահայտ «Դորլինգ Քինդերսլի» հրատարակչության «Իմ առաջին գիրքը» շարքի 10 գրքերը: Բառերի ընտրությունը, դրանց համադրումը և գունային լուծումներն արված են այնպես, որ գրավեն երեխայի ուշադրությունը և տրամադրեն սովորելու: Նկարազարդ ու գունեղ գրքերի միջոցով աշխարհի տարբեր ժողովուրդների միլիոնավոր երեխաներ ճանաչում են իրենց մայրենին ու շրջապատող աշխարհը:

Կենտրոնի աշխատակազմի և այնտեղ հաճախող երեխաների ծնողների փաստմամբ, կենտրոն հաճախելու շնորհիվ երեխաների մոտ նկատելի առաջընթաց է դրսևորվել ոչ միայն ակադեմիական գիտելիքների ձեռքբերման մեջ, այլ նաև ինքնասպասարկման և սոցիալականացման ոլորտում, ինչի մասին վկայում են երեխաների վարքում և նրանց մտավոր ունակություններում գրանցված դրական փոփոխությունները: Ավելին, կենտրոնի սաներից երկուսը հաճախում են հանրակրթական դպրոց: Ստացված արդյունքները խոսում են «Երեխաների զարգացման միջազգային կենտրոն» ՀԿ-ի կողմից իրականացվող ծրագրի արդյունավետության մասին:

Աուտիզմը կարողությունների սահմանափակում է` կապված զարգացման հետ, որը սովորաբար ի հայտ է գալիս կյանքի առաջին երեք տարիների ընթացքում: Այն նյարդաբանական խանգարման արդյունք է, որը ախտահարում է ուղեղի տարբեր հատվածներ: Աուտիզմով տառապող և մեծահասակաները, և երեխաները սովորաբար վերբալ և ոչ վերբալ հաղորդակցության, սոցիալական հարաբերությունների, ինչպես նաև զվարճանքի և խաղային գործունեության առումով խնդիրներ են ունենում: Աուտիզմը չորս անգամ ավելի հաճախ արձանագրվում է տղաների մոտ:

Հստակ վիճակագրական տվյալներ Հայաստանում աուտիզմով հիվանդների մասին չկա: Բայց միայն այս կենտրոնի և դրա սաների գոյությունն արդեն ցույց է տալիս, որ այս խնդիրը մեզ չի շրջանցել:

Երեխաները չեն կարող բուժվել, քանի որ աուտիզմի համար դեղամիջոց հայտաբերված չէ: Բայց երեխաները կարող են սովորել գործել խախտման թույլ տված շրջանակներում, մանավանդ եթե բուժումը վաղ է սկսվում: Ինտենսիվ վաղ միջամտությունը հնարավորություն է տալիս զգալի առաջընթաց արձանագրել երեխաների մոտ: Աուտիզմով ախտորոշված երեխաները հատուկ ծառայությունների և աջակցության կարիք ունեն` այս ամենին հասնելու համար:

«Յուրաքանչյուր երեխա արժանի է ունենալ ծիծաղելու և խաղալու հնարավորություն և դառնալու ուրախ ու առողջ մեծահասակ: ՎիվաՍել-ՄՏՍ-ը հավատում է, որ ձեռք ձեռքի տված, միասին պայքարելով մենք կունենանք դրական արդյունք և առաջընթաց: Մենք ուզում ենք լինել այս ընտանիքների կողքին, որպեսզի նրանք չհուսահատվեն: Մենք, որպես սոցիալապես պատասխանատու ընկերություն, հաստատակամ ենք նրանց աջակցելու գործում»,- ասաց ՎիվաՍել-ՄՏՍ-ի գլխավոր տնօրենը:

ՎիվաՍել-ՄՏՍ-ը հավատում է, որ բիզնեսի և հասարակության համատեղ գործընկերության շնորհիվ է, որ հնարավոր է բարելավել մի երեխայի, մի ընտանիքի և մեր երկրի կյանքի որակը: