Ձեր վստահելի աղբյուրը

ԽՍՀՄ-ի և ՌԴ ֆուտբոլային հավաքականների նախկին հարձակվող Սերգեյ Յուրանին անհանգստացնում է այն փաստը, որ ազգային թիմ հրավիրված խաղացողներն այժմ տարբեր մարզավիճակներում են գտնվում:

«Ռուսաստանի հավաքականի ֆուտբոլիստներն այժմ տարբեր մարզավիճակներում են, և դա անհանգստացնում է,- նրա խոսքերը մեջբերել է «Սպորտ Էքսպրեսը»:- Դիտելով Պրեմիեր լիգայի մեկնարկային երկու տուրի հանդիպումները` նկատել եմ, որ հավաքականի բոլոր ֆուտբոլիստները չէ, որ հասել են անհրաժեշտ մարզավիճակի: Դրան գումարած` մեր լեգեոներներն էլ պահանջվող խաղային պրակտիկան չունեն: Բացառություն է կազմում միայն Անդրեյ Արշավինը: Հայաստանի ընտրանին խմբում երկրորդ տեղը գրավելու հնարավորություն ունի և բոլոր ուժերով կձգտի դրան: Մինասյանի թիմն այժմ ցուցադրում է բովանդակալից ֆուտբոլ: Միայն կարգով, առանց ցանկության ու նվիրվածության, հայերին չենք հաղթի: Այդուհանդերձ, հույս ունեմ, որ ռուսների համար հանդիպումը հաջող ընթացք կունենա:
Հայաստանի հավաքականում սերնդափոխություն է կատարվել: Թիմի կազմում ընդգրկվել են երիտասարդ և տաղանդավոր ֆուտբոլիստներ: Մարզչի ձեռքն զգացվում է: Հայերը սեփական խաղաոճ են մշակել, որն առայժմ արդյունք է տալիս: Հաղթելու համար մենք պետք է ցուցադրենք մեր ֆուտբոլը»: