Մեքենան տեխզննում չի անցնում, բայց կտրոն է ստանում. «Աքիլլես»-ի բացահայտումները
«Աքիլլես» ավտովարորդների իրավունքների պաշտպանության կենտրոն հասարակական կազմակերպության նախագահ Էդուարդ Հովհաննիսյանին վարորդներ շատ են զանգում, բողոքում մեքենաների տեխզննման գործընթացից ու խորհուրդներ հարցնում: Հովհաննիսյանը ի մի էր բերել բոլոր բողոքները ու այսօր ասուլիսում հայտարարեց, որ Հայաստանում գործող տեխնիկական զննման կայաններում «գործ չեն անում» ու դրա համար մարդկանցից գումարներ շորթում:
Նա վստահ է, որ ավտոմենքենաների տխնիկական զննման կայանները ձևական բնույթ են կրում, քանի որ այնտեղ մեքենայի 64 չափանիշ պետք է ստուգվի, բայց ստուգվում է միայն երկուսը: Այդ կայանները, ըստ նրա, տեխնիկական հագեցվածություն չունեն, իսկ եղած տեխնիկան էլ հնամաշ է:
«Կառավարության որոշմամբ, սահմանվել են այդ չափանիշները, որոնք պետք է անպայման ստուգվեն: Բայց համապատասխան թղթերը լրացվում են ու ստուգում չի իրականացվում: Դրա վերահսկողը Տրանսպորտի և կապի նախարարությունն է, հիմա որ գնաք նրանց մոտ, ձեզ ցույց կտան թղթերը ու կասեն ստուգում է արվում: Բայց ստուգում չի արվում, նրանք միայն թղթի վրա են աշխատում, իսկ տեխզննման կայաններն էլ ձևական են: Մեքենան տեխզննում չի անցնում, բայց կտրոն է ստանում», -հայտարարեց Էդուարդ Հովհաննիսյանը:
«Աքիլլես»-ին զանգող վարորդները դժգոհել են նաև տեխզննման կայաններում արմատացած կոռուպցիայից: Նա ասաց, որ մարդատար ավտոմեքենայի տեխզննման համար նախատեսված 10 հազար դրամի դիմաց վերցնում են 13 հազար դրամ, իսկ բեռնատար ավտոմեքենաների համար նախատեսված 13 հազար դրամի փոխարեն գանձում 30 հազար դրամ գումար: Ավելին, կազմակերպության ղեկավարը խոսել է Գավառի վարորդների հետ և տեղեկացել, որ նրանք բեռնատար մեքենաների տեխզննման համար վճարել են 40 հազար դրամ:
«Գոնե վարորդի մոտ խաղուպար անեն, որ նա իրենց մոտ գա, ավելորդ գումարներ են վերցնում ու ավելի շատ, քան նախատեսված է օրենքով ու ամենակարևոր խնդիրը` չեն իրականացնում իրենց գործառույթները: Սա կոռուպցիա է», -հայտարարեց «Աքիլես»-ի ղեկավարը:
Կառավարության ընդունած երթևեկության մասին թիվ 24 որոշմամբ, տեխզննում անցած ու համապատասխան կտրոն ստացած մեքենայի վթարի դեպքում պատասխանատվություն պետք է կրի բացառապես վարորդը: Հովհաննիսյանն առաջարկում է համապատասխան փոփոխություններ անել օրենսդրության մեջ ու այդ պատասխանատվությունը բարդել տեխզննման կայանի և Տրանսպորտի ու կապի նախարարության վրա:
«Կամ որակով տեխզննում արեք, կամ էլ ընդհանրապես մի արեք», -հայտարարեց նա:
Լրահոս
Տեսանյութեր
Թովմասյանը՝ Նանուշյանին. Նշել եք՝ ծրագրի իրականացումը պայմանավորված է օրենքով, բայց օրենքը չկա
