Ձեր վստահելի աղբյուրը

Ինտերնետային վիճակագրություն վարող Internet World Stats հեղինակավոր գործակալությունը հրապարակել է 2010 թվականի դրությամբ ինտերնետ օգտագործողների համաշխարհային վիճակագրությունը:

Այդ վիճակագրության համաձայն` նախորդ տարի մոլորակի 6,845 մլրդ բնակիչներից ինտերնետ օգտագործողներ են եղել 2,031 մլրդ-ը կամ 29.7%-ը:

Հրապարակված տվյալների համաձայն` 2010 թվականի հունիսի դրությամբ Հայաստանում գրանցվել է 1 396 550 (1.4 մլն) ինտերնետ օգտագործող, ինչը կազմել է բնակչության 47.1%-ը: Հատկանշական է, որ նախորդող տարում` 2009 թվականին, նույն վիճակագրությամբ Հայաստանում գրանցվել է 191 000 օգտագործող: Այսինքն` մեկ տարվա կտրվածքով հայաստանցի օգտագործողների թիվն աճել է 7 անգամ:
Այս ցուցանիշով ինտերնետի հասանելիություն ունեցող բնակչության տեսակարար կշռով (47.1%) Հայաստանը 258 պետությունների ու տարածքների շարքում զբաղեցրել է 76-րդ հորիզոնականը:

Համաշխարհային ցանցին միացած բնակիչների տեսակարար կշռով առաջատար երկրներն են Իսլանդիան (97.6%), Նորվեգիան (94.8%), Շվեդիան (92.5%), Գրենլանդիան (90.2%), Սենտ Լյուսը (88.8%), Նիդերլանդերը (88.6%), Բահրեյնը (88.0%), Դանիան (86.1%), Նոր Զելանդիան (85.4%) և Ֆինլանդիան (85.3%):
Հետնապահներն աֆրիկյան ու ասիական թերզարգացած երկրներն են. Գվինեա, Կամբոջա, Բուրունդի, Նիգեր, Բանգլադեշ, Կոնգո, Եթովպիա, Լիբերիա, Սիեռա Լեոնե, Արևելյան Թիմոր, Մյանմա: Այստեղ ինտերնետ հասանելիությունը չի գերազանցում 1 տոկոսը:

Օգտագործողների բացարձակ թվով առաջատարն անշուշտ Չինաստան է: Մոլորակի ամենամարդաշատ երկրում համաշխարհային ցանցից օգտվում է 457 մլն մարդ (բնակչության` 34.4%): Նրան հետևում է ԱՄՆ-ն` մոտ 240 մլն (77.3%):

«Խոշոր օգտագործողների» թվում են նաև Ճապոնիան` 99 մլն (78.2%), Հնդկաստանը` 81 մլն (6.9%), Բրազիլիան` 76 մլն (37.8%), Գերմանիան` 64 մլն (79.1%), Ռուսաստանը` 60 մլն (42.8%), Մեծ Բրիտանիան` 51 մլն (82.5%), Ֆրանսիան` 45 մլն (68.9%) և Նիգերիան` 44 մլն (28.9%):

Նախկին խորհրդային երկրներից ինտերնետ օգտագործողների բացարձակ թվով Հայաստանին, բացի Ռուսաստանից, գերազանցում են նաև Ուկրաինան (15.3 մլն), Ղազախստանը (5.3 մլն), Ուզբեկստանը (4.689 մլն), Բելառուսը (4.437 մլն), Ադրբեջանը (3.689 մլն), Ղրղզստանը (2.194 մլն), Լիտվան (2.103 մլն) և Լատվիան (1.503 մլն): Մյուսները` Վրաստան (1.3 մլն), Մոլդովա (1.295 մլն), Էստոնիա (0.97 մլն), Տաջիկստան (0.7 մլն) և Թուրքմենստան (0.08 մլն), բացարձակ ցուցանիշով զիջում են Հայաստանին:

Օգտագործողների տեսկարար կշիռով Հայաստանից առջև են միայն մերձբալթյան երկրները. Էստոնիան 75.1% ցուցանիշով, Լատվիան` 67.8%, Լիտվան` 59.3%: Մյուսները Հայաստանից հետ են մնացել: Ցուցանիշը Բելառուսում 46.2% է, Ադրբեջանում` 44.4%, Ղրղզստանում` 39.8%, Ղազախստանում` 34.3, Ուկրաինայում` 33.7%, Մոլդովայում` 30%, Վրաստանում` 28.3%, Ուզբեկստանում` 16.8%, Տաջիկստանում` 9.3%, և Թուրքմենստանում` 1.6%:

Հայաստանի մյուս երկու հարևանները միջին երկրների շարքում են: Թուրքիայում ինտերնետ օգտագործողները 35 մլն են կամ բնակչության 45%-ը, իսկ Իրանում` համապատասխանաբար 33.2 մլն և 43.2%: