Ձեր վստահելի աղբյուրը

«Արդեն հաջորդ տարվանից բուհերի  ռեկտորները պարտադիր կերպով իրենց տարեկան հաշվետվություններում կներկայացնեն նաև հակակոռուպցիոն պայքարի շրջանակում իրականացրած գործողությունները»,- արձագանքելով Panorama.am-ի հարցին, նշեց Կրթության և գիտության նախարար Արմեն Աշոտյանը:

 2010թ-ի դեկտեմբերի 30-ին ԿԳՆ-ն ընդունել է «Կրթական համակարգում կոռուպցիոն երևույթների դեմ պայքատի 2010-11թթ. Միջոցառումների համալիր ծրագիրը» և ռեկտորներին վերաբերող նորմը, ինչպես նշեց նախարարը, տեղավորվում է հենց այդ ծրագրի գաղափարախոսության մեջ:

Անդրադառնալով մեր այն հարցին, իսկ ոլորտի կոնկրետ ո՞ր հատվածն է ավելի կոռումպացված` հանրակրթական, թե բուհական հաստատությունները, Ա.Աշոտյանը նշեց, թե չի սիրում, երբ սպորտային մոտեցում է լինում խնդրին, քանի որ կոռուպցիան, ի վերջո, կոռուպցիա է` որ բնագավառի մասին էլ խոսքը վերաբերի. «Հայաստանի կրթական կոռուպցիան շատ յուրահատուկ է` շատերը գիտեն ո՞վ,  որտե՞ղ և ինչքա՞ն գումար է վերցնում, սակայն այդ ամենը հիմնված է ասեկոսեների վրա»:

Սակայն, ըստ նրա, բոլոր հետազոտություններն ու ուսումնասիրությունները ցույց են տալիս, որ մեր կոռուպցիան, որի արձագանքը բոլորիս հասնում է այսպես կոչված «փչացած հեռախոսի» շնորհիվ, այդուհանդերձ ունի իր առանձնահատկությունները:

Հարցվածների գերակշիռ մասը հստակ ասում է` այո, Հայաստանի կրթական համակարգը կոռումպացված է, բայց առկա կոռուպցիայի մասին մեծ մասը լսել է և միայն չնչին հատվածն է, որ առնչվել է դրան. «Այսինքն, կոռուպցիոն գործողությունների մեջ մասնակից քաղաքացիների թիվը, որոնք հաստատում են, որ առնչվել են դրան, մի քանի անգամ ավելի պակաս է, քան այն մարդկանց, որ ուղղակի լսել են այդ մասին»,- տեղեկացրեց Ա.Աշոտյանը:

Ինչպես միշտ, նախարարը ընդգծեց` կոռուպցիայի դեմ պայքարում տեսանելի արդյունքներ չենք արձանագրի, քանի դեռ հասարակության մենթալիտետում փոփոխություններ չկան,  քանի դեռ ծնողը համաձայն է իր երեխայի կրթություն չստանալու համար դիմաց գումար վճարել վզակոթին հասցնելու փոխարեն, կունենանք այն, ինչ ունենք: