Ձեր վստահելի աղբյուրը

Երևանում այսօր աշխատանքներն սկսեց հայ–չինական գործարար համաժողովը, որին մասնակցելու համար Հայաստան են ժամանել Չինաստանի տնտեսության տարբեր ոլորտները ներկայացնող 22 ընկերության ներկայացուցիչներ։ Մասնավորապես, հայ գործընկերների հետ համագործակցության եզրեր են փնտրում Չինաստանի մեքենաշինության, ճանապարհաշինության նախագծերի իրականացման, հեռահաղորդակցության սարքավորումների արտադրության, ավիատեխնիկայի արտահանման և ներմուծման, գյուղարտադրանքի վերամշակման և վաճառքի, էլեկտրական ապրանքների արտադրության, հաղորդակցության, հիդրոէլեկտրակայանների կառուցման, լոգիստիկայի, տուրիզմի, միջազգային շինարարական նախագծերի, հանքային ռեսուրսների վերամշակման և այլ ոլորտների գործարարներ։

Համաժողովի բացմանը ներկա էին ՀՀ վարչապետ Տիգրան Սարգսյանը, էկոնոմիկայի նախարար Տիգրան Դավթյանը, Չինաստանի Կոմունիստական կուսակցության կենտրոնական կոմիտեի քաղաքական բյուրոյի մշտական անդամ Լի Չանչունը, ՉԺՀ առևտրի փոխնախարար Ջուն Շանը, հայ և չինացի բարձրաստիճան այլ պաշտոնյաներ:

Ինչպես համաժողովի բացմանը նշեց Տիգրան Դավթյանը, սա լավ պլատֆորմ է տնտեսական համագործակցության ընդլայնումը քննարկելու համար: Ըստ նրա, վերջին շրջանում երկու երկրների հարաբերությունները բավականին դինամիկ զարգանում են, և Չինաստանը Հայաստանի համար դարձել է կարևորագույն գործընկեր:

2010թ.-ին Հայաստանի և Չինաստանի միջև առևտրաշրջանառությունն աճել է 44,4 տոկոսով և կազմել 436,7 մլն ԱՄՆ դոլար։ Նախորդ տարի Հայաստանից արտահանումը կազմել է 30,9 մլն ԱՄՆ դոլար, ներմուծումը՝ 405,8 մլն դոլար։ Հայաստանից Չինաստան հիմնականում արտահանվում են հանքանյութեր: Ներմուծումը շատ ավելի դիվերսիֆիկացված է և ներառում է ապրանքների լայն տեսականի՝  հագուստեղեն, կոշկեղեն, մեքենաշինական և քիմիական արտադրանք, սարքավորումներ, շինանյութ, սննդամթերք և այլն։ Հայաստանում ներկայումս գրանցված է չինական կապիտալի մասնակցությամբ 41 ձեռնարկություն:

Տ.Դավթյանը նշեց, որ երկու երկրների քաղաքական համագործակցության մակարդակը բարձր է։ «Մեր նպատակն է երկու երկրների առևտրատնտեսական հարաբերությունները նույնպես դնել բարձր մակարդակի վրա»,-ասաց Տ. Դավթյանը` հավելելով, որ օրենսդրորեն ստեղծված են բոլոր պայմանները, մեր օրենքները համապատասխանում են միջազգային չափանիշներին, ուստի տնտեսական համագործակցության համար բավականին լավ հիմքեր կան:

Չինաստանի Կոմունիստական կուսակցության կենտրոնական կոմիտեի քաղաքական բյուրոյի մշտական անդամ Լի Չանչունի խոսքերով, թե Չինաստանը, թե Հայաստանը բարեհաջող դիմակայել են համաշխարհային ֆինանսատնտեսական ճգնաժամը և հետճգնաժամային փուլում սկսել են տնտեսական աճ ապահովել։ Ըստ նրա, թեև Չինաստանը համարվում է Հայաստանի առևտրային գործընկերից առաջինը, սակայն հաշվի առնելով երկու երկրների ներուժը, կատարված աշխատանքը դեռևս բավարար չէ։ Լի Չանչունը խոստացավ, որ չինական կողմը հատկապես կաջակցի Հայաստանից արտահանման գործընթացին։

«Երեկ ես Հայաստանի նախագահի հետ հանդիպմանը պատիվ ունեցա խմելու «Արարատ» կոնյակը։ Այն լավ կոնյակ է, բայց ցավոք, չինական շուկայում այսօր այն չես գտնի։ Հույս ունեմ, որ ձեր ներկայացուցիչները կգան Չինաստան ու կգովազդեն ձեր կոնյակը, չին գործընկերներն էլ նրանց կօգնեն այդ հարցում»,– ասաց նա՝  հավելելով, որ շատ է հավանել նաև հայկական խաղողի համը։