Ձեր վստահելի աղբյուրը

Այսօրվանից մեկնարկում է ՀՀ վարչապետի հովանու ներքո ստեղծված Տեղեկատվական տեխնոլոգիաների (ՏՏ) ոլորտի կառավարիչների (մենեջերների) ամենամյա մրցույթը: Ինչպես այսօր լրագրողների հետ հանդիպման ժամանակ հայտնեց «Սինոփսիս Արմենիա» ՓԲԸ տնօրեն Հովիկ Մուսայելյանը, մրցանակաբաշխության նպատակն է աջակցել Հայաստանի ՏՏ ոլորտում առկա մենեջերների որակավորման բարձրացմանը, ինչպես նաև մենեջմենթի, աշխատանքի կազմակերպման բարելավմանը ` հանրապետության տարբեր ընկերություններում աշխատող մենեջերներին հնարավորություն տալով մասնակցել վերապատրաստման դասընթացների աշխարհի բարձր վարկանիշ ունեցող համալսարաններում:

Համաձայն մրցանակաբաշխության ծրագրի՝ յուրաքանչյուր տարեսկզբին կառավարության կողմից հայտարարվում է մրցույթ՝ ի հայտ բերելու ՏՏ ոլորտի ընկերություններում աշխատող լավագույն երեք մենեջերներին, ովքեր կմեկնեն արտերկրի տարբեր համալսարաններ՝ մենեջմենթի կուրսեր անցնելու:

Այս տարվա մրցույթի հաղթող երեք մենեջերները օգոստոսին 15-օրյա վերապատրաստման դասընթացներ կանցնեն ԱՄՆ Սթենֆորդի համալսարանում (Stanford Executive Institute): Ըստ Հ.Մուսայելյանի, Սթենֆորդի համալսարանը համաձայնել է ամեն տարի վերապատրաստման համար երեք տեղ հատկացնել հայ մասնագետներին, նաև կիրառել է զեղչեր։ Յուրաքանչյուր մասնակցի 15-օրյա վերապատրաստման կուրսի արժեքը 20 հազար դոլար է։ Սակայն, պայմանավորվածության համաձայն, երեք մասնագետի վերապատրաստման համար 50 հազար դոլար կվճարվի։ Նշենք, որ մրցանակաբաշխության նախաձեռնողը Սինոփսիս ընկերությունն է, հովանավորը` «ՎիվաՍել-ՄՏՍ»-ը, որն այս տարի հոգալու է մասնագետների վերապատրաստման ծախսերը` հատկացնելով ավելի քան 19 միլիոն դրամ:

Վարչապետի օգնական Վարդան Նիկոյանի խոսքերով, Հայաստանում ՏՏ ոլորտը կառավարության հոգացության և մասնավորի արդյունավետ աշխատանքի արդյունքում վերջին մի քանի տարիներին զարգացում է ապրել: Դրա ապացույցը, ըստ նրա, նաև այն է, որ համաշխարհային ֆինանսատնտեսական ճգնաժամի տարում Հայաստանում ՏՏ ոլորտը գրանցեց 17 տոկոս աճ: «Այսօր ակնհայտ է, որ առանց ՏՏ-ի անհնար է բարձրացնել ընդհանուր տնտեսական համակարգի արդյունավետությունը: Այս առումով էական դեր ունի տեղեկատվական տեխնոլոգիաների մասնագետների կրթական և վերապատրաստման համակարգը: Այս ծրագրի իրականացմամբ մենք զարգացնում ենք IT մենեջմենթի ոլորտը Հայաստանում: Արտերկրում վերապատրաստման հնարավորություն ստեղծելով մեծապես կօգնենք թե տեղական կազմակերպություններին, թե ընդհանուր ոլորտի զարգացմանը»,- ասաց Վ.Նիկոյանը:

«Այս նախաձեռնության նպատակն է մեր երկրի մրցակցային առավելության գրավական հանդիսացող ամենակարևոր ճյուղերից մեկում` ՏՏ ոլորտոմ, բարձրացնել կառավարման մակարդակը: Արդյունավետ կառավարումը մեր երկրի ապագա աճը պայմանավորող առանցքային գործոն է, հետևաբար մենք պարտավոր ենք աջակցել նման կարևորության ազգային նախագծին»,- ընդգծեց «ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանը:

Նշենք, որ մրցանակաբաշխությանը կարող են մասնակցել առավելագույնը 50 աշխատող ունեցող, Հայաստանում գրանցված տեղեկատվական տեխնոլոգիաների ոլորտի մինչև 40 տարեկան մենեջերները: Ընտրության ժամանակ հաշվի են առնվելու հավակնորդի կրթությունը, ղեկավարման փորձը, անգլերենի հմտությունները, ինչպես նաև կորպորատիվ սոցիալական պատասխանատվության ծրագրերում ներգրավվածությունը: Դիմումների վերջնաժամկետը ապրիլի 30-ն է:
Մրցույթին «ՎիվաՍել-ՄՏՍ»-ի և «Սինոփսիս Արմենիա»-ի աշխատակիցները չեն մասնակցի։