Ձեր վստահելի աղբյուրը

Голос Армении թերթը գրում է, որ հողի սակավության խնդիր ունեցող մեր հանրապետությունում կան տասնյակ հազարավոր հեկտար հողային տարածքներ, որոնք ոչ մի կերպ չեն օգտագործվում: Բացի այդ, Տավուշում չեն գործում «Բենտոնիտ», «Իմպուլս», «Իջևանի գորգերի» գործարանները: Նմանատիպ պատկեր է Հայաստանի այլ մարզերում:

Թերթը գրում է, որ Չարենցավան քաղաքը, որն իր արդյունաբերական պոտենցիալով կարող է 70 հազար բնակիչ պահել, ունեցած 25 հազար բնակչին էլ չի պահում. այսօր արդեն այնտեղ 19 հազարն են մնացել: Միևնույն ժամանակ, թերթը նշում է, որ կառավարությունը, կարծես թե, լրջորեն սկսել է զբաղվել այս խնդիրներով: Մասնավորապես` ԱԺ Բյուջետային և ֆինանսական հարցերով մշտական հանձնաժողովի նախագահ Գագիկ Մինասյանը հայտարարել է, որ չպետք է թույլ տալ, որ մարդկանց համար հողը վերածվի պարզապես անշարժ գույքի:

Թերթը հիշեցնում է, որ նման սեփականատերերի մասին խոսել է նաև երկրի ղեկավարը` նշելով, որ նրանք իրենց թաթը դրել են հողային տարածքների վրա: Հոդվածագիրը նշում է, որ սանկցիաներ պետք է կիրառել ոչ միայն նման հողատերերի, այլև արդյունաբերական հիմնարկների սեփականատերերի նկատմամբ, որոնք պարզապես կողպել են իրենց սեփականությունը և ոչ մի աշխատանք չեն իրականացնում արդյունաբերության ոլորտում: