Ձեր վստահելի աղբյուրը

Այս տարի Հայաստանում անցկացվելիք միասնական քննություններին կմասնակցի 1209 դիմորդ, ինչն անհամեմատ քիչ է, նախորդ տարվա համեմատ, քանի որ այս տարի դպրոցների շրջանավարտներ ընդհանրապես չկան: Այդ մասին այսօր լրագրողների հետ հանդիպման ժամանակ հայտարարեց ՀՀ ԿԳՆ Գնահատման և թեստավորման կենտրոնի Մշակումների և կազմակերպչական բաժնի պետ Կարո Նասիբյանը:

Նախորդ տարի միասնական քննություններին մասնակցել է 17 656 դիմորդ:

Նրա խոսքով, քննություն հանձնողների թվում հիմնականում նախորդ տարվա շրջանավարտներ են, անցյալ տարի մրցույթից դուրս մնացածներ, զորացրվածներ, ինչպես նաև Սփյուռքի մեր հայրենակիցներ: Դիմորդների թվում գերակշռող են երևանաբնակները` 320 դիմորդ, Արարատից 104, Արմավիրից` 108: Նասիբյանի համար զարմանալի էր, որ Վայոց ձորից դիմել է 66 մարդ, քանի որ այս մարզից դիմորդների քանակը սովորաբար քիչ է լինում: Ամենաքիչը Տավուշի մարզից են դիմել` 28 դիմորդ: Լեռնային Ղարաբաղից Հայաստանում քննություն կհանձնեն 80 դիմորդներ:

Դիմորդներից 609-ը, որը գերակշռող թիվն է, կհանձնեն քննություն Հայոց լեզու և հայ գրականություն առարկայից: 544 դիմորդ կհանձնի քննություն մաթեմատիկա առարկայից, 365 դիմորդ կհանձնի քննություն անգլերեն առարկայից, 300-ը` Հայոց պատմությունից, 294 դիմորդ էլ` ֆիզիկա առարկայից: Մյուս առարկաներից քննություն հանձնողների թիվը համեմատաբար քիչ է: