Ձեր վստահելի աղբյուրը

Ապրիլի 25-30-ը Իսպանիայում տեղի ունեցած ժողովրդական պարերի համաշխարհային մրցույթ-փառատոնում «Կարին» ազգագրական երգի ու պարի համույթը «Պար» անվանակարգում արժանացել է առաջին մրցանակի, իսկ «Երաժշտություն» անվանակարգում` 3-րդ մրցանակի:

Մրցույթի կանոնների համաձայն, «Կարինը» ներկայացրել է 8 րոպեանոց պար, որի մեջ ներկայացված են եղել հայկական պարերից ու ծեսերից հատվածներ: «Մրցույթին ներկայացվել էր հայկական պարերի ծաղկաքաղ, որի մեջ գլխավոր տեղում «Յարխուշտա» պարն էր: Այսինքն` այդ պարի մեջ և’ Վասպուրական, և’ Շատախ, և’ Կարին, և’ Սասուն կար: Մենք այդ 8 րոպեի մեջ ընդգրկել էինք ամբողջ հայկական լեռնաշխարհը, կարծում եմ` դա հայկական պարի հաղթանակն էր»,- այսօր լրագրողների հետ հանդիպման ժամանակ ասաց «Կարին» ազգագրական երգի ու պարի համույթի գեղարվեստական ղեկավար Գագիկ Գինոսյանը և հավելեց, որ հայկական պարն արժանացել է մրցույթի ժյուրիի և կազմակոմիտեի անդամների հիացմունքին:

«Մենք բավականին աժիոտաժ առաջացրեցինք, և բոլորի համար անակնկալ էր հայկական պարը: Բոլորը զարմացած էին, և թերևս ճիշտ կլիներ, որ վաղուց հայկական պարը նման համաշխարհային մրցույթներում ներկայացված լիներ, քանի որ աշխարհին առաջին հերթին պետք է ներկայանալ հենց ազգային մշակույթով»,- ընդգծեց Գ.Գինոսյանը:

Ըստ նրա, արդեն 25 տարի է, ինչ Իսպանիայում տեղի է ունենում այդ մրցույթ-փառատոնը, սակայն Հայաստանը մասնակցում էր առաջին անգամ: Մրցույթին մասնակցել են Իսպանիայում Հայաստանի արտակարգ և լիազոր դեսպան Խորեն Տերտերյանի նախաձեռնությամբ, այնուհետև երկար բանակցություններից հետո մրցույթի կազմկոմիտեի նախագահի կողմից ՀՀ մշակույթի նախարարությունը «Կարին» խմբի անունով մասնակցության հրավեր է ստացել:
Գ.Գինոսյանի խոսքերով, մշակույթի նախարարությունը միայն կեցության ծախսերն է հոգացել, իսկ ճանապարհածախսը` «Կարինի» ընկերները: Ըստ նրա, իրենք դիմել են տարբեր ատյանների, գործարարների, սակայն որևէ աջակցություն չեն ստացել: «Ցավալի է, որ մեր երկրում ինչ տեսակի համերգ ասես կազմակերպվում է բարձր հովանու ներքո, բայց ազգային մշակույթը «խորթ բարեկամի կարգավիճակում է»,- նշեց Գ.Գինոսյանը:

«Կարին» ազգագրական երգի ու պարի համույթի գեղարվեստական ղեկավարը տեղեկացրեց, որ պարային փառատոնին մասնակցել է նաև Թուրքիայի պետական ակադեմիական խումբը: Նրանք որևէ անվանակարգում որևէ մրցանակ չեն շահել, սակայն ստացել են մրցույթի Գրան-պրին, որը շատ շատերի համար անսպասելի էր: Մինչդեռ բոլորը սպասել են, որ Գրան պրիին արժանանալու է Հայաստանը:

Գ.Գինոսյանը նշեց, որ Իսպանիայում Հայաստանի դեսպանը նախօրոք զգուշացրել էր, որ այնտեղ շատ լուրջ թուրքամետ քաղաքականություն է տարվում, և «եթե որևէ բան զգաք` չզարմանաք»: Մրցույթի բացման օրվանից իսկ, ըստ նրա, թուրքական խմբի ղեկավարը շատ ջերմ հարաբերությունների մեջ էր կազմկոմիտեի նախագահի հետ:

Գ.Գինոսյանի խոսքերով, թուրքերի ելույթն ուղղակի Ցեղասպանության շարունակությունն էր, քանի որ խմբի երաժշտական մուտքը «Առնեմ էրթամ իմ յարը» երգի նվագակցության տակ էր, որը երգում է Արսեն Գրիգորյանը (Մրո), իսկ պարերը հիմնականում համշենահայերի պարերն էին: Նույնիսկ երաժշտական գործիքները թուրքական չեն եղել:

Գ.Գինոսյանը նաև նշեց, որ թուրքերի ելույթից հետո Իսպանիայում Հայաստանի դեսպանի կինը մոտեցել է թուրքական խմբին ու ասել. «Շատ շնորհակալ ենք ձեզ, որ հայկական պարը տարածում եք, պահպանում եք, շատ երախտապարտ ենք»: Մինչդեռ, ըստ Գ.Գինոսյանի, թուրքերը չեն կարողացել որևէ պատասխան տալ և լռել են: