Արտգործնախարարը հանդիպեց ԵՊՀ դասախոսների և ուսանողների հետ
Այսօր արտգործնախարար Էդվարդ Նալբանդյանը այցելեց Երևանի Պետական համալսարան, ուր հանդիպում ունեցավ մայր ԲՈւՀ-ի պրոֆեսորա-դասախոսական կազմի և տարբեր ֆակուլտետների ուսանողների հետ: Այս մասին տեղեկացնում են ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից:Հանդիպումը նախաձեռնել էր ԵՊՀ ուսանողական խորհուրդը` Հայաստանի Հանրապետության 20-ամյա տարեդարձի շրջանակներում:
Իր խոսքում Էդվարդ Նալբանդյանն ասաց.
«Սիրելի երիտասարդներ, ձեզ երևի թե հաճախ են ասում, որ դուք եք երկրի ապագան։ Դա պարզ ճշմարտություն է, և դրա վառ օրինակն է այն, որ հենց այս համալսարանի շրջանավատներն են հանդիսանում ԱԳՆ նորաստեղծ դիվանագիտական դպրոցի առաջին ունկնդիրներն ու շրջանավարտները, որոնց մի մասն արդեն անցել է դիվանագիտական ծառայության: Այս երիտասարդները, որ դեռ երեկ նստած էին ձեր ուսանողական նստարաններին, այսօր արդեն աշխատում են արտաքին գործերի նախարարությունում և վաղը կերտելու են մեր երկրի արտաքին քաղաքականությունը:
Դուք մոտավորապես նույն տարիքն ունեք, ինչ մեր նորանկախ պետությունը, որի քսանամյակը լրանում է այս տարի։ Դուք ծնվել եք մեր նորանկախ պետության հետ միասին և ինչքան էլ մեծանաք կունենաք մեր երկրի տարիքը։ Նրա հոգսերն ու հաջողությունները, դժվարություններն ու հաղթանակները կազմել են ձեր կյանքի, ձեր առօրյայի մասը։ Մաղթում եմ ձեզ հաջողություններ, ձեր հաջողությունները մեր երկրի հաջողություններն են լինելու:
Ես կարևորում եմ ուսանողության հետ արդեն ավանդական դարձած այսպիսի ձևաչափով շփումները, քանի որ այդ հանդիպումների ընթացքում հնարավորություն է ընձեռնվում ոչ միայն ներկայացնել Հայաստանի կողմից իրականացվող արտաքին քաղաքականությունը, այլև ծանոթանալ ձեր տեսակետներին»:
Հայաստանի արտաքին քաղաքական գերատեսչության ղեկավարը հանգամանալից ներկայացրեց արտաքին քաղաքականության հիմնական ուղղություններն ու առաջնահերթությունները, հարաբերությունները տարբեր երկրների հետ և դրանց ընդլայնման ուղղված քայլերը, միջազգային բեմահարթակում ընթացող գործընթացների վերաբերյալ Հայաստանի դիրքորոշումները, արտերկրում Հայաստանի և նրա քաղաքացիների շահերի պաշտպանության ուղղությամբ իրականացվող աշխատանքները:
Նախարար Նալբանդյանը մանրամասնորեն անդրադարձավ ղարաբաղյան հիմնախնդրի կարգավորման գործընթացին և պատասխանեց ուսանողների բազմաթիվ հարցերին:
Լրահոս
Տեսանյութեր
Քաղաքապետարանը գործնականում թալանում է երևանցիներին. Չախոյան
