Ձեր վստահելի աղբյուրը

Մայիսի 15-ին, ժամը 18:00 «Միկա» սպորտային համալիրում տեղի կունենա 5-րդ IT CUP ֆուտզալի մրցաշարի եզրափակիչ խաղը` Beeline եւ Questrade/Epress.am թիմերի միջև: Նույն օրը, ժամը 17:00-ին դրան կնախորդի երրորդ տեղի համար խաղը, որտեղ կմրցեն Synopsys SEG եւ Mentor Graphics թիմերը:

Խաղի ավարտին գավաթներ և մեդալներ կստանան Առաջին, Երկրորդ և Երրորդ տեղ գրաված թիմերը:

Նախորդած շուրջ երկուսուկես ամիսներին մրցաշարը հարուստ է եղել հետաքրքրական խաղերով ու թեժ մրցապայքարով: Մրցանակներ են սահմանված լավագույն խաղացողի, պաշտպանի, դարպասապահի, ռմբարկուի և անփոխարինելի խաղացողի համար: Առաջին երեք անվանակարգում հաղթողներն ընտրվել են բոլոր թիմերի կողմից նախապես կատարված ընտրության արդյունքում: Այսօրվա դրությամբ լավագույն ռմբարկուների տասնյակը գլխավորում է Questrade/Epress.am թիմի խաղացող Դավիթ Նազարյանը, ով 28 գոլի հեղինակ է եւ մրցակիցներից առաջ է 10 միավորով:

Արդեն 5-րդ անգամ Հայաստանի տեղեկատվական տեխնոլոգիաների (ՏՏ) ոլորտի ընկերությունների միջև անցկացվող IT CUP ֆուտզալի մրցաշարն այս տարիների ընթացքում ընդլայնել է մասնակից թիմերի քանակը` 16-ից հասնելով 28-ի: Այս տարի մասնակիցների շարքում էին նաև հեռահաղորդակցության և լրատվական ընկերությունների ՏՏ ստորաբաժանումների թիմեր:

IT CUP ֆուտզալի մրցաշարը դարձել է ավանդական և կազմակերպվում է 2007 թվականից: Մրցաշարի անցկացման գլխավոր նպատակն է խթանել ակտիվ և առողջ ապրելակերպը ՏՏ ոլորտի ներկայացուցիչների շրջանում, ինչպես նաեւ հնարավորություն ընձեռել Հայաստանի ՏՏ մասնագետներին ծանոթանալ և իրական կյանքում շփվել միմյանց հետ:

Մասնակից ընկերություններն են` Synopsys Armenia (4 թիմով), HyLink, Mentor Graphics, Innova, AltaCode, Instigate Design, Firmplace, Credence Systems Armenia, Boomerang Software, Synergy International Systems, Virtual Solution Global Services, Rutel Armenia (former MDS), NairiSoft, Web.am, Macadamian Technologies, Mer Soft, Lsoft, Questrade, Epress.am, YeTRI (Yerevan Telecommunication Research Institute), Unicomp, Epygi, VivaCell-MTS (IS), Beeline (ITM), SCDM, GNC-Alfa.

Առաջնության մասնակից 28 թիմերի միջև 100 խաղ տեղի ունեցավ:

Առաջնության գլխավոր կազմակերպիչը Սինոփսիս Արմենիա ընկերությունն է, առաջնության գլխավոր հովանավորը` «Cross» սպորտային համալիրը, գլխավոր սպորտային տեղեկատվական հովանավորը` www.totalfootball.am-ը, իսկ տեղեկատվական հովանավորները` www.epress.am-ը, www.haynews.am ը, www.newsarmenia.am-ը, http://telecom.arka.am-ը:

Այս մասին տեղեկացնում են «Սինոփսիս Արմենիա»-ի լրատվական ծառայությունից: