Ձեր վստահելի աղբյուրը

«Հայաստանի պատվիրակության այցը Վրաստան, չնայած մեր վրացական գործընկերների կողմից Բիզնես ֆորումի անցկացման հետ կապված կազմակերպչական որոշ բացթողումների, եղավ հաջողակ և ունեցավ մի շարք դրական արդյունքներ»,-նման կարծիք Panorama.am-ի հետ զրույցում հայտնեց UITE EXPO-ի տնօրեն Վահան Հովսեփյանը՝ ամփոփելով Վրաստանում տեղի ունեցած Հայ-Վրացական ՏՏ Բիզնես Ֆորումը։

Վահան Հովսեփյանի փոխանցմամբ, հայկական պատվիրակության մեջ ներկայացված էր 35 մասնակից` 17 ընկերություններից, ինչպես նաև ՀՀ Սփյուռքի Նախարարությունը։
«Հանդիպումների ընթացքում քննարկվել են վրացական ընկերությունների հետ շահավետ համագործակցության հաստատման և համատեղ տենդերների մասնակցության հարցերը: Ֆորումի ժամանակ հայկական ՏՀՏ ընկերությունները ներկայացրել են նաև իրենց ՏՀՏ լուծումները, քննարկել են համատեղ բիզնես համաժողովներ անցկացնելու հեռանկարները»,-նշեց UITE EXPO-ի տնօրեն Վահան Հովսեփյանը:

Հայ-Վրացական ՏՏ Բիզնես Ֆորումի ընթացքում մեծ ծավալի աշխատանք են կատարել Հայկական Ծրագրեր ընկերության ներկայացուցիչները ՝ թե իրենց ընկերության գործնական խնդիրները լուծելու, թե` գործնական ներկայացումներով հայկական պատվիրակության կողմից լուրջ և հիմնարար մոտեցում ներկայացնելու գործում:

«Գործարար հանդիպումներ ունեցան նաև Westsoft, Memcosoft, Smart-Tech ,Grant Thornton Georgia, Lime-Tech, Altacode, SouthTech Consulting, Inc., Նորք Տեղեկատվական-Վերլուծական Կենտրոն, SFL ընկերության ներկայացուցիչները:
Ինչպես միշտ այցը նաև հնարավորություն ստեղծեց հայկական պատվիրակության մեջ ներառված ընկերությունների միջև երկխոսության հաստատման, ընդհանուր շահերի կարևորման և թիմային աշխատանքի համար»,- տեղեկացրեց UITE EXPO-ի տնօրեն Վահան Հովսեփյանը:

Վահան Հովսեփյանի փոխանցմամբ, նախնական պայմանավորվածություն ձեռք բերվեց վրացական մի շարք ընկերությունների, պետական մարմինների ներկայացուցիչների հետ կազմակերպել վրացական կողմի մասնակցությունը Digitec Business Forum-ին, ներառելով վրացական պատվիրակության կազմի մեջ Վրաստանի հատուկ տնտեսական գոտիների, Էլ. Կառավարման գործընթացները համակարգող պետական կառույցների, բիզնես ոլորտի ներկայացուցիչներին: