Ձեր վստահելի աղբյուրը

«Կարծում եմ, ռազմական գործողությունների վերսկսման հավանականություն կա, որովհետև ոչ մի կերպ չեմ կարողանում հասկանալ, թե ինչու է Ադրբեջանը ձգձգում բանակցային գործընթացը»,-«Մոսկովսկիե նովոստի» թերթի հարցին, արդյոք իրական ռազմական գործողությունների վերսկսման ռիսկը մե՞ծ է, նման պատասխան է տվել ՀՀ նախագահ Սերժ Սարգսյանը: Նրա խոսքով, մեծ ուժերի ու միջոցների կուտակմամբ, հավանաբար, ծրագրեր կան, որ փորձեն հարմար պահի նոր ռազմական արկածախնդրություն սանձազերծել:

«Դա ճիշտ մոտեցում չէ, որովհետև իրադարձությունները կարող են զարգանալ երկու սցենարով: Առաջինը` տոտալ պատերազմ ու Լեռնային Ղարաբաղի հետագա օկուպացիա, որը հնարավոր է միայն Լեռնային Ղարաբաղի ժողովրդի ամբողջական բնաջնջման դեպքում: Եվ երկրորդ` Ադրբեջանի պարտություն, նոր տարածքների կորուստ: Այդ դեպքում Ադրբեջանը արդեն կսկսի բողոքել ևս հինգ, վեց կամ ավելի մեծ թվով շրջանների կորստից: Իսկ հետո՞: Կրկին հաշտություն, համաձայնագիր, հրադադարի ռեժիմի խախտումներ, նոր պատերազմ… Այս բոլոր սցենարներն անհեռանկար են»,-ասել է երկրի ղեկավարը:

Հարցին, թե ձեր կարծիքով, վերջերս Հարավային Կովկասում երկու նոր պետությունների ձևավորումն ազդեցություն կունենա՞ ղարաբաղյան հակամարտության կարգավորման վրա, Ս. Սարգսյանն ասել է, որ Ղարաբաղյան հիմնախնդիրը բոլոր նմանատիպ հիմնախնդիրներից տարբերվում է:
«Ընդհանարպես այդ բոլոր հակամարտությունները յուրօրինակ են, նրանցից յուրաքանչյուրն ունի իր առանձնահատուկ պատճառները, հետևանքները, զարգացման դինամիկան: Որպես նախադեպ, իհարկե, աշխարհում նոր պետությունների կայացումը դրական է ազդում Լեռնային Ղարաբաղի ժողովրդի իրավունքի միջազգային ընկալման վրա: Եվ հարցն ամենևին էլ այն չէ, թե մենք ճանաչո՞ւմ ենք Կոսովոյի, Հարավային Սուդանի, Աբխազիայի կամ Հարավային Օսիայի պետական ինքնիշխանությունը, այլ այն, որ միջազգային հանրությունը տարբեր դասավորությամբ ընդունում է, որ այս կամ այն պայմանների առկայության դեպքում անջատումը ինքնորոշման իրավունքի իրացման իրավաչափ ձև է»,-շեշտել է Նախագահ Սարգսյանը:

Ինչ վերաբերում է Հայաստանի կողմից ԼՂ անկախության ճանաչման հնարավորության դիտարկման վերաբերյալ հարցին, ապա Ս. Սարգսյանը նշել է, որ Հայաստոնը չի կարող նման հնարավորություը չդիտարկել:
«Օրինակ, այն իրապես կարող է ծագել ռազմական գործողությունների վերսկսման դեպքում: Ամեն անգամ տալիս են այլ, առավել ուղիղ հարց. «Ինչո՞ւ Հայաստանը չի ճանաչում Լեռնային Ղարաբաղի անկախությունը»: Որովհետև մենք բանակցություններ ենք վարում, իսկ Լեռնային Ղարաբաղի ճանաչումը կնշանակի դրանց տապալում: Բոլոր դեպքերում ավելի լավ է բանակցել»,-ասել է ՀՀ նախագահը: