Ձեր վստահելի աղբյուրը

Միջին մասնագիտական կրթության ոլորտի խնդիրներին, այսօր լրագրողների հետ հանդիպման ժամանակ, անդրադարձավ ԿԳ փոխնախարար Արա Ավետիսյանը։

Բանախոսի փոխանցմամբ, կրթության ոլորտում բարեփոխումները նախարարությունը սկսել է հանրակրթության ոլորտից:
«Բարեփոխումների ծրագրում ընդգրկվել են 12 քոլեջներ, որոնք արդեն վերանորոգվել են և կահավորվում են: Դրանք իրականացնում են միջին մասնագիտական կրթություն, ինչպես նաև վերապատրաստում` աշխատաշուկայի պահանջարկի հիման վրա»,- նշեց փոխնախարարը։

Արա Ավետիսյանը նաև տեղեկացրեց, որ առաջիկա երկու տարիների ընթացքում նախնական և միջին մասնագիտական ուսումնական հաստատությունները կհանձնվեն նախարարության ենթակայությանը, որի նպատակը պատվերի բովանդակային ձևավորումն է, որպեսզի պատվիրատուն և կատարողը փոխկապակցված աշխատեն և վերահսկվեն:
«Այս տարվանից նախնական և միջին մասնագիտական ուսումնական հաստատությունների համար ընդունելության առանձին քննություններ չեն անցկացվի: Շրջանավարտը միասնական կամ ավարտական քննություն հանձնելու դեպքում, հնարավորություն կստանա նաև մասնակցել քոլեջների ընդունելությանը»,-տեղեկացրեց Արա Ավետիսյանը։

ԿԳ փոխնախարարի կարծիքով. մեր հասարակության մեջ դեռևս գերիշխում է այն մտածելակերպը, որ բարձրագույն կրթություն ստանալը շատ ավելի հեղինակավոր է, քան միջին կամ նախնական լավ մասնագիտությունը:
«Մենք պետք է հասնենք նրան, որ աշխատաշուկայում միջին մասնագիտական որակավորման լավ մասնագետն իսկապես պահանջարկ ունենա: Այդ դեպքում մենք չենք ունենա այն պատկերը, որ համալսարանական կթություն ստացած ֆիզիկոսը ստիպված զբաղվում է որևէ տեխնիկական աշխատանքով կամ շուկայում որևէ իր է վաճառում։ Մենք կարծում ենք, որ այս խնդրի կարգավորումը ժամանակի խնդիր է»,-նշեց ԿԳ փոխնախարար Արա Ավետիսյանը։