Ձեր վստահելի աղբյուրը

«Վերջին տարիների համեմատաբար սառած հարաբերությունները շատ արագ կջերմանան», - հայտարարել է Հայաստանի գյուղատնտեսության նախարար Սերգո Կարապետյանը Արցախի վարչապետ Արա Հարությունյանի հետ հանդիպման ժամանակ:
Գյուղնախարարության լրատվական ծառայության փոխանցմամբ, Սերգո Կարապետյանը վստահեցրել է, որ չնայած նախարարի պաշտոնում ինքն առաջին անգամ է լինում Արցախում, բայց բավականաչափ տեղեկացված է համակարգում իրականացվող գործընթացներին և խնդիրներին:

«Եթե մեզ մոտ դրական միտումներ կան նորարարությունների, առաջավոր փորձի արմատավորման տեսանկյունից, ապա ամեն կերպ պետք է նպաստենք դրանք ԼՂՀ –ում ներդնելուն կամ այն ամենն, ինչ ուսանելի է այստեղ, իսկ դրանում անասնապահական համալիրներ, մեքենատրակտորային կայան, գյուղմթերքների վերամշակման արտադրամասեր կատարած այցելությունների ընթացքում բազմիցս համոզվեցի, ինքներս պիտի արմատավորենք մեր մոտ», - ասել է Սերգո Կարապետյանը: Կարևորվել է երկու երկրների գերատեսչությունների աշխատակիցների ու ոլորտի մասնագետների փոխայցելությունները, Սերգո Կարապետյանը պատրաստակամություն է հայտնել աջակցելու ցանկացած հարցում և անմիջապես արձագանքելու մտոհոգող խնդիրներին:
«Այսուհետև մեր հարաբերությունները պետք է լինեն շատ սերտ, ամենօրյա, փորձենք ծագած հարցերին օպերատիվ լուծումներ տալ, որպեսզի ամենաբարդ իրավիճակներում կարողանանք պատվով դուրս գալ», - նշել է նա:

Արցախ կատարած այցի ընթացքում ՀՀ գյուղատնտեսության նախարարը եղել է ԼՂՀ գյուղի և գյուղատնտեսության աջակցության հիմնադրամում, այցելել նոր կառուցվող հանրապետական անասնաբուժական լաբորատորիա, գյուղմթերքների վերամշակմամբ զբաղվող «Արցախֆրութ», անասնապահական «Տոհմային կայան» ՓԲԸ -ներ, Ասկերանի շրջանի Խրամորթ համայնքում տեղակայված «Ագրոտնտեսություն թիվ 1» մեքենատրակտորային կայան, շրջել ցանքատարածքներում, ինչպես նաև ծաղիկներ դրել Եղբայրական հուշահամալիրին: