Ձեր վստահելի աղբյուրը

«Մոտենում է երեխաների իրավունքների պաշտպանության օրը` հունիսի 1-ը: Բոլորս խոսքերով ու կենացներով անչափ կարևորում ենք մեր երեխաների կյանքի, առողջության, կրթության իրավունքների պաշտպանության գործը և դրանցից յուրաքանչյուրի համար պատասխանատու պաշտոնյայից պահանջում ենք պատշաճ ու անվնաս գործունեություն:
Երեխան պետք է մեծանա ընտանիքում, պարուրված լինի ջերմությամբ ու հոգատարությամբ, ընդունված լինի շրջապատի կողմից, լինի կուշտ ու ապրի ամեն առումով տաք միջավայրում, այս պայմանների գոյությունից հետո միայն կարող է ապահովվել երեխայի պարտադիր հիմնական կրթության սահմանադրական իրավունքը: Այսօր հատկապես ուզում եմ սևեռվել մեր երեխաների ստացած կրթության վրա»,-սա մեջբերում է «Ժառանգություն» խմբակցության անդամ Անահիտ Բախշյանի հայտարարությունից, որը հեռարձակվելու է Հանրային հեռուստաընկերության «Խորհրդարանական շաբաթ» հաղորդման շրջանակներում` մայիսի 29-ին:

Բախշյանի խոսքով, արդեն 2 տարի է, որ Հայաստանում առկա է գիտելիքների գնահատման անկախ կենտրոն, որի հրապարակած ընթացիկ արտաքին գնահատման արդյունքների ցածր մակարդակը լրջորեն հուզում է հանրությանը:

Վերոնշյալ կենտրոնի կողմից տարբեր դասարաններում, տարբեր առարկաներից անցկացված ընթացիկ գնահատումները ցույց տվեցին, որ դպրոցներում պետական չափորոշիչներին համապատասխան գիտելիքների գնահատումը օբյեկտիվորեն չի կատարվում, որովհետև մատյաններում աշակերտների կիսամյակային ու տարեկան գնահատականները նշանակալիորեն բարձր են անկախ կենտրոնի ընթացիկ գնահատման արդյունքներից:

«Կոծկելու համար հրապարակված այս փաստը` որոշ շահագրգռված տնօրեններ, ուսուցիչներ, այդ տարիքի երեխաներ ունեցող նույնիսկ կրթության ոլորտի տարբեր պաշտոնյաներ, փորձում են տարբեր տեսակի ճնշումներով, անօրինական ճանապարհներով նախապես ձեռք բերել թեստերը և, կեղծելով քննությունների ընթացքը, ուզում են կոծկել իրենց անարդյունավետ գործունեությունը:

Նման ապօրինություններ նախաձեռնող այն քաղաքացիները, ովքեր որպես ուսուցիչ, տնօրեն կամ պաշտոնյա գործ ունեն մեր երեխաների կրթության կազմակերպման գործընթացի հետ, չարիք են հասարակության համար, նրանք իրենց կերպարով վարկաբեկում են կրթությունն ու որպես դրա ամենավտանագավոր հետևանք` վարկաբեկում են պետությ ունը:
Հասարակությունը տեղյակ է, որ նախորդ տարիներին հիմնական դպրոցի ավարտական քննությունների օրերին որոշ հանցավոր տարրերի միջոցով տեղի է ունեցել քննական թեստերի արտահոսք:
Հունիսի 1-ից սկսվում են հիմնական դպրոցի ավարտական քննությունները: Այս տարի նման հանցագործությունը կանխելու նպատակով` իրականացվող միջոցառումների մասին վարչապետինն ուղղված իմ նամակին ի պատասխան` սույն թվականի մայիսի 18-ին կառավարությունը հայտնել է, որ ավարտական քննությունների թեստերի տպագրության ու փաթեթավորման ընթացքին հետևելու են ոստիկանության և ՀՀ կառավարությանն առընթեր ազգային անվտանգության աշխատակիցները:

Անձամբ լինելով Գիտելիքների գնահատման ու թեստավորման կենտրոնում` համոզվել եմ, որ թեստերի գաղտնիությունն ապահովելու համար այնտեղ արվածը բավարար է, սակայն իրենցից դեռևս վտանգ են ներկայացնում այն ՙվայ՚ ուսուցիչները, տնօրեններն ու պաշտոնյաները, ովքեր տարբեր ձևերով շարունակում են փորձել ձեռք բերել քննական թեստերը:

Այս պահին թեստերի ապահով փաթեթավորված տուփերը գտնվում են բանկերում, որտեղից դպրոցների տնօրենները կստանան փակ ծրարներ: Դրանց վրա գրված կլինի դպրոցը, առարկայի անվանումը, տվյալ առարկայի քննությանը մասնակցող աշակերտների թվով թեստերը, որոնք աշակերտների ներկայությամբ տնօրենները բացելու իրավունք ունեն քննությունից ընդամենը 15 րոպե առաջ: Չխախտե°ք այս պայմանը: Հասարակությունը մտահոգված է բոլոր տեսակի քննությունների օբյեկտիվ արդյունքներով»,-ասված է հայտարարության մեջ: