Ստամբուլի «Ժամանակ» հայալեզու օրաթերթը 100 տարեկան է
Այս տարի լրանում է Ստամբուլում լույս տեսնող «Ժամանակ» հայալեզու օրաթերթի գործունեության հարյուրամյակը:
Օրերս Ստամբուլից Երևան եկած «Ժամանակ» օրաթերթի գլխավոր խմբագիր Արա Գոչունյանը «Ermenihaber.am» (Էրմենիհաբեր) լրատվական կայքի թղթակցի հետ զրույցում ընդգծել է, որ «Ժամանակ» թերթն ամենահինն է Թուրքիայում անընդմեջ լույս տեսնող և առհասարակ աշխարհի հայկական օրաթերթերի մեջ, ինչպես նաև ազգային փոքրամասնություններին պատկանող թերթերի մեջ:
Ժամանակ»-ն իր հարյուրամյա շարունակականությամբ արդեն իր ուրույն տեղն ունի Թուրքիայի ու հատկապես պոլսահայության մշակույթում, կենցաղում և ավանդույթներում:
«Թերթն արդեն մուտք է գործում իր գործունեության երկրորդ հարյուրամյակ: Բնականաբար, նոր պայմաններ ու հանգամանքներ են ի հայտ գալիս: Օրինակ, եթե աչքի առնենք թերթի հարյուրամյա պատմության մարամասները, ապա կտեսնենք, որ ամեն ժամանակաշրջան ունի իր առաջնահերթությունները, իր օրախնդիր հարցերը և իր հետաքրքրությունների շրջանակը: Այս ամենը աստիճանաբար փոփոխվում է: Գլոբալիզացիայի արդյունքում հետզհետե փոքրացող և ավելի թափանցիկ դարձող աշխարհում, բնականաբար, նման թերթի առաքելությունը ևս իր հետ փոփոխություն է բերում ապագային վերաբերվող ծրագրերում»,- նշում է Արա Գոչունյանը:
Անդրադառնալով հայ-թուրքական հարաբերություններին` Գոչունյանը նշեց, որ Հարավային Կովկասի տարածաշրջանը գլոբալիզացիայի ենթարկվող աշխարհում շատ զգայուն մի կետ է, և այդտեղ Թուրքիայի ու Հայաստանի կողք-կողքի գտնվելը, հայ-թուրքական հարաբերությունների հեռանկարները թե տարծաշրջանային և թե համաշխարհային տեսակետից բարձրացնում են Թուրքիայի հայ համայնքի կարևորությունը:
«Թուրքիայի հայ համայնքն այսօրվա պայմաններում պաշտպանողական մեծ ներուժ ունի և հայ-թուրքական հարաբերությունների կարգավորման հարցում իր ավանդույթներով և հնարավորություններով կարող է կարևոր դերակատարում ունենալ: Այս պահին Թուրքիայի հայ համայնքը մի քիչ սպասողական, մի քիչ էլ պաշտպանողական դիրքերում է և փորձում է շարունակել իր կենսակերպը: Նրանք նախընտրել են պահպանել իրենց ինքնությունն ու մայրենի լեզուն` ջանալով միևնույն ժամանակ հակասություն չմտցնել թուրքական քաղաքացիության և հայկական էթնիկ պատկանելության միջև: Ահա այդպես են շարունակում ապրել»,-պատմում է Գոչունյանը:
Նշենք նաև, որ թերթի հոբելյանական տարեթվի կապակցությամբ միջոցառում էր կազմակերպվել Երևանի «Թեքեյան մշակութային կենտրոն»-ում, որի ժամանակ տեղի ունեցավ Միսաք Գոչունյանի «Կրակին մէջէն» վեպի շնորհանդեսը:
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
