Ձեր վստահելի աղբյուրը

«Գումի շուկայի հարակից մսի «պասաժի» քսանից ավելի վաճառակետերի կասեցումը եղել է օրենքի սահմաններում»,- լրագրողների հետ հանդիպման ժամանակ հայտարարեց ՀՀ ԳՆ Սննդամթերքի անվտանգության պետական ծառայության պետ Գրիգոր Գրիգորյանը` հավելելով, որ կրպակների գործունեությունը եղել է մի շարք օրենքների խախտմամբ, իսկ կրպակները չեն փակվել, այլ` յոթ օրով կասեցվել է դրանց աշխատանքը:

Գ.Գրիգորյանը Գումի շուկայի հարակից տարածքում մսի վաճառքի վիճակը բնորոշեց պայթյունավտանգ:

Հիշեցնենք, որ օրեր առաջ Սննդամթերքի անվտանգության պետական ծառայությունը ստուգայցեր էր կազմակերպել մսի պասաժի վաճառակետեր ու սանիտարահիգիենիկ պայմանների խախտումներ հայտնաբերել: Արդյունքում շուրջ երկու տասնյակ վաճառակետեր փակվել էին:

Գ. Գրիգորյանի խոսքերով, մսի ստուգումների արդյունքում պարզվել է, որ մսի մեջ հայտնաբերվել են աղիքային ցուպիկներ, որոնք մարդու առոջության համար լուրջ վտանգ են ներկայացնում: Նա ընդգծեց, որ նախկինում ևս ստուգումներ և խախտումներ են եղել, սակայն վտանգի աստճանի մասին որևէ բան չցանկացավ ասել:

ՀՀ ԳՆ Սննդամթերքի անվտանգության պետական ծառայության պետը տեղեկացրեց նաև, որ դեռ անցյալ տարի որոշ կրպակներ կասեցումից հետո խախտել և բացել են իրենց կրպակները` հույսը դնելով այն մարդկանց վրա, ովքեր կարող են պաշտպանել իրենց խախտումը: Ըստ Գ. Գրիգորյանի, իրենք պլանավորում են քաղաքային իշխանությունների հետ ավելի քաղաքակիրթ տարբերակ մտածել` մսի վաճառքի համար: Նա նաև ասաց, որ չի բացառվում`դիմեն նաև Երևանի քաղաքապետարան, որպեսզի այդ տարածքում ընդհանրապես արգելվի մսի առևտուրը:

«Մսի առևտուր անող քաղաքացիներին այս կերպ տանում ենք նրան, որ հարգեն հասարակ ժողովրդին և նրանց առողջության հետ խաղ չանեն, բարելավեն իրենց տարածքներում սանիտարահիգիենիկ վիճակը»,- ասաց Գ. Գրիգորյանը` հավելելով, որ դա չի նշանակում` այս գործընթացը տարվում է դեպի «սուպերմարկետայնացմանը»: