Ձեր վստահելի աղբյուրը

«Հազար տարվա կարոտ ունի իմ երազը հազարաթև, ա~խ թեկուզ լուռ, դեռ ավերակ , տեսնեմ Անին ու նոր մեռնեմ»,- երգում է ստամբուլահայ երգչուհի Սիբիլ Փեքթորոսօղլուն և գերում հազարավոր թուրք ու հայ ունկնդիրների սրտեր:
Հայազգի Սիբիլը ծնվել ու ապրում է Ստամբուլում: Նրա կատարմամբ` «Նամակ» հայերեն երգի տեսահոլովակն այսօր ցուցադրվում է թուրքական առաջատար երաժշտական հեռուստաալիքներով և հնչում Ստամբուլի ձայներիզների վաճառասրահներում:

Հայազգի երգչուհին բացառիկ հարցազրույց է տվել «Ermenihaber.am» (Էրմենիհաբեր) լրատվական կայքի թղթակցին` պատմելով իր գործունեության մասին:
«Երգարվեստում առաջին քայլերս կատարել եմ Ֆերքյոյի հայկական եկեղեցուն կից Սուրբ Վարդանանց երգչախմբում: Թուրքիայում հայ երգարվեստի բնագավառն այդ ժամանակ սահմանափակ հնարավորություններ ուներ, այդ պատճառով էլ երգի հանդեպ ծարավս հագեցրեցի այդ երգչախմբում, որը մեծ ներդրում ունեցավ իմ երգարվեստի զարգացման մեջ»,- պատմում է Սիբիլը:

Նշենք, որ նախորդ տարի նոյեմբերին լույս էր տեսել նրա անունով «Սիբիլ» ալբոմը որտեղ նեռաված են «Տեր ողորմյա», «Կիլիկիա», «Տեսնեմ Անին ու նոր մեռնեմ» երգերը: Իսկ ալբոմի առաջին երգը «Նամակ»-ն է:

«Այս ալբոմը երկար տարիների իմ երազանքն էր: Միշտ փափագել եմ հայկական երգերից կազմված ձայներիզ թողարկել: Ինձ շատ հարազատ մարդկանց օգնությամբ վերջապես կարողացա այդ երազանքս ի կատար ածել:
Հարցին, թե արդյոք հայկական ծագման պատճառով Թուրքիայում խնդիրներ է ունենում իր ստեղծագործական կյանքում, Սիբիլը պատասխանում է. «Մինչև այսօր ոչ մի խոչընդոտի չեմ հանդիպել: Տեսաերիզի եթերային թողարկումից հետո բավականին շատ դրական արձագանքներ ստացա: Հայտնվեցին անհամար քանակությամբ մարդիկ , որոնք ասեցին, որ լսում են հայկական երաժշտություն ու սիրում այն»:

Խոսելով հայ մեծանուն բանաստեղծ Հովհաննես Շիրազի «Նամակ» ստեղծագործության խոսքերի հիման վրա գրված համանուն երգի արձագանքների մասին` Սիբիլը պատմում է, որ նույնիսկ շատերն ասում էին, որ թեև ոչ մի բառ չեն հասկանում, բայց երգը լսելիս անբացատրելի զգացումներ են ունենում:

«Նույնիսկ տեսահոլովակիս նկարահանման ընթացքում ողջ նկարահանող խումբը քթի տակ «Նամակ»ն էր մրմնջում: Շատ մարդիկ երգերիս բառերի լատինատառ տարբերակն էին խնդրում ինձանից, որպեսզի կարողանան ձայնակցել ինձ»,- պատմում է Ստամբուլը հայ երգով գերած երգչուհին:

Տաղանդավոր այս հայուհին վերջին անգամ Հայաստանում եղել է 2001 թվականին: Ծրագրել է նորից գալ մայր հայրենիք ու այս անգամ արդեն բեմ բարձրանալ հայաստանյան հանդիսատեսի համար:

Հարակից նորությունը`  Շիրազի բանաստեղծության խոսքերով երգը` թուրքական հեռուստաալիքների եթերում

Հարցազրույցը` Աստղիկ Իգիթյանի