Ձեր վստահելի աղբյուրը

Այսօր Հայաստանի ամերիկյան համալսարանում մեկնարկել է երկօրյա «ԲարՔեմփ Երևան- 2011» ոչ պաշտոնական կոնֆերանսը, որին մասնակցում են ՏՏ ոլորտի մոտ 500 մասնագետներ, ճարտարագետներ, ծրագրավորողներ, բլոգերներ, օն- լայն լրագրողներ և սոցիալական ցանցերի ակտիվիստներ:

«ԲարՔեմփ»- ի կազմակերպիչներից Սամվել Մարտիրոսյանը նշում է, որ ի տարբերություն ավանդական կոնֆերանսի՝ այստեղ օրակարգը ձևավորվում է մասնակիցների կողմից և վերջնական տեսք է ստանում միայն միջոցառման բացումից հետո։

«Մասնակիցները գրատախտակի վրա, ըստ ժամերի, դասավորում են իրենց զեկուցումների թեմաները։ Ամեն մի զեկույցի համար հատկացված է 30 րոպե: Մասնակիցներին տրամադրվել է 4 սրահ, որտեղ նույն պահին տեղի են ունենում զեկուցումներըը»,- նշում է Սամվել Մարտիրոսյանը։

Երկորյա կոֆերանսին հատուկ հյուրի կարգավիճակում զեկուցումներ են կարդալու նաև «Վիմպելկոմ»- ի ԱՊՀ երկրներում հասարակության հետ կապերի դեպարտամենտի ղեկավար Արտյոմ Մինաևը և հաղորդակցության մենեջեր Եկատերինա Տուրցևան, ռուսաստանցի հայտնի բլոգեր Դմիտրի Չերնիշևը (mi3ch), Օպերա Սոֆթվերը ներկայացնող Չարլզ ՄքՔեթիՆևիլը, Հոլանդիայից տեխնիկական և սոցիալական զարգացման մասնագետ Ադրիանուս Վերմենհովենը և ուրիշներ։

Հիշեցնենք, որ նախորդ տարի կազմակերպված երևանյան «ԲարՔեմփին» ներկա էին մոտ 400 մասնակիցներ Հայաստանից, Վրաստանից և Ռուսաստանից: Միջոցառումն ակտիվորեն լուսաբանվել էր ինտերնետ ԶԼՄ-ներով և հեռուստատեսությամբ:

Այս տարի մենք նախատեսվում է  հրավիրել մի շարք միջազգային ՏՏ ոլորտի ներկայացուցիչների, ինչը կապահովի էլ ավելի մեծ ուշադրություն հանրության և ԶԼՄ-ների կողմից:

Ինչպես նկատեցին «ԲարՔեմփ»- ի այս տարվա կազմակերպիչները, տարեց տարի ավելանում է համացանցի հայաստանյան ակտիվ օգտատերերի թիվը, և սա նշանակում է, որ հաջորդ հավաքին կգան ավելի շատ մասնակիցներ:

Հիշեցնենք, որ առաջին «ԲարՔեմփ»- ը կայացել է 2005 թ- ին ԱՄՆ-ում՝ Սիլիկոնային հովտում, և հետո լայն տարածում ստացել ամբողջ աշխարհում։ Այն նաև անվանում են չկոնֆերանս, քանի որ միջոցառումն անցնում է ոչ ֆորմալ մթնոլորտում, ինչը ապահովում է բաց քննարկումներ և մտքերի ազատ փոխանակում։
Առաջին Բարքեմփն անցկացվել է Փալո Ալթոյում, ԱՄՆ-ի Կալիֆորնիա նահանգում: Այդ ժամանակից ի վեր աշխարհի ավելի քան 350 քաղաքներում Բարքեմփեր են կազմակերպվել՝Հյուսիսային Ամերիկայում, Հարավային Ամերիկայում, Աֆրիկայում, Եվրոպայում, Միջին Ասիայում, Ավստրալասիայում և Ասիայում։