Ձեր վստահելի աղբյուրը

Հունիսի 24-25-ն Երևանում Ինֆորմացիոն տեխնոլոգիաների ձեռնարկությունների միությունը կանցկացնի ԴիջիԹեք բիզնես ֆորումը: Սա ամենամյա մի միջոցառում է, որի նպատակն է նպաստել տեղեկատվական տեխնոլոգիաների (ՏՏ) ներդրմանը տնտեսության այլ ոլորտներում: DigiTec բիզնես ֆորումի գլխավոր գործընկերն այս տարի «ԱրմենՏելն» է /ապրանքանիշը Beeline/, ֆորումի պաշտոնական գործընկերը` «Microsoft» ընկերությունը:

Ինչպես նշել է «Microsoft» ընկերության հայաստանյան գրասենյակի տնօրեն Գրիգոր Բարսեղյանը, ԴիջիԹեք բիզնես ֆորումի հետ համագործակցությունն արդեն ավանդույթ է դարձել: Այս համաժողովի շրջանակներում կանցկացվի նաև «Microsoft» ինովացիոն ֆորումը: Նշենք, որ այս տարի նշվում է «Microsoft»-ի` Հայաստան մուտք գործելու 5-ամյակը, և ԴիջիԹեք բիզնես ֆորումը շատ լավ հնարավորություն է ներկայացնելու Հայաստանում 5-ամյա գործունեության հաշվետվությունը:

Ըստ Գրիգոր Բարսեղյանի, տեղեկատվական տեխնոլոգիաներն այսօր անհրաժեշտություն են դարձել, ընդ որում` նաև առօրյա կյանքում: «Սթենֆորդի համալսարանը հետազորտություն էր կատարել պարզելու, թե որոնք են վերջին 30 տարվա ամենակարևոր այն նորարարությունները, որ ամենամեծ ազդեցությունն են ունեցել մարդկային քաղաքակրթության վրա: Հետազոտությունները ցույց են տվել, որ առաջին տասը տեղում ՏՏ նորարարություններն են համացանցը, բջջային հեռախոսը, օպտիկական մալուխները և այլն: Մի կողմից թվում է, թե ՏՏ-ն մի ոլորտ է, որ անմիջապես արտադրանք չի տալիս, սակայն ՏՏ-ի ազդեցությունը զարգացումների, աշխարհի վրա շատ ավելի մեծ է, քան որևէ այլ ոլորտի»,-ասում է նա:

Մասնագետի խոսքով, իրականում ՏՏ-ն է այն հզոր ուժը, որ փոխում է աշխարհը, որովհետև այն ավելի արագ և հասանելի է դարձնում ամեն ինչ: Արտադրությունները դառնում են ավելի արդյունավետ:

«Մենք այսօր ապրում ենք մրցակցային աշխարհում: Այս տեսակետից ՏՏ-ն լավագույն գործիքն է, որ կարողանում է օգնել դիմանալ մրցակցությանը: Հայաստանում այսօր ցանկացած կառույց այս կամ այն չափով կիրառում է տեղեկատվական տեխնոլոգիաները, այլ հարց է, թե որքանով արդյունավետ ու նպատակային են դրանք օգտագործվում: Հայաստանում բարենպաստ իրավիճակ է ստեղծվել. կառավարությունը ՏՏ-ն հայտարարել է գերակա ճյուղ: Մենք ունենք իրականում հզոր ՏՏ արդյունաբերություն, բայց ո՞ւմ է սպասարկում այդ արդյունաբերությունը: 80-90 տոկոսով սպասարկում է արտասահմանյան պատվերները: Նշանակում է` մենք ունենք հսկայական ներուժ, որն ավելի է զարգացնում այն երկրների ՏՏ ենթակառուցվածքները, որոնք արդեն իսկ սարսափելի զարգացած են: Եվ այդ երկրները հասկանում են, որ նույնիսկ այդ իրավիճակում պետք է շարունակեն ներդրումներ կատարել ՏՏ ենթակառուցվածքների, լուծումների ու տեխնոլոգիաների մեջ, որպեսզի պատրաստ լինեն ավելի արագ զարգացումների: Հայաստանում դեռևս չկա այդ ըմբռնումը: Հայաստանում, ցավոք, չունենք բնական պաշարներ, և մեզ համար մրցունակ լինելու միակ գրավականը երկրում արտադրողականության, էֆեկտիվության կտրուկ բարձրացումն է, երբ յուրաքանչյուր քաղաքացի կստեղծի մի քանի անգամ ավելի բարիք կամ արժեք, քան մեր մրցակից երկրները: Սա մրցունակ լինելու միակ ճանապարհն է»,- նշում է Գ. Բարսեղյանը:

DigiTec բիզնես ֆորումը և «Microsoft» ինովացիոն ֆորումը հենց այն միջոցառումների շարքից են, որտեղ տեղեկատվական տեխնոլոգիաների ոլորտի ներկայացուցիչները փորձում են ցուցադրել, ապացուցել իրենց առավելությունները: Ըստ Գ. Բարսեղյանի` մենք շատ հզոր ենք տեխնիկապես, ունենք լավ ավանդույթներ, մասնագետներ, բայց չունենք լավ շուկայագետներ, ներկայացնողներ, վաճառքի մասնագետներ, ինչը կարևոր է ցանկացած ինդուստրիայի համար, այդ թվում` տեղեկատվական տեխնոլոգիաների: Նման ֆորումները փորձում են լրացնել այդ բացը: