Ձեր վստահելի աղբյուրը

Հայաստանի Մշակույթի նախարարությունը կոլումբիացի հայտնի գրող Գաբրիել Գարսիա Մարկեսին Հայաստան այցելելու հրավերը պաշտոնապես ուղարկել է: Այդ մասին Panorama.am-ին տեղեկացրեց նախարարության լրատվական ծառայության ղեկավար Գայանե Դուրգարյանը:

Հիշեցնենք, որ նախարարությունն այս քայլին դիմեց ֆեյսբուքահայերի ակտիվ ճնշմամբ. նրանք սոցիալական ցանցում խումբ էին ստեղծել «Հրավիրենք Մարկեսին Հայաստան» անվանումով, որը նախարարությանը կոչ էր անում կոլումբիացի գրողին հրավիրել 2012-ին գրքի համաշխարհային մայրաքաղաք հռչակված Երևան:

«Հարգարժան նախարար, ինչպես տեղեկացված եք, ՅՈՒՆԵՍԿՕ-ի որոշմամբ 2012 թվականին Երևանը լինելու է գրքի համաշխարհային մայրաքաղաք: Այդ առիթով և ոչ միայն մենք ցանկանում ենք, որպեսզի Հայաստանը հյուրընկալի աշխարհահռչակ կոլումբիացի գրող, Նոբելյան մրցանակակիր Գաբրիել Գրասիա Մարկեսին: Մեր նախաձեռնության անդամների թիվն արդեն անցել է 2500-ի սահմանը: Սույն նամակով դիմում ենք Ձեզ՝ խնդրելով, որպեսզի Դուք և Ձեր գլխավորած ՀՀ Մշակույթի նախարարությունը պաշտոնական հրավեր ուղարկեք Գարսիա Մարկեսին», -ասված էր նախարար Հասմիկ Պողոսյանին ուղղված նախաձեռնող խմբի նամակում

Գրող, թարգմանիչ Վարդան Ֆերեշեթյանը նախաձեռնությունը դրական է գնահատում, բայց քիչ հույսեր ունի, թե Մարկեսը կհամաձայնի գալ Երևան: «Նրա առողջական վիճակը վերջին շրջանում վատացել է կարող է չգա: Բայց եթե գա, լավ կլինի: Հնարավոր է գա, որովհետև վերջերս Մոսկվա գնացել էր», -Panorama.am-ի թղթակցի հետ զրույցում ասաց թարգմանիչը:

Նա հետևել է Մարկեսի հարցարզույցներին և գիտե, որ կոլումբիացի հայտնի գրողը շատ է շփվել հայերի հետ: «Անգամ նրան ասել են` դուք հային շատ նման եք, նա էլ պատասխանել է, թե չի բացառվում, որ նախնիներիս մեջ հայեր էլ եղած լինեն», -Մարկեսի հարցազրույցից պատառիկներ փոխանցեց Վարդան Ֆերեշեթյանը` նկատելով, որ դա հաշվի առնելով Մարկեսը ցանկություն կունենա գալ Հայաստան, բայց արդյո՞ք ի վիճակի կլինի: