Ձեր վստահելի աղբյուրը

ՀՀ նախագահ Սերժ Սարգսյանն այսօր այցելեց Աջափնյակ համայնքում գտնվող «Թումո» ստեղծարար տեխնոլոգիաների կենտրոն, որի բացման արարողությունը կկայանա օգոստոսի 14-ին:

«Թումո»-ն ստեղծվել է Սեմ և Սիլվա Սիմոնյանների նախաձեռնությամբ, ովքեր այժմ բնակվում են Տեխասում: Նշենք, որ Սեմ Սիմոնյանը հանդիսանում է ԱՄՆ-ում գրանցված «Էփիջի Լէբս ԷյԷմ» ՍՊԸ-ի հիմնադիրը: «Էփիջի Լէբս ԷյԷմ»-ը սկսել է իր մասնաճյուղի գործունեությունը Հայաստանում 1997թ.-ին` զբաղվելով բարձր տեխնոլոգիաների ոլորտում ծրագրերի նախագծմամբ:

Գրեթե 3 տարի գործելով Հայաստանում, ընկերության տնօրենը գիտակցելով Հայաստանում բարձր տեխնոլոգիաների ոլորտի զարգացման անհրաժեշտությունը, առաջարկ է կատարում ՀՀ նախագահին 20 մլն ԱՄՆ դոլարի ներդրում կատարել տվյալ ոլորտի զարգացումը խթանելու համար: Հանրապետության նախագահը դրական է արձագանքում առաջարկին և ՀՀ կառավարությունը լիազորում է ՀՀ արտաքին գործերի նախարարին կառավարության անունից ստորագրել բարձր տեխնոլոգիաների զարգացման համար օտարերկրյա ներդրումների մասին պայմանագիրը: Պայմանագրով կողմերը ստանձնում են որոշակի պարտավորություններ, մասնավորապես` «Էփիջի Լէբս ԷյԷմ» ընկերությունը պարտավորվում էր 20 մլն դոլարի ներդրում կատարել` այդ գումարի շրջանակներում կատարելով նաև իրեն հատկացված տարածքի բարեկարգման աշխատանքներ, իսկ ՀՀ կառավարությունը պարտավորվում էր աջակցել և պաշտպանել ներդրումնային ծրագրի իրագործմանը և «Էփիջի Լէբս ԷյԷմ»-ին վարձակալությամբ հատկացնել 21.22 հա մակերեսով Թումանյանի անվան զբոսայգին:

Ընկերության կողմից իրականացվող մեծածավալ շինարարական աշխատանքների արդյունքում կառուցվել է 6 հարկից բաղկացած 20,792 քմ ընդհանուր մակերեսով տեխնոպարկի 1-ին մասնաշենքը: Չնայած պայմանագրով նախատեսվում էր ներդնել 20 մլն դոլար, սակայն մինչև 2010թ-ի ավարտը ընկերությունը ներդրել է մոտ 16,3 մլրդ.  դրամ, որը կազմում է շուրջ 43,5 մլն դոլար: Ներդրումները շարունակվելու են նաև այս տարվա ընթացքում:

Նշենք նաև, որ «Էփիջի Լէբս ԷյԷմ» ընկերության հիմնադիր-մասնակիցը 2009թ.-ին Հայաստանում հիմնադրել է Սիմոնյան կրթական հիմնադրամը, որի նպատակն է տեղեկատվական տեխնոլոգիաների կիրառման միջոցով իրականացնել կրթական ծրագրեր, երիտասարդությանը համաշխարհային տեխնոլոգիական ձեռքբերումներին ծանոթացնելու համար կազմակերպել և անցկացրել դասընթացներ, սեմինարներ և այլն:

Լրագրողների հետ զրույցում «Թումո» ստեղծարար տեխնոլոգիաների կենտրոնի տնօրեն Մարի Լու Փափազյանը նշեց, որ հիմնադրամի կողմից Թումո կենտրոնի ծրագրերն իրականացվելու են «Էփիջի Լէբս ԷյԷմ»-ի նորակառույց կենտրոնի 1-ին և 2-րդ հարկերում: Ըստ նրա, կենտրոնը անվճար հիմունքներով բաց է 12-18 տարեկան երեխաների համար, ովքեր ցանկություն ունեն ծանոթանալ ժամանակակից տեխնոլոգիաներին: «Կիրառելով յուրահատուկ ուսումնական ծրագիր` այն նպատակ ունի Հայաստանում խթանել նոր սերունդների ստեղծագործական առաջընթացը և շատերի համար հիմք դառնալ` համակարգչային ոլորտում որպես մասնագետ ձևավորվելու համար»,- ասաց կենտրոնի տնօրենը:

Նրա խոսքերով, կենտրոնը մատուցել է մի քանի ծառայություններ, մասնավորապես` ընտրվել են այն ոլորտները, որոնք գրավիչ են և հեռանկարային` անիմացիա, համակարգչային խաղերի ստեղծում, վեբ-կայքերի ստեղծում և թվային մեդիա: «Այդ տարիքի երեխաները ստեղծագործական մեծ պոտենցիալ ունեն, քանի որ այդ տարիքում նրանց ամեն ինչ հետաքրքրում է, հատկապես տեղեկատվական տեղնոլոգիաները: Մենք հավատում են և հուսով ենք, որ այդ ամբողջ ծրագիրը նրանք կընկալեն, կհասկանան և հետագայում ստացած գիտելիքները կկիրառեն նաև այլ ոլորտներում»,- ընդգծեց Մարի Լու Փափազյանը:

Նաև նաև տեղեկացրեց, որ կենտրոնում բարձր առաջադիմություն ստացած երեխաները հնարավորություն կունենան տեղափոխվել երկրորդ հարկ` իրենց գիտելիքները ավելի խորացնելու և սեփական նախագծեր իրականցնելու համար: Մարի Լու Փափազյանը չբացառեց, որ լավագույն երեխաներին հնարավորություն կընձեռեն ուսումը շարունակել նաև արտերկրում:

Նշենք, որ 2012թ.-ից կենտրոնը կունենա նաև ամառային ուսումնական ծրագիր` տեղի և արտերկրի երեխաների համար` հանդես գալով իբրև ամառային ճամբար: