Ձեր վստահելի աղբյուրը

Այսօր հայ անվանի բռնցքամարտիկ Արթուր Աբրահամը 100 հազար եվրո արժողության նվերներ հանձնեց Վլադիմիր Ենգիբարյանի անվան բռնցքամարտի օլիմպիական մանկապատանեկան մարզադպրոցին, դպրոցի սաներին և մարզիչներին:

Նոր մարզական գույքը` տանձիկներ, բռնցքամարտի «լապաներ», մարզաձևի համար նախատեսված շապիկներ, վարտիքներ, կոշիկներ, մարզակոշիկներ, մարզական համազգեստներ, պայուսակներ, ձեռնոցներ, գլխարկներ և այլն, կնպաստի, որպեսի մարզադպրոցը պատրաստի և միջազգային ասպարեզ դուրս բերի նոր չեմպիոնների: Արթուր Աբրահամը վստահ է, որ մեր երկրում տաղանդաշատ մարզիկներն ու մարզիչները շատ են, և նրանց համար պարզապես անհրաժեշտ է պայմաններ ստեղծել, որպեսզի կարողանան հասնել նոր մակարդակի: Իհարկե, նրանք նաև միջազգային շատ մրցումների պետք է մասնակցեն` փորձ ձեռք բերելու համար, բայց սա այլ խոսակցության թեմա է:

Իսկ այսօր կարևորն այն է, որ Արթուր Աբրահամը հավատարիմ է մնում իր ակունքներին և ձգտում է օգտակար լինել այն դպրոցին, որտեղ ժամանակին մարզվել է:
«Ես ուզում եմ երախտագիտությունս և խորին շնորհակալությունս հայտնել իմ մարզադպրոցին, որտեղ ժամանակին մարզվել եմ, որն ինձ օգնել է լուրջ արդյունքների հասնել»,- հայտարարեց Արթուր Աբրահամը:

Անդրադառնալով իր մարզական ծրագրերին` հայ մարզիկը շեշտեց, որ պլանավորում է 2-3 վարկանշային մրցամարտ անցկացնել պրոֆեսիոնալ բռնցքամարտի միջինքաշային կարգում և կրկին հավակնել աշխարհի չեմպիոնի կոչման: Նա նշեց նաև, որ կարիերայի ավարտից հետո Երևանում բռնցքամարտի նոր դպրոց կհիմնադրի: Քաղաքապետարանի հետ արդեն համապատասխան պայմանավորվածություն կա: Դպրոցին կից կգործի նաև գերմաներենի ու անգլերենի ուսուցման կենտրոն: