Ձեր վստահելի աղբյուրը

Սիրիայի ուսանողների ազգային միության նախաձեռնությամբ երկրի բոլոր համալսարաններում կազմակերպվել են բանավեճեր, որոնց ընթացքում քննարկվել են երկրում ստեղծված իրավիճակի և համընդհանուր բարեփոխումների անցկացման գործընթացի հետ կապված հարցեր:
Այս մասին հաղորդում է սիրիական «SANA» լրատվական գործակալությունը:

Դամասկոսի համալսարանում ուսանողներն ընդգծել են իշխանությունների կողմից անցկացվող բարեփոխումների գործընթացին բոլոր սիրիացիների մասնակցության և երիտասարդություն խնդիրների լուծման կարևորությունը:

Դեր Զորի համալսարանականները նշել են երիտասարդ սերնդի տաղանդավոր ներկայացուցիչներին երկրի գիտատեխնիկական զարգացմանը ներգրավելու անհրաժեշտությունը: Նրանք նաև քննարկել են կրթական հաստատություններում կոռուպցիայի դեմ պայքարի և երիտասարդ մասնագետներին աշխատատեղերով ապահովելու հետ կապված հարցեր:

Լաթակիայի «Թիշրին» համալսարանի ուսանողները ընդգծել են համալսարանական երիտասարդության կարևոր դերը ազգային գիտակցության բարձրացման և քաղաքացիների հայրենասիրական դիրքորոշման ամրապնդման գործում: Լաթակիացի երիտասարդների համոզմամբ` հասարակության բոլոր շերտերի կառուցողական երկխոսությունն է միակ միջոցը`բացահայտելու հակադիր կարծիքները: Սիրիական մտավորականության երիտասարդ ներկայացուցիչները հատուկ ուշադրություն են հրավիրել լայն հասարակայնությանը «ազատություն» հասկացության իրական իմաստի բացատրության կարևորությանը, որը չի նշանակում «ամենաթողություն» և «անիշխանություն»:

Ալ-Կունեյտրայի և Տարտուսի համալսարանականները առանձնացրել են Սիրիայում կրթության ոլորտում բարփոխումների անհրաժեշտությունն, ինչպես նաև երկրի ժողովրդավարացման գործընթացներում և քաղաքական կյանքում երիտասարդության մասնակցության կարևորությունը:

Հալեպում ուսանողներն ընդգծել են հասարկության բոլոր հատվածների դիրքորոշումը հարգելու և արմատական գաղափարներից հրաժարվելու առաջնահերթությունը, իսկ Հոմս քաղաքի «Ալ-Բաաս» համալսարանի ուսանողների կարծիքով` բարեփոխումների փաթեթի հաջող կենսագործումը հնարարվոր է միայն երկրում կոռուպցիայի դեմ հետևողական պայքարի և օրինականության պահպանման պայմաններում:

Նշենք, որ Սիրիայում մարտի կեսերին սկիզբ առած հակակառավարական ելույթների և դրանց ճնշման գործողությունների հետևանքով զոհվել է շուրջ 1200 մարդ: Ներքաղաքական ճգնաժամի հաղթահարման նպատակով և միջազգային հանրության ազդեցությամբ սիրիական իշխանությունները նախաձեռնել են համընդհանուր բարեփոխումների փաթեթ հասարակական կյանքի բոլոր բնագավառներում: