Ձեր վստահելի աղբյուրը

Սերբիայի մայրաքաղաք Բելգրադում հուլիսի 6-ին մեկնարկած ԵԱՀԿ ԽՎ ամենամյա նստաշրջանի ընթացքում քվեարկության էր ներկայացված «Ամրապնդելով ԵԱՀԿ արդյունավետությունն ու գործունակությունը. Նոր մեկնարկ Աստանայի գագաթաժողովից հետո» բանաձեւի նախագիծը: Փաստաթուղթը մասնավորապես անդրադառնում էր նաև ԵԱՀԿ տարածքի հակամարտություններին, այդ թվում՝ ղարաբաղյան: Ադրբեջանական և թուրքական պատվիրակությունները հանդես են եկել առաջարկով` «Լեռնային Ղարաբաղի հակամարտություն» ձևակերպումը փոխարինելու «Ադրբեջանի Հանրապետության Լեռնային Ղարաբաղի շուրջ հակամարտություն» ձևակերպմամբ: Հայկական պատվիրակությանը հաջողվել է կանխել այդ փորձերը:

Լրագրողների հետա հանդիպման ժամանակ ԵԱՀԿ ԽՎ-ում ՀՀ պատվիրակության ղեկավար Արամ Սաֆարյանն ասաց.

«Այս տերմինի օգտին նախապես առաջարկություն էր արել ևս մեկ` Լիխտենշտեյնից պատգամավոր պարոն Լոմբերը, որը, սակայն, երեկ (07.07.2011) մեզ հետ զրույցի արդյունքում հասկացավ իր առաջարկի անարդյունավետությունը և այսօր դիմումով պաշտոնապես հրաժարվեց այդ ուղղման համահեղինակը լինելուց, ինչի մասին հայտարարվեց 1-ին հանձնաժողովի նախագահի կողմից:
Ես ելույթ ունեցա մի առարկությամբ՝ նշելով, որ «մենք առարկում ենք այդ ուղղման դեմ, որովհետեւ այն հակասում է ԵԱՀԿ շրջանակում ընթացող Մինսկի գործընթացի ոգուն, տերմինաբանությանն ու պայմանավորվածություններին, որոնք վերաբերում են Լեռնային Ղարաբաղի հակամարտության կարգավորմանը: ՌԴ նախագահը, Ֆրանսիայի վարչապետը և ԱՄՆ պետքարտուղարը Հայաստանի և Ադրբեջանի նախագահների մասնակցությամբ Աստանայի գագաթաժողովի ընթացքում հայտարարել են Մինսկի գործընթացն առաջ մղելու ցանկության մասին, որը հիմնված կլինի կարգավորման հիմնարար սկզբունքների վրա, որոնք ընդունելի կլինեն բոլորի համար: Այստեղ, ինչպես և ԵԱՀԿ շրջանակներում ընդունված բոլոր նախորդ փաստաթղթերում և հայտարարություններում, հակամարտությունն անվանված է «Լեռնային Ղարաբաղի» կամ «հակամարտություն Լեռնային Ղարաբաղում»:

Ես չեմ թվարկի այն բոլոր փաստաթղթերը, որոնք ընդունվել են 1992 թվականից, չնայած մենք կարող ենք դրանք տարածել բոլոր ցանկացողների շրջանում: Կթվարկեմ միայն ամենակարևորները` ԱՄՆ-ի, Ֆրանսիայի եւ ՌԴ-ի նախագահների հայտարարությունը Լ’Աքվիլայում (Իտալիա), Մուսկոկում (Կանադա) և Դովիլում (Ֆրանսիա): Մենք համոզված ենք, որ ԵԱՀԿ տերմինաբանությունը փոփոխելու այս փորձը տվյալ հարցում ապակառուցողական քայլ է, քանի որ հակամարտության կարգավորման ուղղությամբ բանակցությունները շարունակվում են ավելի վաղ ձեռք բերված համաձայնությունների հիման վրա, ինչի մասին պարզ և առանց երկմտանքի ասված է Աստանայի հայտարարության մեջ: Ավելին` ԵԱՀԿ ԽՎ-ն չպետք է ընդունի ինչ-ինչ հայտարարություններ, որոնց լեզուն հակասության մեջ կգտնվի այն փաստաթղթերի և որոշումների հետ, որոնք ընդունված են ԵԱՀԿ շրջանակներում:

Զեկուցողի՝ պրն Պիչուլայի մոտ ամեն ինչ շատ հստակ և կոռեկտ ձևակերպված է: Եվ մենք խնդրում ենք չփոփոխել բանաձևի այդ ձևակերպումը»:

 Բանախոսը հայտնեց, որ այնուհետև ելույթ է ունեցել պրն Պիչուլան, որը մասնավորապես ասել է, թե լսելով Հայաստանի և Ադրբեջանի ներկայացուցիչների փաստարկները` եկել են այն եզրակացության, որ տվյալ դեպքում ճիշտ չէր լինի փոխել այդ տերմինը եզրափակիչ փաստաթղթում, որովհետև դա կարող էր անկանոնություն մտցնել ԵԱՀԿ հետագա գործընթացներում: Այսպիսով` նա առաջարկել էայդ ուղղումը մերժել:

Այնուհետև տեղի է ունեցել քվեարկություն, ադրբեջանական ուղղման օգտին քվեարկել են նաև Վրաստանի, Բելառուսի, Մոլդովայի ներկայացուցիչները: 37 երկիր քվեարկել է պրն Պիչուլայի առաջարկության օգտին: Խնդիրը համարվել է կարգավորված: Փաստաթուղթը կիրակի օրը քվեարկության կներկայացվի լիագումար նիստում, սակայն ԵԱՀԿ ԽՎ պրակտիկայում չի եղել դեպք, երբ հանձնաժողովում հավանության արժանացած փաստաթուղթն ընդհանուր հավանության չարժանանա:

«Նշեմ, որ այս աշխատանքը, որի նպատակը Բելգրադում հավաքված 56 պատվիրակություններից 55-ին մեր հակամարտության իրական բովանդակությունը և կարգավորման իրական հեռանկարները բացատրելն էր, հնարավոր դարձավ ամբողջ պատվիրակության և մեզ հետ աշխատող ԵԱՀԿ-ում ՀՀ արտակարգ և լիազոր դեսպան Աշոտ Հովակիմյանի ջանքերի շնորհիվ», հավելեց ԵԱՀԿ ԽՎ-ում ՀՀ պատվիրակության ղեկավար Արամ Սաֆարյանը: