Ձեր վստահելի աղբյուրը

Այսօր ՀՀ Զինված ուժերի երիտասարդ սպաների համաբանակային անդրանիկ կոնֆերանսում ՀՀ կրթության և գիտության նախարար Արմեն Աշոտյանը նշեց, որ երկու գերատեսչությունների, երկու ոլորտների միջև տարիներ շարունակ ծավալված համագործակցությունը ստանում է նոր որակ, նոր դրսևորումներ` ցանկանալով խորացնել այն օրգանական, կենսական կապը, որ կա այս երկու համակարգերի միջև:

Անդրադառնալով ժամանակակից կրթության և ժամանակակից գիտելիքի առանձնահատկություններին` Ա.Աշոտյանն ասաց, որ ամբողջ աշխարհում և Հայաստանում գիտելիքն է դառնում այս կամ այն ոլորտում բեկումնային զարգացումների հիմնական գրավականը… լինի տնտեսություն, մշակույթ, քաղաքական համակարգ, թե գիտական հետազոտություններ: Որևէ ուղղությամբ հնարավոր չէ ակնկալել բեկումնային հաջողություն, եթե այդ ոլորտի համապատասխան տրամաբանության մեջ դրված չէ գիտելիքը:

Երկրորդ առանձնահատկությունն այսօր այն է, որ գիտելիքը շատ արագ է ստեղծվում, օգտագործվում և մաշվում:

«Գիտելքիի ստեղծման և օգտագործման տեմպերը աննախադեպ են 21-րդ դարում, սա նշանակում է, որ մենք ձեզ հետ միասին պետք է կառուցենք այնպիսի կրթական համակարգ, որ յուրաքնաչյուր մարդ ողջ կյանքի ընթացքում ունենա հնարավորություն հարստացնելու իր գիտելիքների պաշարը»,- ասաց ԿԳ նախարարը:

Ըստ նրա, այլևս հնարավոր չէ ավարտելով այս կամ այն ուսումնական հաստատությունը` ստանալով այդ տարիների համար համարժեք գիտելիք, համարել, որ կիրթ, ուսյալ մարդիկ են և կարող են մինչև կյանքի ավարտը ապավինել ստացած հենց այդ գիտելիքային պաշարի վրա:

«Ժամանակակից կրթական համակարգերը թելադրում են ցկյանս ուսուցում, որպեսզի մարդը, եթե ցանկանում է լինել հաջողակ իր գործունեության մեջ, կարողանա իրականում ստանալ գիտելիքային պաշար»,- ընդգծեց Ա.Աշոտյանը:

Հաջորդ առանձնահատկությունը, նախարարի խոսքերով, այսօրվա աշխարհում և Հայաստանում նա է, որ գիտելիքի ստեղծման, փոխանցման և օգտագործման համար կան բազմաթիվ տեխնիկական հնարքներ: Նոր տեխնոլոգիաներն այստեղ ապահովել են բեկումնային առաջընթաց և գիտելիքը հասանելի է այսօր յուրաքանչյուրին, յուրաքանչյուր վայրում: Ըստ նրա, այսօր հաջողակ լինելու համար, կրթական համակարգում արդյունավետ աշխատելու համար անհրաժեշտ է տիրապետել ժամանակակից տեղեկատվական տեխնալոգիաներին, որոնք միջոց են գիտելիք ձեռք բերելու համար և երբեք նպատակ:

Հաջորդ առանձնահատկությունը նա է, որ գիտելիքն է դառնում յուրաքանչյուր քաղաքացու անձնական հաջողության, բարօրրության, բարեկեցության գրավականը:
«Այս օրինաչափությունը նկատելի է, թե ամբողջ աշխարհում և հայ հասարակության մեջ կամաց-կամաց իր տեղն է գտնում մի պարզ ճշմարտություն, որ միայն գիտելիքով զինված մարդը կարող է հաջողակ, բարեկեցիկ կյանքով ապրել իր ընտանիքի, իր հայրենքի և հասարակության համար: Աշխարհով մեկ կուտակվող ինֆորմացիային լիարժեք տիրապետելու համար յուրաքանչյուր մարդ պետք է հատուկ շեշտադրում անի օտար լեզուների տիրապետման և այլ ելզուներով այլ տեղեկատվական աղբյուրներից օգտվելու համար: Սա է ժամանակակից գիտելիքին բնորոշ 5 առանձնահատկություները, որոնք և’ մարտահրավեր են, և’ հնարավորություն հայկական կրթական համակարգի համար, հետևաբար նաև մեր անվտանգային համակարգի հզորացման համար»,- հայտնեց Ա.Աշոտյանը:

Ըստ նախարարի, միասին պետք է կրթել, դաստիարակել և մեծացնել ոչ միայն ուսյալ, խելացի մարդկանց, այլ մարդկանց, ովքեր հայրենասեր են, իրենց մեջ կրում են ավանդական արժեհամակարգ, մարդկանց, որոնք կարող են բացի սեփական ես-ից դիտարկել իրեն շրջապատող աշխարհը, այլև հասարակությունը և հայրենիքը:

«Այսօր պետք է հստակ ընկալենք այն մարտահրավերները, որոնք ունի մեր հասարակությունը, մեր պետությունը և ունեն կրթական, բանակային համակարգերը: Դա շատ ագրեսիվ արտաքին միջավայրն է, միջավայր, որը տեղեկատվական, քաղաքական, կրթական ագրեսիվ ներգործություն է գործում բոլոր այն հասարակությունների վրա, որոնք փորձում են ապրել իրենց ուրույն արժեհամակարգի շրջանակում»,- ասաց ԿԳ նախարարը և հավելեց, որ ավանդական արժեհամակարգի պահպանումը մեր երկրի անվտանգային հզորությունները ուժեղացնող կարևորագույն գործոններից մեկն է:

«Մեր կրթական համակարգում իրենց ուրույն տեղն ունեն համապատասխան ռազմական հաստատությունները բոլոր մակարդակներում: Մեր հայեցակարգով ռազմական կրթությունը ոչ միայն մասնագիտական կրթություն է, այլ քաղաքացիական կրթության մեջ իր ուրույն տեղն ունեցող շատ կարևոր բաղադրիչ է»,- նշեց Ա.Աշոտյանը: