Ձեր վստահելի աղբյուրը

Panorama.am-ը Հայաստանի երիտասարդական հիմնադրամի գործունեության, երկրում առկա ներքաղաքական իրավիճակի, ինչպես նաև ՆԱՏՕ-ի Խորհրդարանական վեհաժողովում հայկական պատվիրակության աշխատանքների մասին զրուցեց ԱԺ պատգամավոր, Հայաստանի երիտասարդական հիմնադրամի համակարգող, ՆԱՏՕ-ի խորհրդարանական վեհաժողովում հայկական պատվիրակության ղեկավար Կարեն Ավագյանի հետ:

-Ի՞նչ նպատակով է ստեղծվել Հայաստանի երիտասարդական հիմնադրամը և ի՞նչ խնդիրներ է դրել իր առջև:
-Պետք է նշել, որ ՀՀ կառավարության օրակարգում երիտասարդությունը միշտ կենտրոնական դիրք է զբաղեցրել և այս առումով, հիմնադրամի ստեղծման գլխավոր նպատակը երիտասարդության ամենաակտուալ ու հրատապ խնդիրների լուծումն է: Հիմնադրանը ժամանակակից երիտասարդության համար փորձում է լինել առավելագույնս օգտակար, և այդ պատճառով մենք բավական ծրագրեր ունենք, որոնք ներկայացված են ոչ միայն մեր կողմից, այլև դրսից: Դրանք ըստ արժանվույն գնահատվում և իրականացվում են հիմնադրամի աջակցությամբ:

-Հիմնադրամի աշխատանքների ինչպիսի՞ գլխավոր ուղղություններ կարող եք առանձնացնել:
-Ընդհանուր առմամբ, կարելի է երեք գլխավոր ուղղություն առանձնացնել: Դրանք են` կրթական, սոցիալական, ինչպես նաև ռազմա-հայրենասիրական ուղղվածության ծրագրերը: Այս ծրագրերի մասին ավելի կոնկրետ խոսելով, պետք է ասել, որ դրանք բոլորն էլ բավականին արդյունավետ են: Նախորդ 2010 թվականին մոտ 600 ուսանող հիմնադրամի սոցիալական ծրագրերից օգտվելու հնարավորություն է ունեցել:

Սոցիալապես անապահով ուսանողները, ինչպես նաև այն ուսանողները, ովքեր լավ առաջադիմություն ունեն, կարողացել են օգտվել հիմնադրամի աջակցությունից: Մասնավորապես, ուսման վարձերի 25 տոկոսը փոխանցվել է հիմնադրամի միջոցներից: Ինչ վերաբերում է ռազմա-հայրենասիրական ծրագրերին, ապա դրանք հիմնականում ուղղված են բանակ-հասարակության կապերի ամրապնդմանը: Մենք ձգտում ենք ցույց տալ, որ բանակը հանդիսանում է հասարակության անբաժան մասը և փորձում ենք չեզոքացնել այդ կառույցի շուրջ ձևավորված հոգեբանական պատնեշները: Այդ նպատակով հաճախակի կազմակերպվում են միջոցառումներ, մշակութային ծրագրեր, սեմինարներ: Կրթական ծրագրերն իրենց հերթին ուղղված են տաղանդավոր մարդկանց, ինչպես նաև հաջող երիտասարդական և հասարակական կազմակերպություննների բացահայտմանը: Ծրագրերը կազմվում են մրցութային եղանակով և նրանք, ովքեր առավել համապատասխանում են ընդունված չափորոշիչներին, հիմնադրամից օգնություն ու ֆինանսավորում են ստանում:

-Քանի որ դուք հանդիսանում եք նաև ՀՀԿ երիտասարդական կառույցի ղեկավարը, ցանկալի կլիներ իմանալ Ձեր կարծիքը նորաստեղծ Երիտասարդական խորհրդարանի վերաբերյալ: Ի՞նչ նպատակով է այն ստեղծվել:
-Պետք է նշել, որ Երիտասարդական խորհրդարանը` դա ևս մեկ դաշտ է, որում նոր սերունդը հնարավորություն ունի իր իդեաները կյանքի կոչել, գուցե նաև իր հարցերին պատասխաններ գտնել: Բացի այդ, այստեղ երիտասարդությունը հնարավորություն ունի ներգրավված լինելու օրենքների ընդունման գործընթացում և ինչ-որ կերպ ազդելու այդ գործընթացի վրա: Երիտասարդական խորհրդարանի գործունեությունը կայանում է նրանում, որ այն առաջարկում է մի քանի օրինագիծ, որոնք այնուհետև քննարկվում են համապատասխան հանձնաժողովներում և դրանից հետո, անհրաժեշտության դեպքում ուղարկվում են ՀՀ Ազգային ժողով: Արժե նշել այն փաստը, որ Երիտասարդական խորհրդարանը միայն մեկ նիստ է անցկացրել և հնարավորություն չի ունեցել ամբողջությամբ մտնել գործընթացի մեջ, բայց հույս ունենք, որ սեպտեմբերից այդ կառույցը ամբողջ թափով կգործի:

-Անդրադառնանք ներքաղաքական խնդիրներին: Ինչպե՞ս կբնութագրեք երկրի ներկայիս ներքաղաքական իրավիճակը:
-Այսօր ընթանում է բնական քաղաքական գործընթաց, կուսակցությունները փորձում են ռեալ գնահատել իրենց ուժերն ու հնարավորությունները ու միաժամանակ որոշակի միջոցներ են ձեռնարկում` ուղղված իրենց ռեսուրսներն ավելացնելուն: Օրինակ, ընդդիմադիր դաշտում փորձեր են արվում իրենց նպատակներին հասնել օրենքի շրջանակներում: Այդ տեսանկյունից ընդդիմության այդ մարտավարությունը դրական եմ գնահատում

-Սպասվող խորհրդարանական ընտրությունների առնչությամբ ինչպիսի՞ կանխատեսումներ կարող ենք անել:
-Սկսենք նրանից, որ արտահերթ խարհրդարանական ու նախագահական ընտրությունների մասին որևէ խոսք չի կարող լինել: Իսկ սպասվող ընտրությունների մասին խոսել` դեռևս վաղ է, քանի որ իրավիճակի հնարավոր փոփոխությունների համար բավական ժամանակ կա:

-Որպես ՆԱՏՕ-ի խորհրդարանական վեհաժողովում հայկական պատվիրակության ղեկավար, ի՞նչ կարող եք ասել, պատվիրակության գործունեության մասին
-Նշեմ, որ ՆԱՏՕ-ի խորհրդարանական վեհաժողովի հիմնական խնդիրը երկրների ազգային խորհրդարանների ու ՆԱՏՕ-ի ղեկավար մարմինների միջև կապի ապահովումն է: Ասամբլեան հիմնականում կազմված է ՆԱՏՕ-ի անդամ-երկրներից, ինչպես նաև ասոցացված երկրներից, որոնց թվում է նաև Հայաստանը:

Խորհրդաժողովում մեր խնդիրը Հայաստանի արտաքին քաղաքական շահերից բխող դիրքորոշումների ներկայացումն է: Խորհրդաժողովում ամենաշատ քննարկվող հարցերից մեկը հանդիսանում է Լեռնային Ղարաբաղի հարցը, որը բարձրացվում է ադրբեջանական կողմից: Սակայն, ՆԱՏՕ-ի դիրքորոշումը, ինչպես նաև Հայաստանի մոտեցումներն այդ հարցում համընկնում են: ՆԱՏՕ-ն Ղարաբաղյան հակամարտության լուծումը բացառապես տեսնում է ԵԱՀԿ Մինսկի խմբի շրջանակներում և չի ուզում ներգրավված լինել այդ գործընթացի մեջ: Այդ պատճառով, նշված քննարկումները ավելի հաճախ ընդհատվում են Խորհրդարանական վեհաժողովի կողմից: Բացի դրանից, հայկական պատվիրակությունը ևս այդ ուղղությամբ ինտենսիվ աշխատանքներ է տանում և հստակ ձևակերպում է իր դիրքորոշումը, որը համընկնում է ՆԱՏՕ-ի դիրքորոշման հետ:

Ադրբեջանի համար սա գործունեության ևս մեկ դաշտ է, որտեղ նրանք կարող են հնչեցնել իրենց չհիմնավորված հավակնությունները, բայց ոչ ավելին: Այսպիսով, մեր պատվիրակությունը բավական հաջող կատարում է իր առաջև դրված խնդիրները, բացի այդ, ակտիվորեն մասնակցում է ՆԱՏՕ-ի խորհրդարանական վեհաժողովի գործունեությանը: