Ձեր վստահելի աղբյուրը

«Ուրախ եմ, որ «Փարաջանով» ֆիլմի նախագիծը ներկայացվել է «Ոսկե Ծիրան» կինոփառատոնի շրջանակներում»,- այսօր Հայաստանում Ֆրանսիայի դեսպանատանը «Փարաջանով»  ֆիլմի նախագծի ներկայացման կապակցությամբ հրավիրված ասուլիսում հայտարարեց ֆիլմի պրոդյուսեր, սցենարիստ Օլենա Ֆետիսովան:

Օլենա Ֆետիսովան ասաց, որ ֆիլմի սցենարը բազմաթիվ փոփոխություններ է կրել,  վերջնական տարբերակը գրելու համար էլ  իրեն օգնել է ֆրանսահայ կինոռեժիսոր և դերասան Սերժ Ավեդիկյանը, ով  էլ լինելու  գլխավոր դերակատարը:

Նրա խոսքով, ինքը երկար ժամանակ չէր կողմնորոշվում, թե ով կարող է մարմնավորել Սերգեյ Փարաջանովի կերպարը , այդ հարցով դիմել է  ուկրաինահայ կինոռեժիսոր Ռոման Բալայանին, ով էլ  այդ դերում ամենահարմարը տեսել է  Սերժ Ավեդիկյանին:

Օ. Ֆետիսովան նշեց, որ ֆիլմի նկարահանումները կավարտվեն 2012թ.-ին, որից հետո ֆիլմը կցուցադրվի Կաննի «forum day»-ի շրջանակներում: Նա տեղեկացրեց, որ ֆիլմի նկարահանումները տեղի կունենան Հայաստանում, Վրաստանում, Ուկրաինայում և Հոլանդիայում:

Ասուլիսին ներկա ֆիլմի գլխավոր դերակատար, ֆրանսահայ կինոռեժիսոր, սցենարիստ և դերասան Սերժ Ավեդիկյանն իր հերթին ասաց, որ ինքը ֆիլմում ռուսալեզու կերպար է:

«Չեմ  խաղալու,  ապրելու եմ: Փարաջանովին մարմնավորելը շատ պատասխանատու բան է», -ասաց նա ու ընդգծեց, որ ինքը չէր կարող մերժել, քանի որ շատ լավ էր ճանաչում վարպետին  ու Փարաջանովի կյանքի վերջին տարիներին ինքն է եղել է նրա կողքին:


Նա նշեց որ այս ֆիլմը Փարաջանովի ոճի ֆիլմ չէ:
Ասուլիսին ներկա էր նաև Հայաստանում Ֆրանսիայի դեսպան Անրի Ռենոն, ով ողջունեց բոլոր ներկաներին և գոհունակություն հայտնեց, որ այս ֆիլմի նախագծի ներկայացումը տեղի ունենում Ֆրանսիայի դեսպանատանը: Նա ասաց, որ ուրախ է այսօր հյուրնկալել Սերժ Ավեդիկյանին, ով ֆրանսիական կինեմոտոգրաֆիայի նշանավոր կինոռեժիսորներից է:

Դեսպանը նշեց, որ Սերժ Ավեդիկյանը այսօր ավելի շատ հանդես է գալիս որպես սցենարիստ, ինչը, նրա բնորոշմամբ, շատ ուրախալի է: Նրա  կարծիքով, պատահական չէր, որ  2010թ.-ին Կաննի կինոփառատոնում հենց Ս.Ավեդիկյանի «Շան Պատմություն» ֆիլմը արժանացավ «Ոսկե արմավենի» մրցանակին: