Ձեր վստահելի աղբյուրը

Ի հեճուկս Ադրբեջանի` Լեռնային Ղարաբաղն այս օրերին կլինի եվրոպացի մշակույթի առաջադեմ ներկայացուցիչների հավաքատեղին, իսկ նախաձեռնության հեղինակները վստահություն են հայտնում, որ նման մշակութային ծրագրերը կլինեն շարունակական ու հիմք կհանդիսանան Շուշիի նաև մշակութային վերածննդին ու զարթոնքին. հուլիսի 15-29-ը Արցախի հրաշք այս քաղաքում անցնում է «Հակոբ Գյուրջյան» քանդակի առաջին միջազգային սիմպոզիումը:

Առաջնահերթ սիմպոզիումի նպատակն է նպաստել Արցախի միջազգային հեղինակության բարձրացմանն արվեստի միջոցով, ինչպես նաև `դառնալ համագործակցության, մշակութային ու մասնագիտական երկխոսության ու ստեղծագործական ոգեշնչման հարթակ քանդակագործների համար: Հենց այս նպատակով Երևանում են, իսկ առաջիկայում կմեկնեն նաև Շուշի Իտալիայից ժամանած 20 անվանի քանդակագործներ ու մշակույթի գործիչներ, ինչպես նաև Իտալիայի առաջին պետական հեռուստատեսության օեպարտորական խումբը, ովքեր Հայաստանում ու Արցախում տեսածը, Շուշիի անցյալն ու ներկան իտալական հեռուստադիտողին կներկայացնեն վավերագրական ֆիլմի ու ռեպորտաժների միջոցով:

Այս մասին այօրվա ասուլիսում հայտարարեց սիմպոզիումի մտահղացման հեղինակ ու նախագահ քանդակագործ Վիգեն Ավետիսը. «Շուշին կզարդարվի համաշխարհային քանդակագործների ստեղծագործություններով, ինչը ծրագրի մշակութային մասն է, սակայն ես հույս ունեմ, որ մյուս տարի կճանաչվի Լեռնային Ղարաբաղի անկախությունը և ըստ այդմ Արցախը ինքը կսկսի ձևավորել իր մշակութային և այլ ծրագրերը»,- նշեց Վ.Ավետիսն այն բանից հետո, ինչ ներկայացրեց բոլոր այն գերատեսչությունները` ՀՀ և ԼՂ Մշակույթի նախարարությունների և Երևանի քաղաքապետ Կարեն Կարապետյանի ջանքերով:

Վ.Ավետիսը ներկայացրեց նաև նպատակը` 15 քանդակ ամեն տարի և 10 տարի անց Շուշին կզարդարեն 150 քանդակ` վերածելով քաղաքն իրական թանգարանի բաց երկնքի տակ: Իսկ դրա առաջին քայլը կարվի արդեն առաջիկա օրերին` հազարամյա պատմություն ունեցող, աշխարհին Միքելանջելո տված Իտալիայից ժամանած քանդակագործներից յուրաքանչյուրն ազատ թեմայով կկերտեն իրենց քանդակները` քաղաքին նվիրելու նպատակով` դրա համար օգտագործելով Շուշիի կրաքարը: Հիշեցնենք, որ Շուշիի Սրբ.Ղազանչեցոց եկեղեցին հենց այդ քարից է պատրաստված:

«Ես հավատում եմ նաև, որ հաջորդ տարի կունենանք Ստեփանակերտ-Հռոմ թռիչք, ինչն էլ ավելի կնպաստի մշակութային համագործակցությանը»,- հավելեց քանդակագործն ու ևս մեկ անգամ ընդգծեց` առաջին սիմպոզիումը, իսկապես որ խորհրդանշական ու պատմական երևույթ է: