Ձեր վստահելի աղբյուրը

Համահայկական խաղերի համաշխարհային կոմիտեի նախագահ Իշխան Զաքարյանն այսօր լրագրողների հետ հանդիպման ժամանակ խոսեց կատարված նախապատրաստական աշխատանքների մասին` անդրադառնալով ինչպես բացման ու փակման արարողությունների ծրագրերին, այնպես էլ այն մարզահամալիրների ու մարզադաշռտերի թեմային, որտեղ պետք է անցկացվեն մրցումները:

«Համահայկական խաղերի գաղափարը Հայրենիք-Սփյուռք երիտասարդության կապերի ամրապնդումն է` հատկապես սպորտի միջոցով,- նշեց Ի. Զաքարյանը:- Մասնակիցները ներկայացնում են քաղաքներ և ոչ թե պետություններ:

Այս անգամ Համահայկական խաղերի ծրագրում ընդգրկված է 10 մարզաձև` ֆուտբոլ, բասկետբոլ, վոյելբոլ, թենիս, սեղանի թենիս, բադմինթոն, ատլետիկա, լող, շախմատ և մինի ֆուտբոլ:

Մենք արդեն նայել ենք այն բոլոր մարզադահլիճները, որտեղ պետք է կայանան Խաղերը: Ընտրվել են լավագույնները: Հենվել ենք ոչ միայն պետության տնօրինության տակ գտնվող մարզադահլիճների ու մարզասրահների վրա, այլ նաև օգտագործելու ենք այն մարզադահլիճները, որոնք գտնվում են մասնավոր բիզնեսի ոլորտում: Բոլոր կառույցներն էլ Համահայկական խաղերի համար տրամադրվելու են անվճար»:

Ֆուտբոլի մրցումները տեղի են ունենալու Երևանի «Փյունիկ», Ֆուտբոլային ակադեմիայի, «Հրազդան» և Աբովյանի «Քաղաքային» մարզադաշտերում:

Բասկետբոլի համար ընտրվել են «Միկա», «Գրանդ Սպորտ» և Հայ-ռուսական (Սլավոնական) համալսարանի մարզադահլիճները: Վոլեյբոլիստները կխաղան Խուլ-համրերի մարզապալատում և Հայկական տնտեսագիտական համալսարանի դահլիճում: Թենիսի և բադմինթոնի մրցումները կկազմակերպվեն «Ֆիթնես Օրանժ» համալիրում, սեղանի թենիսը` «Դինամո» մարզահամալիրում, շախմատը` Տիգրան Պետրոսյանի անվան շախմատի կենտրոնական տանը, լողը` Դավիթ Համբարձումյանի անվան լողավազանում, մինի ֆուտբոլը` Ֆուտբոլի ակադեմիայում և «Գրանդ սպորտ» նորակառույց համալիրում, ատլետիկան` Արտաշատի մարզադաշտում: Նախատեսվել են նաև պահեստային մարզադահլիճներ, որոնք կարող են օգտագործվել մասնակիցների թվաքանակի ավելացման դեպքում:

«Խաղերի հանդիսավոր բացումը տեղի կունենա օգոստոսի 13-ին, Վազգեն Սարգսյանի անվան «Հանրապետական» մարզադաշտում: Մուտքն ազատ է լինելու ինչպես ՀՀ քաղաքացիների, այնպես էլ հյուրերի համար: Այդ որոշումը մենք կայացրել ենք` հաշվի առնելով, որ սա նաև մեծ տոնահանդես է, և, բնականաբար, մարդիկ պետք է հնարավորություն ստանան անվճար մասնակցել դրան: Բացման արարողությունը բաղկացած է լինելու 2 մասից: Առաջին` սպորտային մասը ներառում է մարզիկների ու մարզիչների երդման, ջահ վառելու արարողությունները: Դրանց կհաջորդի մարզական շքերթը, որին կմասնակցեն բոլոր պատվիրակությունները: Շքերթի ավարտից անմիջապես հետո ՀՀ նախագահը կհայտարարի խաղերի հանդիսավոր բացման մասին: Երկրորդ մասը համերգային ծրագիրն է:

Խաղերի փակման արարողությունը տեղի կունենա օգոստոսի 21-ին, Կարեն Դեմիրճյանի անվան մարզահամերգային համալիրում: Այն նույնպես բաղկացած կլինի երկու մասից: Առաջին մասի ժամանակ մրցանակակիրները և առանձին անվանակարգերում հաղթած մարզիկները կստանան իրենց մրցանակները, իսկ դրան կհաջորդի համերգային ծրագիրը:

Բացման և փակման արարողությունները հեռարձակվելու են մի քանի հեռուստաընկերությունների ուղիղ եթերում: Սպասվում է, որ Խաղերի օրերին մայրաքաղաք Երևան կայցելեն 10 հազար զբոսաշրջիկներ»,- հայտարարեց Իշխան Զաքարյանը:

Ավելացնենք, որ Համահայկական խաղերն առաջին անգամ Հայաստանի Հանրապետությունում կայացել են ուղիղ 12 տարի առաջ: Այդ ժամանակ դրանք անցկացվում էին երկու տարին մեկ անգամ (Համահայկական 1-ին խաղերը տեղի են ունեցել 1999 թ., 2-րդ Խաղերը` 2001 թ., 3-րդ Խաղերը` 2003 թ.): 3-րդ Խաղերից հետո որոշում կայացվեց, որ դրանք այսուհետ կազմակերպվեն այնպես, ինչպես Օլիմպիական խաղերը, այսինքն` 4 տարին մեկ անգամ: 4-րդ Խաղերը կազմակերպվել են 2007 թ.: