Ձեր վստահելի աղբյուրը

«Աջակցություն Հայաստան-Թուրքիա հարաբերությունների բարելավմանը» ծրագրի շրջանակներում Հայաստանի արդյունաբերողների և գործարարների (գործատուների) միության նախաձեռնությամբ Երևանում այսօր անցկացվեց հայ-թուրքական գործարար համաժողով: Հայաստանի տարբեր գործարար ոլորտների ներկայացուցիչների հետ մեկտեղ հանդիպմանը մասնակցում էին Թուրքիայից` հիմնականում Վանից հրավիրված ավելի քան երեսուն գործարարներ, ովքեր աշխատում են տուրիզմի, տրանսպորտի, թեթև արդյունաբերության, շինարարության, կահույքագործության, ոսկերչության և առևտրի ոլորտներում:

«Մեզ համար Վանի նահանգը պատմական, հարազատ, քաղցր վերհուշ է` Աղթամարի կղզով և եկեղեցով, սիմվոլիկ մի նահանգ, որի հետ հարաբերությունների զարգացումը խիստ կարևորում ենք»,- համաժողովի բացմանն ասաց Հայաստանի Արդյունաբերողների և Գործարարների Միության նախագահ Արսեն Ղազարյանը` հավելելով, որ այս համաժողովի նպատակն է զարգացնել երկու երկրների միջև տնտեսական հարաբերությունները:

Ա.Ղազարյանը նշեց, որ «Աջակցություն Հայաստան-Թուրքիա հարաբերությունների բարելավմանը» ծրագիրն իրականացվում է ԱՄՆ Միջազգային զարգացման գործակալության օժանդակությամբ` կոնսորցիումի կողմից: Կոնսորցիումի կազմում ընդգրկված են Եվրասիա համագործակցություն հիմնադրամը, Երևանի մամուլի ակումբը, Մարդկային զարգացման միջազգային կենտրոնը և ՀԱԳՄ-ը: «Մենք ԱՄՆ-ի կառավարության կողմից այս ծրագրի իրականացումը բարձր ենք գնահատում, հատկապես այս էտապում, երբ սառեցված են հայ-թուրքական միջպետական արձանագրությունների վավերացումը և, ըստ էության Թուրքիայի քաղաքական ղեկավարության կոշտ քայլերի հետևանքով միջպետական հարաբերությունները կասեցված և սառեցված են»,- ասաց Ա.Ղազարյանը:

Ըստ գործարարի, սկսած 1993թ.-ից` սահմաների փակումից հետո, հայ-թուրքական հարաբերությունները զարգացել են գործարարների, հասարակությունների, ժողովուրդների միջև, բայց ոչ` պետությունների միջև: « Ես խոր համոզմունք ունեմ, որ մեր հարաբերությունները, ժողովրդական դիվանագիտությունը, տնտեսական, մշակութային շահը, հարևանի հետ հարաբերությունների պահպանումն ու զարգացումը մի օր կհաղթանակի: Իսկ մեր հարևան երկրի քաղաքական ղեկավարությունը կհասկանա իր սեփական ժողովրդի իրական շահը, հատկապես, երբ խոսքը գնում է Հայաստանի հետ սահմանամերձ քաղաքներին և մարզերին: Արդյունքում` մենք կունենանք բաց սահմաններ, նորմալ միջպետական հարաբերություններ»,- նշեց Ա.Ղազարյանը և հավելեց, որ հավակնությունները այս ծրագրից հաճախ ավելի մեծ են, քան պրակտիկ իրականությունն է, բայց ուրիշ ելք չկա, նշաձողը պետք է բարձր դնել, որպեսզի կարողանանք «քարը տեղից շարժել»:

«Ես ցանականում են, որ Վանից ժամանած թուրք գործարարները ավելի լավ ճանաչեն Երևանը և վերադառնալով` դառնան Հայաստանի բարի դեսպաններ թուրք հասարակության մեջ` հասարակական կարծիքը ձևավորելու, այն դրականը, որ կա Հայաստանի հանդեպ խորացնելու, մեծացնելու: Դա կբերի մեր երկու ժողովուրդների տնտեսական, մշակութային հարաբերությունների ամրապնդմանն ու գործընկերությանը»,- ընդգծեց Ա.Ղազարյանը:

Գործարարը նաև տեղեկացրեց, որ հայ գործարարները փոխադարձ այցով Վանում կլինեն այս տարվա աշնանը:

Նշենք, որ համաժողովի շրջանակներում «Հայկական և թուրքական տուրիստական ընկերությունների ասոցիացիայի» հիմնադրման վերաբերյալ փոխըմբռնման հուշագիր ստորագրվեց: Ասոցիացիայի հիմնական նպատակներն են` տուրիզմի բնագավառում հայ և թուրք անդամ կազմակերպությունների գործունեության համակարգում և ծագող խնդիրների հարթեցմանն աջակցություն, ինչպես նաև Հայաստանում և Թուրքիայում երկկողմ և միջազգային տուրիզմի խթանում: Ասոցիացիայի անդամ կարող են դառնալՀայաստանում և Թուրքիայում գործող բոլոր այն տուրիստական ընկերությունները, որոնք զբաղվում են կամ հետաքրքրված են երկու երկրների միջև տուրիզմի զարգացմամբ: