Ձեր վստահելի աղբյուրը

Արևելքում մի իմաստնություն կա. հալվա-հալվա ասելով բերանդ չի քաղցրանա: Ադրբեջանի իշխանությունների համար հազարամյակների փորձություն հաղթահարած այս ճշմարտությունը որևէ խորհուրդ չունի: Նրանք շարունակում են մերժել իրականությունն ու անօգուտ պայքար մղել դրա դեմ: Հերթական բռնկումը գրանցվել է այսօր. Ադրբեջանի ԱԳՆ-ն արձագանքել է շաբաթ օրը ՀՀ նախագահի ելույթին: Ինչպես միշտ` փաստերին հակադրվել են զգացմունքային բնորոշումներ:

Օգոստոսի 20-ին հանրապետության նախագահ Սերժ Սարգսյանը հանդիպել էր «Միասին 2011» համահայկական երիտասարդական կրթական ֆորումի մասնակիցների և «Արի տուն» ծրագրի շրջանակում Հայաստանում գտնվող սփյուռքահայ երիտասարդների հետ: Հանդիպման ընթացքում երիտասարդները հանրապետության ղեկավարից հետաքրքրվել էին ղարաբաղյան հիմնախնդրի կարգավորման հեռանկարների մասին: Ի պատասխան, երկրի ղեկավարն անհրաժեշտ էր համարել երիտասարդներին ներկայացնել մի շարք առանցքային իրողություններ:

Առաջին հերթին, Սերժ Սարգսյանն առանձնացրել էր հակամարտության պատճառը. Ադրբեջանի իշխանությունները մերժում են արցախցիների հիմնարար իրավունքների գոյությունը, և մասնավորապես սեփական ճակատագիրը տնօրինելու իրավունքը: «Տասնյակ տարիների ընթացքում ադրբեջանցի ժողովրդին ներշնչել են, որ Ղարաբաղն ադրբեջանական է և հիմա շատ մեծ բարդության առջև են կանգնած. որովհետև Ադրբեջանի ղեկավարները երբեք չեն փորձել, ցավոք հիմա էլ չեն փորձում, իրենց ժողովրդի հետ լինել անկեղծ, բաց խոսակցություն վարել և ասել` գիտե՞ք, ժողովուրդ, այդ հողը հայկական է, այդտեղ դարերով հայեր են ապրել և լավ կլինի, ու առաջին հերթին դա բխում է մեր շահերից, որպեսզի հարգենք այդ մարդկանց ազատությունը, որպեսզի նրանք էլ երջանիկ ապրեն, մենք էլ»,- նշել է Սերժ Սարգսյանն ու միաժամանակ վստահություն հայտնել, որ չնայած խնդրի բարդությանը, վաղ թե ուշ խնդիրը լուծվելու է, ու այդ լուծումը երջանկություն է բերելու թե Հայաստանի, թե Լեռնային Ղարաբաղի և թե Ադրբեջանի ժողովրդին:

Նախագահի առանձնացրած մյուս իրողությունն ընթացիկ վիճակում Ադրբեջանի իշխանությունների վարած քաղաքականությունն է, որն ըստ էության, ոչ միայն միտված չէ հակամարտության լուծման համար անհրաժեշտ նախադրյալների ստեղծմանը, այլև մեծապես վտանգում է այն ու սպառնում հակամարտությունը վերադարձնել զինված դիմակայության փուլ: «Իսկապես բարդ գործընթաց է: Ինչպե՞ս կարող է բարդ չլինել, երբ բառացիորեն ամեն օր Արդրբեջանի ղեկավարների շուրթերից հակահայկական խոսքեր են հնչում, երբ հետևողականորեն ատելություն է քարոզվում: Գիտե՞ք, մեր սերունդը մի տեսակ հարմարվել է դրան, որովհետև սա առաջին տարին չի` կարծես նույն ձայնասկավառակն է պտտվում. պարզապես մեկ-մեկ որոշակի նոր ելևէջներ են մեջտեղ գալիս: Դուք, իհարկե, չեք կարող հիշել, բայց ձեր ծնողները, ձեր ավագ բարեկամները պետք է որ հիշեն 90-ական թվականների սկզբները, երբ Ադրբեջանի նախագահները` Այազ Մութալիբով, Աբուլֆազ Էլչիբեյը, այս նույն պատմությունն էին պատմում` թե ինչքան հզոր է Ադրբեջանը և ինչքան թույլ են Հայաստանն ու Ղարաբաղը, թե ինչքան շատ են ադրբեջանցիները և ինչքան քիչ են հայերը: Հիմա էլ նույն պատմությունն է, այդպես չէ՞: Ադրբեջանի նախագահն անընդհատ հայտարարում է, որ Ադրբեջանը շատ փող ունի, տնտեսապես հզոր է, Ադրբեջանում 9 միլիոն են, Հայաստանում մարդ չի մնացել և այլն: Ադրբեջանն ունեցել է ընդամենը մեկ նախագահ, ով շատ թե քիչ իրատեսական էր խոսում: Մնացած բոլորը խոսում էին այսօրվա պես: Ի՞նչ եղավ արդյունքը: Բոլորն էլ շատ լավ գիտեն` ինչ եղավ: Ես վստահ եմ, որ ռազ¬մական գործողությունները ոչ մի տեղ տանող ճանապարհ են»,- նշել է ՀՀ նախագահը:
Ինչպես երևում է նախագահի խոսքից, առանց որևէ զգացմունքայնության հստակ նշվել է, որ առայժմ Ադրբեջանի գործողությունները միտված են հայերի հանդեպ թշնամանքի ու ատելության սերմանմանը, ինչպես նաև խնդիրը զինված ճանապարհով լուծելուն: Այստեղ տեղին է ՀՀ նախագահի արձանագրած մյուս իրողությունը. «Ադրբեջանն այսօր ի վիճակի չէ ռազմական գերակշռություն ունենալ մեր նկատմամբ»:

Նախագահի առանձնացրած երրորդ` ամենակարևոր իրողությունն այն է, որ ԼՂ բնակչությունը, ի հեճուկս Բաքվի ցանկությունների, տեր է իր իրավունքներին և հնարավոր բոլոր միջոցներով իրացրել ու իրացնելու է դրանք, որի ապացույցն իր անկախության բոլորման քսանամյակի նախօրեին գտնվող Լեռնաին Ղարաբաղի Հանրապետությունն է: «Լեռնային Ղարաբաղի ժողովուրդը վաղուց արդեն ինքնորոշվել է ու ինքն էլ հիմա տնօրինում է իր ճակատագիրը: Իսկ այսօր Լեռնային Ղարաբաղի Հանրապետությունը ճանաչված լինելու խնդիր ունի, ինչը վաղ թե ուշ, միևնույն է, լուծվելու է: Այլ հարց է, թե ե՞րբ, որովհետև ինչքան շուտ, այնքան ավելի լավ և՛ Ադրբեջանի, և՛ Հայաստանի, և՛ Ղարաբաղի համար»,- ընդգծել էր Սերժ Սարգսյանը:

Ներկայացված դատողություններից որևէ մեկի ճշմարիտ լինելը կասկածից վեր է: Իսկապես ղարաբաղա-ադրեբաջանական հակամարտությունը շատ բարդ է, և լուծումն էլ բարդ գործընթաց: Դրա լուծումը կարող է բաօրրություն ու երջանկություն բերել տարածաշրջանի բոլոր բնակիչներին, մինչդեռ որևէ տեղ չտանող ռազմական արկածախնդրությունները կարող են միայն բարդացնել խնդիրն ու հավելյալ տառապանքի պատճառ դառնալ: Իսկապես, Ադրբեջանի իշխանությունները մերժել են արցախահայերի տարրական իրավունքների գոյությունն ու այսօր էլ շարունակում են նույն գիծը: Իսկապես պետական մակարդակով անհանդուրժողականություն ու ատելություն են քարոզում և իսկապես ռևանշիստական բնույթների սպառնալիքներ են տեղում: Եվ իսկապես, ԼՂ ժողովուրդն ինքորոշվել ու փաստացի կայացրել է իր անկախ պետականությունը և այսօր ընդամենը իրավական ճանաչման խնդիր ունի:
Այս ամենը փաստեր են. կոնկրետ փաստաթղթեր, հրապարակային հայտարարություններ, միջազգային ամենատարբեր կառույցների ու միջնորդների փաստագրումներ, մարդկային քաղաքակրթության փորձով ապացուցված անվիճելի ճշմարտություններ:

Բայց այդ ամենը Բաքվի իշխանությունների սրտով չէ: Նրանք ամեն կերպ ընդդիմանում են փաստերին ու ճշմարտություններին: «Իր խողովրդին խաղաղության նախապատրաստելու ու այդպիսով տարածաշրջանի զարգացմանն ու նրա բարգավաճմանը նպաստելու փոխարեն արմատականացնում է հայ հանրությանը: Հայաստանի նախագահն իր արտահայտություններով ի ցույց է դնում իր իրական նկրտումներն ու քողազերծում է Հայաստանի իրական քաղաքականությունը, ինչը ևս մեկ անգամ վկայում է, որ նա ոչ թե խաղաղություն է փնտրում և չի ցանկանում հեռանալ իր ապակառուցողական քաղաքականությունից»,- այսօր հայտարարել է Ադրբեջանի ԱԳՆ ներկայացուցիչը:
Թե ինչո՞վ է հայ հանրությունն արմատականանում ու ինչո՞ւմն է Հայաստանի քաղաքականության ապակառուցողականությունը, Ադրբեջանի ԱԳՆ-ն չի կոնկրետացնում: Անգամ չի նշվում, թե ՀՀ նախագահի հատկապես որ արտահայտությունն է նրանց նման բնորոշումների տեղիք տվել: Հավանաբար, գիտելիքները բավարարել են հասկանալու համար, որ յուրաքանյուր առանձին փաստագրման դեպքում կարելի է հարյուրավոր հիմնավորումներ նշել, ուստի որոշել են հենց այնպես, օդի մեջ ընդդիմանալ, քամի անել, մի խոսքով` հալվա գոռալ: Մինչդեռ հալվան վայելում են արցախցիները: