Ձեր վստահելի աղբյուրը

Այսօր ՀՀ Ազգային ժողովի «Ժառանգություն» խմբակցության պատգամավոր Անահիտ Բախշյանը աշխատանքի և սոցիալական հարցերի փոխնախարար Ֆիլարետ Բերիկյանի հետ համատեղ ասուլիսում հայտարարեց, թե 2010թ.-ին մարզպետարանների ընտանիքի, կանանց և երեխաների իրավունքների պաշտպանության բաժինները խախտել են անցած տարվա հուլիսին տարածքային կառավարման ու աշխատանքի և սոցիալական հարցերի նախարարների կողմից ստորագրված համատեղ հրամանով տվյալ բաժինների համար սահմանված կանոնադրությունը:

Մինչդեռ, ըստ Ա Բախշյանի, այս տարի տարածքային կառավարման նախարարություն ներկայացվել է մարզպետարանների համապատասխան բաժինների գործունեության վերաբերյալ հաշվետվություն, որտեղ բաժինների կանոնադրությամբ պահանջվող երեխաների սոցիալական պաշտպանությանն ուղղված պետական նպատակային ծրագրերի մշակման և դրանց կատարման ապահովման ուղղությամբ բաժինների կողմից իրականացված ծրագրերի մասին ոչ մի խոսք չի եղել: Նրա խոսքերով, հաշվետվություններում ընդհանուր բառերով գրված են միայն տեղական և միջազգային բարեգործական հասարակական կազմակերպությունների կողմից իրականացված ծրագրերը և ոչ մի խոսք այն մասին, թե երեխաների պաշտպանությանն ուղղված ինչ գործառույթներ են իրականացվել:

«Ավելին` վերոնշյալ կազմակերպությունների իրականացրած ծրագրերի ճնշող մեծամասնությունը ոչ թե զարգացման, այլ հումանիտար օգնության ծրագրեր են, որոնցով խորացնում են ընտանիքներում «մուրացիկի» արմատացող հոգեբանությունը»,- նշեց Ա. Բախշյանը:

Պատգամավորի պարզաբանմամբ` երեխայի իրավունքների պաշտպանության որևէ մարզի բաժին իր կանոնադրական գործառույթներին համապատասխան հաշվետվության մեջ չի ներկայացրել, թե մարզում հանրակրթությունից դուրս մնացած քանի երեխա են հայտնաբերել, նրանցից քանիսին են օգնել ընդգրկվել կրթության մեջ, մանկուց քանի հաշմանդամ երեխա կա, նրանցից քանիսն են ընդգրկված կրթական հաստատություններում, ներառական դպրոցներում, առանց ծնողական խնամքի մնացած քանի երեխա կա մարզերում, քանիսն են ուղղորդվել մանկատուն և այլն:

Ա.Բախշյանը ընդգծեց, որ հիմնվելով պաշտոնական և պետական պաշտոնյաների տրամադրած տվյալների վրա 2010 թ.-ի կտրվածքով արել է մի շարք վերլուծություններ: Մասնավորապես, ըստ վիճակագրական ծառայության տվյալների 2010թ.-ին 6-17 տարեկան երեխաների թիվը Հայաստանում կազմել է 498060, ըստ ֆինանսների նախարարության տվյալների` 386632 երեխա: Մինչդեռ կրթության նախարարության «Հանրակրթությունը Հայաստանում 2009-2010 ուս. տարում» տեղեկագրի համաձայն` 392946 երեխաներ, որոնք ընդգրկված են բոլոր տեսակի հանրակրթական ծրագրեր իրականցնող դպրոցներում: «Եթե երեխան 6 տարեկան է և կրթության իրավունք ունի, ապա նշանակում է, որ այդ երեխաները պետք է լինեն կրթության մեջ: Մինչդեռ 100 հազարից ավելի երեխա կրթական համակարգից չի օգտվել»,- նկատեց պատգամավորը:

Նա նաև տեղեկացրեց, որ մարզպետներից և Երևանի քաղաքապետից խնդրել է տվյալներ տրամադրել 2010թ.-ում հանրակրթական բոլոր տեսակի դպրոցներում սովորող երեխաների մասին: Ըստ այդմ` դպրոցներում սովորողների թիվը կազմել է 381699 երեխա, որը 11247-ով տարբերվում է ԿԳՆ պաշտոնական տեղեկագրում ընդգրկված թվից:

Սակայն, աշխատանքի և սոցիալական հարցերի փոխնախարար Ֆիլարետ Բերիկյանը նշեց, թե նախարարների համատեղ հրամանով սահմանված կանոնադրությունը մարզպետարանների տվյալ բաժինների կողմից բացարձակապես չի խախտվել: Իսկ ինչ վերաբերում է վերոնշյալ թվերին, ապա, ըստ փոխնախարարի` դա ոչ թե իրենց, այլ ԿԳՆ գործառույթների մեջ է մտնում, ուստի այդ աշխատանքով պետք է զբաղվի տվյալ նախարարությունը: