Ձեր վստահելի աղբյուրը

Օգոստոսի 31-ին հայ հայտնի երգիչ Անդրեի ինտերնետային էջը կոտրվել էր ադրբեջանցի հաքերների կողմից: www.andre.am  կայքէջում տեղադրել էր զինվորական հագուստով Մուբարիզ Իբրահիմովի լուսանկարը հետևյալ գրությամբ` «We Never Forget Mubariz Ibrahimov !», այսինքն` «Մենք երբեք չենք մոռանա Մուբարիզ Իբրահիմովին»:

Նշենք, կայքերի կոտրումը քրեորեն պատժելի արաք է, իսկ կիբերհանցագործությունը գտնվում է միջազգային կառույցների ուշադրության կենտրոնում:

Մեկնաբանությունների համար Panorama.am-ի խմբագրությունը դիմել է Անդրեին, ով պատմել է, թե իր նկատմամբ ադրբեջանցիների այլատյաց հարձակումները շարունակվում են 2006 թ-ից ի վեր, երբ արցախցի երգիչը «Եվրատեսիլ» երգի մրցույթում ներկայացնում էր Հայաստանը:

- Ինչպե՞ս հայտնաբերեցիք, որ ձեր կայքը կոտրված է:
- Երբ վերադարձա Միացյալ Նահանգներից, հեռախոսիս հաղորդագրություններ ու զանգեր սկսեցին գալ ընկերներիս կողմից, ովքեր ասում էին, թե կայքս կոտրված է: Ցավոք, սա առաջին դեպքը չէ: 2006 թ-ին երկու փորձ եղել է, երբ հայտնի դարձավ, որ ես, լինելով ծնունդով արցախցի, ներկայացնելու եմ Հայաստանը «Եվրատեսիլին»: Այդ ժամանակ մի քանի ժամում կայքի աշխատանքը հաջողվեց վերականգնել: Այս անգամ ևս ես օպերատիվ կերպով դիմեցի համապատասխան կառույցներին, որոնք զբաղվում են այդ հարցով:

- Այսինքն, հայատյացությունը դուք ձեր վրա զգացել եք միայն այն պատճառով, որ ծնվել եք Արցախու՞մ:
- Ես բազմաթիվ նամակներ եմ ստացել ադրբեջանցիների կողմից ինձ և իմ ընտանիքին ուղղված սպառնալիքներով: Բոլոր այդ տվյալները պահել ու փոխանցել եմ համապատասխան կառույցներին: Բացի այդ, ադրբեջանական կողմը դիտավորյալ ակցիա էր կազմակերպել Եվրոպական հեռարձակման միության հանդեպ, իմ կենսագրությունից Արցախի, Ստեփանակերտի ու Լեռնային Ղարաբաղի հանրապետության վերաբերյալ բոլոր հիշատակումներն հանելու պահանջով: Առավելագույնը, ինչին կարողացան հասնել, դա «հանրապետություն» բառի ջնջումն էր, ամեն ինչ նույնը մնաց: Ես ներկայացնում էի Հայաստանը «Եվրատեսիլին», իսկ կենսագրությունումս հստակ նշված էր, որ ես Լեռնային Ղարաբաղի մայրաքաղաք Ստեփանակերտից եմ, իսկ Ադրբեջանի վերաբերյալ, բնականաբար, ոչ մի հիշատակում չկար:

-Ինչ եք կարծում, ինչո՞ւ եք կրկին դարձել ադրբեջանցի ազգայնականների թիրախը: 
- Այս անգամ, կարծում եմ, դա կապված է այն հանգամանքի հետ, որ «Եվրատեսիլում» Ադրբեջանի հաղթանակից հետո, իմ բոլոր ֆան ակումբներում խոսվում էր երկրորդ անգամ Բաքվում 2012 թ-ի մրցույթին մասնակցելու մասին: Բանն այն է, որ ամեն անգամ, երբ ինձ հարցնում էին, թե չեմ ցանկանում վերադառնալ մրցույթ, ես կատակով ասում էի, թե կանեմ դա միայն մեկ դեպքում, եթե «Եվրատեսիլն» անցնի Բաքվում: Եթե ավելի լուրջ, ապա կասեմ, որ համապատասխան որոշման դեպքում, ես պատրաստ եմ մեկնել Բաքու և ներկայացնել Հայաստանը: Ամենայն հավանականությամբ, առաջնորդվելով այս լուրով, ադրբեջանցի հակերները որոշել են գործի անցնել: Նրանք, սակայն, ոչ մի կերպ չեն հասկանում, որ նմանատիպ չնչին ու խղճուկ ստորություններով ոչ ինձ, ոչ ել հայ ժողովրդին չեն վնասի: Ամենամեծ հաղթանակը, ինչին գնացել ենք դարերով, արդեն մենք տարել ենք` դա Արցախի անկախությունն է: Իսկ «Եվրատեսիլին» վերաբերվում ենք որպես մրցույթի: Այնտեղ չի որոշվում, թե որ ազգն է հաղթում: Դա ընդամենը երգի մրցույթ է, որտեղ այս տարի հաղթեց Ադրբեջանը ներկայացնող շվեդ հեղինակը, ընդամենն այսքանը: Թող նրանք իրենց միլիոնները ծախսեն այդ մրցույթի վրա, և Արցախի ժողովուրդն էլ կազատվի ավելորդ գլխացավանքից: