ՀԵՀ. «Պահանջում ենք գիտության ֆինանսավորման ավելացում» նախաձեռնության էջում ջնջվում են կառուցողական առաջարկները
Այս մասին հայտարարությամբ քիչ առաջ հանդես եկավ Հայաստանի երիտասարդական հիմնադրամը: «Վերջին շրջանում բավականին ակտիվացել են տարբեր քաղաքացիական նախաձեռնությունները, ինչը ողջունելի է և վկայությունն է այն բանի, որ հասարակության մեջ կոտրվում է անտարբերությունը երկրում տեղի ունեցող գործընթացների նկատմամբ։ Հասարակական այս ակտիվությունը, կարծում ենք, հայրենասիրության ամենամեծ դրսևորումներից մեկն է և անչափ կարևոր է քաղաքացիական հասարակության զարգացման համար։
Ապրիլին գիտակրթական հայտարարություններ տարածող ԱՐՄԱԿԱԴ ցանցը մի քանի օրով դադարեցրեց իր գործունեությունը՝ բարձրաձայնելով գիտության նկատմամբ ոչ բավարար վերաբերմունքը և կոչ անելով բոլորին միանալու ֆեյսբուքում բացված «Պահանջում ենք գիտության ֆինանսավորման ավելացում» նախաձեռնությանը։
Նախաձեռնության անդամները պահանջում են ՀՀ կառավարությունից «անհապաղ, կտրուկ և առանց նախապայմանների գիտության ֆինանսավորման աճ (մոտ ապագայում մինչև ՀՆԱ-ի 2-3%), գիտնականների և ասպիրանտների միջին աշխատավարձի անհապաղ քառապատկում։ Այդ քայլերն իրականացնելուց հետո անընդհատ աջակցում գիտությանը, մասնավորապես մաքսային և այլ կառավարության մարմինների շփման դյուրացում, կոնսուլտացիաների և արտոնությունների, հասարակության հետ շփումների և բիզնես միջավայրի հարթակների տրամադրում և այլ օպերատիվ համագործակցություն»։
Նախաձեռնությունն անմիջապես ունեցավ իր արձագանքը։ Իշխանության տարբեր օղակներում ընդունեցին խմբի անդամներին, ծանոթացան նրանց խնդիրներին և առաջարկներին։ Այս ամենը վկայությունն է այն բանի, որ հանրապետության ղեկավարությունը մշտապես կարևորում է գիտության ոլորտը և ունկնդիր է գիտնականների բարձրացրած հարցերին։ Բոլորը քաջ գիտակցում են, որ ապագան գիտելիքահենք տնտեսությանն է, և հնարավորը պետք է անել գիտության առաջանցիկ զարգացման համար։ Ի դեպ, առաջիններից մեկը, որ ընդունեց «Պահանջում ենք գիտության ֆինանսավորման ավելացում» խմբին և քննարկեց բարձրացված հարցերը, Հայաստանի երիտասարդական հիմնադրամի հոգաբարձուների խորհրդի համակարգող, ԱԺ պատգամավոր Կարեն Ավագյանն էր։
«Պահանջում ենք գիտության ֆինանսավորման ավելացում» նախաձեռնությունը հիմնական շեշտը դրել է սոցիալական ցանցում թափանցիկ քննարկումների և մասնակիցների՝ սեփական նախաձեռնությամբ ծրագրերի առաջարկների վրա։ Սակայն նախաձեռնությունը, կարծես թե, այնքան է տարվել իշխանությունների հետ ուլտիմատումով խոսելու ոճով, որ ֆեյսբուքյան էջում արդեն տևական ժամանակ ջնջում է կառուցողական բնույթի ցանկացած առաջարկ և մեկնաբանություն։ Նման խտրական վերաբերմունքի արժանացել են ինչպես Հայաստանի երիտասարդական հիմնադրամի աշխատակիցների, այնպես էլ բազմաթիվ այլ քաղաքացիների առաջարկներն ու մեկնաբանությունները։ Նախաձեռնողները հավանաբար ճշմարտությունը լսելու կամ այլակարծությունը հանդուրժելու համարձակություն չունեն։
Իսկ ճշմարտությունն այն է, որ գիտությունն ու գիտության մշակներն այնուամենայնիվ ուշադրության կենտրոնում են։ Եվ ինչպես պետական կառույցները, այնպես էլ շատ այլ կազմակերպություններ մշտապես օժանդակում են գիտնականներին իրենց տարբեր ձեռնարկումներում։ Մենք չենք ցանկանում թվարկել այն բոլոր ծրագրերը, որ Հայաստանի երիտասարդական հիմնադրամն իրականացնում է երիտասարդ գիտնականներին աջակցելու և «Պահանջում ենք գիտության ֆինանսավորման ավելացում» նախաձեռնությանն օժանդակելու համար։ Հավատացեք, այդ ծրագրերը բազմաթիվ են և ամեն քայլափոխի պետությանը գիտության նկատմամբ անտարբերության մեջ մեղադրողները դրանք շատ լավ գիտեն ու անձամբ իրենք էլ օգտվում են։ Պարզապես այդ ամենը խոստովանելու և գնահատելու համարձակություն է պետք։
Օգտվելով առիթից՝ Հայաստանի երիտասարդական հիմնադրամը շնորհավորում է բոլորին Գիտելիքի օրվա առթիվ։ Մենք կոչ ենք անում երիտասարդներին չկորցնել ժամանակը և որքան հնարավոր է շատ գիտելիքներ կուտակել։ Այսօր ձեռք բերած գիտելիքն է, որ հետագայում յուրաքանչյուր անհատի և մեր պետությանը բերելու է բարեկեցիկ կյանք ու հզոր ապագա»,-ասված է հիմնադրամի տարածած հայտարարության մեջ:
Լրահոս
Տեսանյութեր
Կլինի այնպիսի մի շաբաթ, երբ որ այդ լուրը գուցեև ճիշտ լինի. Ավանեսյանը՝ ՔՊ-ի թիրախում լինելու մասին
