Ձեր վստահելի աղբյուրը

Վայքում օգոստոսի 14-ին ծնված և այժմ «Մուրացան» համալսարանական հիվանդանոցի նորածնային վերակենդանացման բաժանմունքում գտնվող երեխան ծնվել է շնչահեղձուկով (ասֆիքսիա): Շնչահեղձուկի առաջացման պատճառը եղել է պորտալարի հանգույցը: Այդ մասին Panorama.am-ի թղթակցի հետ զրույցում տեղեկացրեց Առողջապահության նախարարության մոր և մանկան առողջության պահպանման վարչության պետ Կարինե Սարիբեկյանը, ով այցելել է «Մուրացան» և ծանոթացել երեխայի առողջական վիճակին:

Նրա խոսքով, երեխայի ծնվելուց հետո, երբ Վայքի ծննդատունը Երևանում տեղյակ է պահել, որ ծնված երեխան ծանր վիճակում է, արագ արձագանքման նեոնատալ ծառայության ռեանիմոբիլը Վայքից երեխային տեղափոխել է Մուրացան կլինիկա:

Մեր խնդրանքով անդրադառնալով նորածնի հարազատների պնդումներին, թե ծննդկանին ծննդաբերելուց երեք օր առաջ ներարկած «անալգին-դիմեդրոլը» ազդել է երեխայի վրա և հնարավոր է հենց այդ պատճառով էլ երեխան հիմա վատ վիճակում է, Կարինե Սարիբեկյանը «խելքին մոտ» չհամարեց: «Խելքին մոտ չէ, որ անալգին-դիմեդրոլը նման ազդեցություն թողած լինի, որովհետև` նախ սրսկել են ծննդաբերելուց երեք օր առաջ, այնուհետև միջմկանային ճանապարհով սրսկելու դեպքում դեղը պտղի վրա ազդեցություն չի կարող ունենալ», -հավելեց մասնագետը:

Տիկին Սարիբեկյանի խոսքով, այս պահին հանրապետության տարբեր բժշկական կենտրոններում 24 երեխա վերակենդանացման բաժանմունքում են գտնվում: «Երեխաները նաև պրոբլեմներով են ծնվում: Ամենազարգացած տեխնոլոգիաների պայմաններում հիվանդ երեխաներ ծնվում են: Տարեկան 45 հազար երեխա է ծնվում, և չեն կարող պրոբլեմներով դեպքեր չլինել», -նշեց նա:

Ինչևէ, Առողջապահության նախարարի հրաման-պահանջով այժմ ուսումնասիրություններ են կատարվում` պարզելու, թե արդյոք բժշկական էթիկայի խախտում է տեղի ունեցել և արդյոք բժիշկներն իրենց պարտականություններն ըստ արժանվույն չեն կատարել: Բացի այդ, ըստ Սարիբեկյանի, իրենք Վայքի ծննդատնից պահանջել են նաև հղիության վարման վերաբերյալ բոլոր փաստաթղթերն ու բացատրագրերը: «Այն, որ բժշկական էթիկայի հետ կապված խնդիրներ կարող են լինել, ես չեմ բացառում: Պետք է պարզենք, հասկանանք, լսենք բոլոր կողմերին: Բայց եթե պարզվի, որ եղել են խնդիրներ էթիկայի հետ կապված և մասնագիտական պարտականությունները բժիշկների կողմից կատարվել են ոչ լիարժեք, ապա միանշանակ, մարդիկ կպատժվեն», -հավելեց մեր զրուցակիցը:

Հիշեցնենք, որ Վայքում ծնված երեխայի հարազատները դժգոհում էին ծննդատան բաժնի վարիչ Մետաքսյա Հովհաննիսյանի վերաբերմունքից և նրան մեղադրում երեխային այս վիճակին հասցնելու համար:

Հ. Գ. Ասֆիքսիան կամ շնչահեղձուկը ախտաբանական վիճակ է, որը պայմանավորված է, երբ նորածնի մոտ խանգարվում է գազափոխանակությունը, այսինքն օրգանիզմում շատանում է ածխաթթու գազը: Նորածինների ասֆիքսիայի ժամանակ սրտի զարկերը կան բայց շնչառություն չկա, կամ էլ անկանոն է: Ասֆիքսիայի ծանրության աստիճանը պայմանավորված է թե պտուղը ներարգանդային կյանքում ինչքան է եղել ասֆիքսիայի մեջ: Ասֆիքսիան լինում է նախածննդյան`պրենատալ, ներծննդյան կամ ծննդաբերության ժամանակ `ինտրանատալ և հետծննդյան` պոստնատալ: