Ձեր վստահելի աղբյուրը

Վայքի ծննդատանն այս օրերին ծառայողական քննություն է ընթանում, և ծննդատան բաժանմունքի վարիչ Մետաքսյա Հովհաննիսյանի գործունեությունը կասեցվել է: Այդ մասին Panorama.am-ին տեղեկացրեց Վայոց ձորի մարզպետարանի առողջապահության և սոցիալական ապահովության վարչության պետ Արտաշես Գալստյանը: «Այդպիսի պրակտիկա գոյություն ունի. կասեցնում են գործունեությունը մինչև պարզվի նրա մեղավորությունը, մեղավո՞ր է նա, թե՞ ոչ և այլն», -հավելեց պարոն Գալստյանը:

Վայքի հիվանդանոցում առողջապահության նախարարի հրամանով ստեղծված հատուկ հանձնաժողովը պետք է ուսումնասիրություն անցկացնի: Բայց մինչ այդ, ինչպես Գալստյանը փոխանցեց, բժշկական բոլոր փաստաթղթերը ուղարկվել են նախարարություն: Մեր հարցին, թե վարչության պետը ի՞նչ է հասկացել նույն փաստաթղթերը ուսումնասիրելիս, Գալստյանն ասաց. «Մենք բժշկի կողմից որևէ խախտում չենք հայտնաբերել. բոլոր հետազոտությունները և մասնագիտական մյուս գործերն արված են եղել»:

Վայքում օգոստոսի 14-ին ծնված և այժմ «Մուրացան» համալսարանական հիվանդանոցի նորածնային վերակենդանացման բաժանմունքում գտնվող երեխայի հարազատները աղմկահարույց հայտարարություն էին արել` երեխայի ներկայիս ծանր վիճակի համար մեղադրելով նույն Մետքասյա Հովհաննիսյանին:

Panorama.am-ի հետ զրույցում տիկին Խաչատրյանը ներկայացնելով իրավիճակը, նշել էր, որ Վայքի ծննդատանը ծննդկանների հանդեպ բժիշկների անտարբեր վերաբերմունքը նորություն չէ և դա է պատճառը, որ այստեղ անառողջ երեխաներ են ծնվում: Այս առնչությամբ Գալստյանն ասաց, որ Վայքում վերջին վեց տարիների ընթացքում մանկական մահ չի գրանցվել: «Նման ցուցանիշ Հայաստանում չկա, ճիշտ չեն ասում և ընդհանրապես այդ կնոջ ասածների մեջ ինձ համար տխուր հետևություններ անելու թեմա կար ու ես հասկացա` այդ ինչպես է լինում, որ Գյումրիում բժշկին տալիս-սպանում են», -նշեց նա:

Նույն տիկին Խաչատրյանի այն հայտարարությանը, թե բժշկուհի Հովհաննիսյանը ծննդաբերող հղիին զննել է ու ասել, թե «հլա ունի կես ժամ, մի ժամ ես գնամ բուրդս հավաքեմ գամ», Գալստյանը ծիծաղելով արձագանքեց. «Բուրդ չփխելը ծանր աշխատանք է, և գինեկոլոգին, իմ կինն էլ է գինեկոլոգ, չի կարելի ծանր աշխատանք անել, չէ՞ որ նրանք ձեռքերով…»:

Առողջապահության նախարարության մոր և մանկան առողջության պահպանման վարչության պետ Կարինե Սարիբեկյանը, ով այցելել էր «Մուրացան» և ծանոթացել երեխայի առողջական վիճակին Panorama.am-ին ասել էր, որ երեխան ծնվել է շնչահեղձուկով (ասֆիքսիա), որի առաջացման պատճառը եղել է պորտալարի հանգույցը: