Ձեր վստահելի աղբյուրը

Այն, որ Հայաստանի ֆուտբոլի ազգային հավաքականն Անդորրայում կկարողանա 3 միավոր վաստակել, կասկած չէր հարուցում, թեպետ թիմի գլխավոր մարզիչ Վարդան Մինասյանն առիթը բաց չէր թողնում` հայտարարելու, որ այսօրվա մրցակիցը բավական ուժեղացել է ու ավելի ագրեսիվ ֆուտբոլ է ցուցադրում: Խաղը, իհարկե, ցույց տվեց, որ Վարդան Մինասյանը ճիշտ էր գնահատել մրցակցին. անդորրացիներն այս անգամ ավելի համարձակ էին առաջ գնում, ինչը չէր նկատվում անցած աշնանը Երևանում կայացած խաղում:

Այս հանդիպումը, սակայն, պետք է ցույց տար, թե ինչպիսի ներուժով է մեր ընտրանին մոտենում աշնանային պատասխանու հանդիպումներին: Լիտվացիներից ստուգողական վերջին խաղում կրած պարտությունն ինչ-որ չափով թուլացրել էր ֆուտբոլասերների լավատեսությունը, և այն վերադարձնել կարող էր միայն վստահ հաղթանակը: Այն, ի դեպ, ոչ միայն 3 միավոր է պարգևում մեր թիմին, այլև վստահություն` Սլովակիայի ընտրանու հետ սեպտեմբերի 6-ին կայանալիք արտագնա հանդիպումից առաջ:

Խաղի մեկնարկում մեր ֆուտբոլիստները տիրում էին նախաձեռնությանը, սակայն Անդորրայի ընտրանին ոչ միայն կարողանում էր հետ մղել գրոհները, այլև, գործելով հակագրոհների նշանաբանով, փորձում էր օգտագործել հնարավորությունները` արդյունքի հասնելու համար: Անդորրացիները ձգտում էին հնարավորինս արդյունավետ օգտագործել ստանդարտ իրավիճակները, ամեն առիթով վայր էին ընկնում ու երկար ժամանակ թավալվում խոտածածկին` հուսալով, որ մրցավարը կզգուշացնի հայ ֆուտբոլիստներին…

Առաջին խաղակեսի վերջնամասում մեր տղաները, զգալով, որ խաղն ընթանում է դաշտի տերերին ձեռնտու հունով, անցան վճռական գործողությունների: Արթուր Սարկիսովը, գերազանց փոխանցում ստանալով Էդգար Մանուչարյանից, սուր անկյան տակ հարվածեց, սակայն Խոսե Գոմեսին հաջողվեց հեռացնել գնդակը: Մեր թիմի հաջորդ գրոհն ավարտվեց դարպասի գրավմամբ. 34-րդ րոպեին Մարկոսը հեռահար գեղեցիկ հարվածով գնդակն ուղարկեց մրցակցի դարպասի հեռավոր անկյունը` դնելով անդորրացիների ջախջախման գործընթացի սկիզբը:

Երկրորդ խաղակեսում հայ ֆուտբոլիստների գրոհներն ավելի վտանգավոր դարձան: Զգացվում էր, որ դաշտի տերերը հոգնել են, իսկ հյուրերն աստիճանաբար ավելացնում են գրոհների թափը: 49-րդ րոպեին Էդգար Մանուչարյանը գրոհի նետեց Գևորգ Ղազարյանին, սակայն վերջինս չկարողացավ իրեն ենթարկել գնդակը, և դարպասապահը չեզոքացրեց սպառնալիքը: Երկու րոպե անց գոլային հիանալի հնարավորությունը կորցրեց Էդգարը. նա մեն-մենակ մնաց դարպասապահի դեմ, սակայն սուր անկյան տակ նրա կատարած հարվածից հետո գնդակն աննշան շեղությամբ անցավ ուղղահայաց դարպասաձողի կողքով: Քիչ անց Սերխիո Գոմեսն ստիպված էր հետ մղել Հենրիխ Մխիթարյանի վտանգավոր հարվածը:

Հանդիպման վերջնամասում Հայաստանի հավաքականն առավել ուժեղացրեց ճնշումը մրցակցի դարպասի վրա: 70-րդ րոպեին Գևորգ Ղազարյանի հարվածն իր վրա ընդունեց հորիզոնական դարպասաձողը: Իսկ 5 րոպե հետո Հայաստանի ընտրանու հերթական գրոհը պսակվեց հաջողությամբ. Սարկիսովը տուգանային հրապարակում գերազանց խաղաց` գնդակը հասցեագրելով Գևորգ Ղազարյանին: Վերջինս ազատվեց պաշտպաններից, տեղաշարժվեց դեպի աջ և գնդակն ուղարկեց դարպասի հեռավոր անկյունը` 2:0:
Սակայն վերջին խոսքն այս խաղում պետք է ասեր Հայաստանի հավաքականի առաջատարներից մեկը` Հենրիխ Մխիթարյանը: 90-րդ րոպեին Իլդեֆոնս Լիման սեփական տուգանային հրապարակում տապալեց Արթուր Էդիգարյանին: Արդյունքում նա կարմիր քարտով հեռացվեց խաղադաշտից, իսկ մրցավարը 11 մետրանոց հարված նշանակեց դաշտի տերերի դարպասին: Այն հստակ իրացրեց Հենրիխը` 3:0:
Հայաստանի հավաքականը, այսպիսով, ընթացիկ ընտրական փուլում առաջին թիմն է, որին հաջողվել է Անդորրայում 3 գնդակ խփել դաշտի տերերի դարպասը: Հույս ունենանք, որ այս հաղթանակը վստահություն կհաղորդի մեր ֆուտբոլիստներին, և նրանք 4 օր հետո Սլովակիայում հերթական 3 միավորը կվաստակեն` շարունակելով պայքարել «Եվրո-2012»-ի ուղեգրի համար:
Ավելացնենք, որ «B» խմբի մրցաշարային աղյուսակը շարունակում է գլխավորել Ռուսաստանի հավաքականը, որն այսօր 1:0 հաշվով պարտության մատնեց Մակեդոնիայի ազգային թիմին և իր միավորների քանակը հասցրեց 16-ի: Իրենց ակտիվում 13-ական միավոր ունեցող Իռլանդիայի ու Սլովակիայի հավաքականներն այս պահին խաղում են Դուբլինում: Մեր ընտրանին իր ակտիվում 11 միավոր ունի և 7 միավորով գերազանցում է 5-րդ տեղում հաստատված Մակեդոնիայի թիմին: Անդորրացիները 0 միավորով եզրափակում են աղյուսակը:

Անդորրա-Հայաստան 0:3 (0:1)

Անդորրա- Խոսե Գոմես, Քրիստիան Մարտինես, Մարկ Բեռնաուս, Էմիլի Գարսիա, Իլդեֆոնս Լիմա, Մարկ Պույոլ, Ֆեռնանդո Սիլվա (Սեբաստիան Գոմես, 72), Սերխիո Մորենո (Մարսիո Վիեյրա, 81), Մարկ Վալես, Խոսեպ Այալա (Խուլի Սանչես, 87), Հորդի Ռուբիո:

Հայաստան- Ռոման Բերեզովսկի, Սարգիս Հովսեփյան, Կառլեն Մկրտչյան, Մարկոս Պիզելլի (Արթուր Եդիգարյան, 83), Գևորգ Ղազարյան (Զավեն Բադոյան, 89), Արթուր Սարկիսով, Հրայր Մկոյան, Վալերի Ալեքսանյան, Հենրիխ Մխիթարյան, Լևոն Հայրապետյան, Էդգար Մանուչարյան (Էդգար Մալաքյան, 78):

Գոլերը` Մարկոս, 35 (0:1), Գևորգ Ղազարյան, 75 (0:2), Հենրիխ Մխիթարյան, 90+1, 11 մետր. (0:3):

Ք. Անդորրա լա Վելյա, 02 սեպտեմբերի 2011 թ., «Կոմունալ» մարզադաշտ:
Մրցավար` Ալեքսանդր Կոստադինով (Բուլղարիա):
Օգնականներ` Կրում Ստոյլով (Բուլղարիա), Դիվան Վալկով (Բուլղարիա):
4-րդ մրցավար` Անգել Անգելով (Բուլղարիա):
Զգուշացվեցին` Մարկ Պույոլ (27), Արթուր Սարկիսով (43):
Հեռացում` Իլդեֆոնս Լիմա (90):