Ձեր վստահելի աղբյուրը

Եղնիկներ կոչվող զորամասում կատարված հանցագործությանն առնչվող ու մասնակից մի քանի անձինք այսօր ձերբակալվելու են, և նրանց նկատմամբ մեղադրանք է առաջադրվելու: Այդ մասին այսօր լրագրողների հետ հանդիպմանը հայտարարեց զինվորական դատախազ Գևորգ Կոստանյանը:

«Տեղի է ունեցել ոճրագործություն, որը խիստ դատապարտելի է ցանկացած հայի համար, մեզ բոլորիս համար, որովհետև արդյունքում զոհվում, սպանվում են մեր տղերքը»,-ասաց նա:

Գ. Կոստանյանը նշեց, որ ինքը այլ պատասխանատուների հետ եղել է զորմասում, այս պահի դրությամբ կա կալանավորված, կատարվածի մասին տեղեկատվությունը շատ դինամիկ է.  կարող է կասկածյալների ու մեղադրյալների թիվը ավելանալ:
«Յուրաքանչյոր մասնակից ենթարկվելու է պատասխանատվության, անկախ կոչումից, դիրքից, և որևէ հովանավորչություն չի կարող լինել: Միանշանակ երաշխավորում եմ»,-վստահեցրեց զինդատախազը:

Նշենք, որ «Եղնիկների» գործով մեղադրվող սպան` բուժկետի բժիշկը, ձերբակալվել էր և օրերս Սյունիքի մարզի ընդհանուր իրավասության դատարանի որոշմամբ կալանավորվել էր: Սպային մեղադրանք է առաջադրվել ՀՀ Քր.Օր.-ի 375 հոդվածի 1-ին մասի (Իշխանության չարաշահում, իշխանազանցություն կամ անգործություն) հատկանիշներով հանցագործություն կատարելու համար: ԼՂՀ «Եղնիկներ» կոչվող զորամասում ընդամենը 8 ամիս ծառայած Աղասի Աբրահամյանը մահացել էր օգոստոսի 26-ին: Զինվորի ընտանիքը հայտարարել էր, որ իրենց տղան դաժանաբար ծեծվել է, գանգուղեղին ստացած մարմնական վնասվածքների հետևանքով էլ մահացել:

Նախորդող նորություններ`  Նոր մանրամասներ «Եղնիկների» դեպքից
Զինդատախազ. Հայտնի է` ինչ է կատարվել «Եղնիկներում»