Ձեր վստահելի աղբյուրը

Վերջին օրերին բանակի ու ռազմական բժիշկերի առնչությամբ արծարծվող մի շարք խնդրահարույց թեմաների շուրջ Panorama.am-ը զրուցեց ՀՀ ԶՈՒ ռազմաբժշկական վարչության պետ, գնդապետ Արտաշես Փարսադանյանի հետ:

-Պարոն Փարսադանյան, ի՞նչ հնարավորություններ ունի ռազմաբժշկական վարչությունը և ի՞նչ խնդիրներ է լուծում: Արդյո՞ք վարչությունը կարողանում է բանակը համարել անհրաժեշտ կադրերով:

-Միանգամից ասեմ, որ ներկայիս ՀՀ ԶՈՒ ռազմաբժշկական ծառայությունը բավականին լավ զարգացած կառույց է, որն իր հնարավորություններով համապատասխանում է զինված ուժերի բուժապահովման կազմակերպման պահանջներին: Այսօրվա ռազմաբժշկական ծառայությունը հագեցված է ժամանակակից բժշկական սարքավորումներով և ապարատներով, դիագնոստիկ միջոցներով, որոնք հետ չեն մնում քաղաքացիական առողջապահության հնարավորություններից: Զորամասերի բուժկետերը մեծամասամբ կամ նոր են կառուցվել, կամ կապիտալ վերանորոգման են ենթարկվել և շարունակ հագեցվում են բժշկական նորագույն տեխնոլոգիաներով:

Հոսպիտալներն այնպես են տեղակայված, որ ապահովում են զինված ուժերի` տարածքներում տեղաբաշխված ստորաբաժանումների անձնակազմերի որակյալ և մասնագիտացված բուժսպասարկումը: Հոսպիտալները հագեցված են և շարունակում են հագեցվել նորագույն բժշկական տեխնոլոգիաներով:

Ռազմաբժշկական ծառայությունը ապահովված է որակյալ բժշկական կադրերով` զինված ուժերում ծառայում են 5 բժշկական գիտությունների դոկտորներ և շուրջ 36 բժշկական գիտությունների թեկնածուներ: Բժշկական անձնակազմի մոտավորապես 50%-ը կլինիկական օրդինատուրայի շրջանավարտներ են: Դեղորայքի և վիրակապական նյութերի, բուժմանն անհրաժեշտ այլ նյութերի կարիք չենք զգում:

Հիվանդների և վիրավորների էվակուացիայի համար ունենք սանավիացիա, ռեանիմոբիլներ, հատուկ սանիտարական տեխնիկա և այլ տրանսպորտային միջոցներ: Մի խոսքով զինված ուժերի բուժապահովման կազմակերպման համար ունենք ամեն մի հնարավորություն:

-Ի՞նչ հիմնական խնդիրներ են դրված վարչության առջև:

-Մեր առջև դրված հիմնական խնդիրներն են`
1. Ներկայումս աշխատում ենք կադրերի որակական հատկանիշների բարձրացման ուղղությամբ:
2. Մյուս կարևոր խնդիրը, դա հիվանդությունների կանխարգելումն է, որի շնորհիվ հիվանդացությունը զինված ուժերում նվազել է տարբեր հիվանդությունների առումով մինչև 2700 անգամ: Սա վերաբերվում է կառավարելի ինֆեկցիաներին:
3. Հիվանդությունների և տրավմաների վաղաժամ հայտնաբերում և բուժման արագ կազմակերպում:
4. Էվակուացիայի օպերատիվ կազմակերպում: Այստեղ հատկապես ուզում եմ ուշադրություն հրավիրել օպերատիվության ֆակտորի վրա` աշխատում ենք անգամ ամենահեռավոր տարածաշրջաններից հիվանդներին և վիրավորներին արագ տարհանել հոսպիտալներ, որտեղ կազմակերպվում է որակյալ և մասնագիտական բուժօգություն: Այս հարցում մենք ունենք բավական մեծ առաջընթաց:

-Հասարակության համար այդքան էլ տեսանելի չէ, թե ինչ կարգով է իրականացվում ռազմաբժշկական ֆակուլտետի շրջանավարտների նշանակման կարգը ու ինչ սկզբունքով է իրականացվում զորամասից-զորամաս բժիշկների տեղափոխման հարցը: «Եղնիկներ» անունը կրող զորամասում տեղի ունեցած միջադեպից հետո մեղադրանքներ հնչեցին, որ այդ զորամասում բժիշկներին «առանց ռոտացիայի ծառայության են նշանակում»:

-Ռազմաբժշկական ֆակուլտետի շրջանավարտները առաջին նշանակումը ստանում են վիճակահանության միջոցով: Հետագայում նրանց տեղափոխումը զորամասեր կամ 1-ին կարգից 2-րդ և 3-րդ կարգի զորամասեր կատարվում է պլանավորված կարգով ՊՆ և ԳՇ կադրերի վարչությունների հետ միասին: Ինչ վերաբերվում է սահմանային զորամասերում երկարատև ծառայությանը, միանգամից նշեմ, որ ներկայումս ընդամենը 5 հոգի են, որ նման զորամասերում ծառայում են 2-ից 3 տարի: Ինչ վերաբերվում է «Եղնիկներ» կոչվող զորամասին՝ ասեմ, որ բուժծառայության պետը այնտեղ է գտնվում 2011թ-ից, բուժկետի պետը 9 ամիս է ծառայում, բուժկետի բժիշկներից մեկը նշանակվել է 2009թ-ին, մյուսը 2010թ-ին:

-Պարոն Փարսադանյան, վերջին օրերին տարածված մի նամակում նշվում է, որ Ձեր նշանակումն այդ պաշտոնում կապված է պաշտպանության նախարար Սեյրան Օհանյանի հետ ունեցած բարեկամական կապով:

Այդ նամակում բերվող բարեկամական կապը ճիշտ չէ: Պաշտպանության նախարարի տիկինը և ես քրոջ և եղբոր թոռներ ենք: Բայց ի հեճուկս հոդվածագրի նշեմ, որ ես ռազմաբժշկական վարչության պետ նշանակվել եմ դեռ մինչև Սեյրան Օհանյանի պաշտպանության նախարար դառնալը` 2005թ. վերջից: Իմ և նախարարի միջև միշտ եղել է պաշտոնական հարաբերություն, բայց չեմ ուզում թաքցնել նաև, որ ներկայիս պաշտպանության նախարարի վերաբերյալ ունեմ սիմպատիա, նա ինձ համար միշտ եղել է հզոր կամքի դրսևորման, գիտակ զինվորականի, լավ ղեկավարի և լավագույն մարդկային հատկանիշներով օժտված մարդու էտալոն: Մարդ, որը անտրտունջ և անմնացորդ նվիրված է իր ազգին, հողին ու ջրին:

Քանի, որ խոսք գնաց «Ինչու պաշտպանության նախարարը չի հանդուրժում բժիշկներին» հոդվածին, միանգամից ասեմ, որ հոդվածում ոչ թե բերվել են փաստացի փաստեր, այլ խեղաթյուրումների շարան է դա, որևէ փաստ չի համապատասխանում իրականությանը և՛ հոդվածի ոճից, և՛ էությունից երևում է միտումնավորության դոմինանտը: Անգամ եթե այստեղ անդրադարձ չանենք «Եղնիկներում» կատարվածին, դա թողնելով հետաքննության մարմիններին, անգամ եթե «Եղնիկներում» աշխատելը «անտանելի պատիժ է» մեկ է ես գտնում եմ, որ բժիշկը պետք է իր պարտքը կատարի, իր վերաբերմունքը ցույց տա բոլոր օգնության կարիք ունեցողներին: Հոդվածագիրն անգամ չգիտի, որ ՊԲ զորամասերում նշանակումը կատարվում է ոչ ռազմաբժշկական վարչության պետի կողմից:

Ինչ վերաբերվում է նախարարի` բժիշկների նկատմամբ ունեցած վերաբերմունքին, հայտարարում եմ, որ բժիշները միշտ զգացել են իրենց թիկունքում նախարարին: Պաշտպանության նախարարության ղեկավարության և նախարարի ճիշտ վերաբերմունքն է, որ այսօր ռազմաբժշկական ծառայությունը քայլ առ քայլ առաջ է ընթանում: Այստեղ էլ նշեմ, որ նախարարը խստապահանջ է նաև իր սեփական անձի նկատմամբ` էլ ոնց կարող է անձնակազմի նկատմամբ չլինել խստապահանջ և օբյեկտիվ:

Օգտվելով առիթից և նաև արտահայտելով իմ դժգոհությունը այսօրվա մամուլում հրապարակվող իրականությանը չհամապատասխանող նյութերին: Այն հանգամանքը, որ նախարարը պահանջում է ապահովվել թափանցիկություն, խնդրում եմ բոլոր նրանց, ովքեր ուզում են բանակի վերաբերյալ հայտարարություն անել, կամ ինչ որ բան տպագրել, հրավիրում եմ կլոր սեղանի շուրջ պարզաբանումների, նաև ճշմարտության ապահովման, որը իմ կարծիքով առավել օգուտ կբերի բանակի ամրապնդմանը: Իհարկե բանակում կան կարգավորման բավական հարցեր, որոնք ամեն օր քայլ առ քայլ կատարվում են և առաջարկում եմ` եկեք սև ցեխ չշպրտենք բանակի վրա, այլ աշխատենք նրա ամրապնդման և մարտունակության բարձրացման համար: Այսօր այդ բանակը մեր ագզի պահպանման, մեր հող ու ջրի, ազատության հիմնական գրավականն է: